تقرير عن صيانة 5000 كم ل-BYD F3 اتوماتيك في مركز القطامية

[gad_fcis]

السلام عليكم و رحمة الله و بركاته
معلش أنا كتبت الموضوع متأخر شوية بس كنت مشغول في الشغل
أنا كنت عايز أعمل صيانة ال-5000 ، كلمت الاستاذة داليا يوم 24-07-2011 (و دة كان يوم اجازة ) و سألتها اني عايز أعمل صيانة ال-5000 ، و سألت إذا كان ينفع أروح النهردة ولا لازم أخد ميعاد في يوم تاني ؟ بصراحة كانت في منتهى الإحترام معايا و إدتني ميعاد في نفس اليوم الساعة 1.30 pm


أنا كنت هناك 1.20 pm و ركنت العربية و طلعت للاستاذة داليا ، المهم عملت أمر الشغل و كانت عندي ملاحظات و هي :
1- إستهلاك البنزين عالي حولي 8-9 كم في اللتر

2- رعشة في العربية و بتزيد مع التكييف
3- صوت تذيق بسيط من الكرسي اللي جنب السواق
4- لمبة الاستوب الخلفي مكنتش شغلة
5- رعشة مع السرعة العالية (و اللي عمل أمر الشغل قالي دة ترصيص و الجهاز بايظ )


المهم العربية فضلت واقفة برة لمدة ساعة و دخلت الورشة الساعة 2.30
و كانت الاستاذة داليا وصت صنايعي هناك إسمه سامح إن هو إلي يشتغل في العربية
سامح كان في ايده شغل و خلص بعد ساعة يعني العربية الشغل ابتدى فيها بعد ساعتين من وصولها للمركز


شوية و لاقت سامح طلع بيقولي إن العربية عايزة فلتر بنزين ،قلتله أنا معنديش مشكلة اني أغيره بس العربية يادوب لسة عملة 5000 كم ليه أغير الفلتر؟؟ المهم بعد كلام الفلتر اتغير في الضمان


أنا غيرت زيت شل


ملاحظتي على العربية بعد الصيانة :
1- صوت العربية أصبح ناعم بعد زيت شل
2- التزييق اللي في الكرسي إتحل
3- لمبة الستوب إتصلحت
4- الرعشة هي هي متغيرتش بس بعد كدا لما ركبت مع واحد صاحبي معه الانتر حست إن دة طبيعي
5- إستهلاك البنزين بعد الصيانة كان كويس (11 كم في اللتر ) بس رجع تاني ذي الأول بعد كدة
6- للأسف العربية من جوا كانت مشحمة و كان باين الشحم على باب بتاع السواق و المخدع اللي في النص


ملاحظتي على المركز :
1- إستقبال الاستاذة داليا كان في منتهى الذوق و الاحترام
2- موضوع إن العربية تقعد ساعتين على ميبتدوه شغل فيها دة تضييع وقت كبير للعميل و اللي لاحظته إن الشكوى ديه عامة من العملاء اللي كانو موجودين في الإستراحة
3- طريقة سواقة الصنايعي للعربية سيئة إلى أقصى درجة، أنا نفسي مش بسوق عربيتي كدا (بتحس إن إلي بيسوق العربية داخل بها سبق و بيدوس بنزين بقوة )

4- أنا مش بطلب إن العربية تتغسل بس على الأقل تطلع ذي مادخلت لا أنضف ولا أوسخ
5- و أنا بحاسب سمعت واحد من الصنايعي بيهزر مع واحد صاحبه بأقذر الألفاظ و دة طبعاً المفروض ميحصلش أنا نفسي تضايقت فمابالك لو فيه انسة أو مدام واقفة


أنا بعد كدا شكلي حاعمل الصيانة في مركز اسكندرية عشان فعلاً حست بفارق كبير و بالمناسبة أنا حاسس إن الصنيعي هناك مش قلبهم على الشغل (باستثناء سامح ) مش ذي مركز اسكندرية تحس إن الصنيعي هناك مهتم بشغله و حريص عليه (ممكن دة بيحصل في مركز القطامية عشان ال ضغط عالي قوي هناك بسبب التاكسيات )

[محمد اشرف]

[Atef Fattah]

أتفق تماما مع حضرتك أن القائمين بالصيانة عليهم التعامل مع السيارة برفق والمحافظة على نظافتها وإلا ما الفرق بين التعامل مع مركز صيانة بالتوكيل والأسطى بلية فى ورشة صغيرة ؟

أيضا لاحظت أن هناك شكوى متكررة من إستهلاك زايد للبنزين هل يلفت ذلك النظر إلى انها طبيعة إستهلاك جميع السيارت BYD F3 الأوتوماتيك ام أنها تتفاوت حسب طبيعة القيادة ؟

أرجو ان يعلق مالكى السيارة الأوتوماتيك على هذه النقطة ولو أمكن ان يذكر كل واحد معدل الإستهلاك لديه.

[ziabassem]

بالنسبة لموضوع استهلاك البنزين .. فده بيتدخل فيه عوامل كتيرة جداً .. ولكن من أهمها حاجتين مدى ظبط السيارة ، وكذلك اسلوب القيادة .. فاستهلاك السيارة الواحدة للبنزين يختلف عند قيادة شخصين لها .

[Atef Fattah]

المشاركة الأصلية كتبت بواسطة ziabassem بالنسبة لموضوع استهلاك البنزين .. فده بيتدخل فيه عوامل كتيرة جداً .. ولكن من أهمها حاجتين مدى ظبط السيارة ، وكذلك اسلوب القيادة .. فاستهلاك السيارة الواحدة للبنزين يختلف عند قيادة شخصين لها .

كلام مظبوط وسليم جدا ولكن الفوارق التى قد تنجم عن إختلاف نمط القيادة بين الأشخاص لا أظن أن تزيد عن 20 % . كتالوج الدعاية للسيارة يقول أن معدل الإستهلاك لكل 100 كم هو 4.9 لتر وهو يعنى حوالى 20 كم للتر وهو معدل صعب جدا تحقيقه مع موتور 1600 سى سى وخاصة مع فتيس أوتوماتيك ويبدو فيه بعض المبالغة و أغلب الظن أنه هناك خطأ مطبعى والرقم الذى يبدو أكثر منطقية هو 6.9 لتر بدلا من 4.9 لتر.