عيوب بالجملة في سبرانزا a113 زيرو

[حازم شاهين]

المشاركة الأصلية كتبت بواسطة sayed19 يا جماعة أنا معايا العربية من مدة و مش ذى مابيقول الأستاذ خالص . هى مريحانى جدا جدا وسريعة جدا جدا لدرجة أنى سفرت بيها الغردقة مسافة 500 كيلو من غير ماريح فى اى أستراحة بس حطيط بنزين ورحت فى 4 ساعات ورجعت فى 3.5 ساعة وعربية روعة وجميلة جدا ومفيهاش كل الكلام دة . الاستاذ واضح انه راح لمعرض واحد نصاب . وشكرا

على فكرة صاحب الموضوع كان بيتكلم على ملاحظات و عيوب فى شكل و تقفيل العربية و ما إتكلمش على آداءها خالص ، بالعكس هو ميال ليها علشان سعة المحرك و قدرته على تحمل التكييف

عموما رأى حضرتك سليم و العربية مريحة و ممتعة فى السفر و آداءها جيد عموما

[fineart607]

روح لموزع معتمد وبلاش اى معرض عكاك لحسن تكون مستعملة بمواصفاتك دى انا صاحبى لسه جايبها واتفرجت عليها والعربيه كويسه على سعرها واحسن من مثيلتها كتير

[mahmooud135]

المشاركة الأصلية كتبت بواسطة aboelesaad بتهيالي حضرتك اتصلت بيا و قعدنا دردشنا كتير عنها مش عارف حضرتك روحت فين و مين قالك كده عليها او حتي ازاي انت شوفتها كده عموما مع احترامي ليك العربيه مش كده وعلي فكره لو الي شوفتها كده فعلا يبقي دي عيوب تقفيل واضحه و من حقك متشترهاش لان انا مش دافع في عربيه عشان اصرف عليها وعلي فكره عدد الكيلو مترات دي عشان الشحن لان هما بيجوبوها سواقه مش علي عربيات شحن عشان ميكلفكش فلوس زياده تمن الشحن علي عكس تماما البلاد البعيده زي اسوان بيزود ب 6 الاف فوق تمن العربيه تمن شحنها لان لو اخدها سواقه كده العربيه هتدخل في صيانه الالف و صابحها لسه مستلمهاش ولو احتاجت حاجه انا تحت امرك حضرتك وتقبل تحياتي

فى حاجة غريبة فى كلام حضرتك حضرتك بتقول انا مش دافع في عربيه عشان اصرف عليها طيب مهو كل اللى معها اسبرانزا لازم يروح يصرف عليها مع انها زيرو يعنى يغير المساعدين بمساعدين لانسر علشان دبدبة العفشة يعمل تعديل فى عمود الدريكسيون على الطخبيط بيركب غطاء لعصا الفتيس علشان متقشرش يبقة ازاى حضرتك بتقول الكلام دة

[maxxatta]

المشاركة الأصلية كتبت بواسطة حازم شاهين هو فيه إحتمال إنك تكون شوفت عربية متبهدله من المعرض و 365 كتير على طنطا المفروض حتى لو العربية جاية من المصنع سواقة يبقى عدادها ما يزيدش عن 150 كم معنى كده إن حد فى المعرض ده إستخدم العربية 200 كم المهم شوف فى معرض تانى أو عند الموزع المعتمد (عيسى) لكن أنا برضه حاسس إنك مش هتتبسط ﻹنك مستريحتش فى كرسى العربية و إعتبرت الماروتى اريح منه لو فضلت على رأيك ده فى العربية إصرف نظر عنها فورا و دور على حاجة تانية أهم حاجة فى شرا عربية جديدة إنك تبقى راضى عنها و فرحان بيها لكن

فعلا حاز بك انت كلامك صح هى مش داخلة دماغة يبقى خلص الكلام لازم يكون بيحب العربية وعايز يجبها لان العربية الى هو شافها مش زيرو خالص واكي لو راح مشوار لحدد اى موزع معتمد فى القاهرة هيحل المشكلة لكن انا بنصحه بنفس نصيحتك هو يشوف اى عربية تانية

[ahmed_darhos]

المشاركة الأصلية كتبت بواسطة egypttoc اشكركم جدا يا اخواني علي الاهتمام انا رحت شفت العربية في معرض تاني و لقيت الحالة بتاعتها احسن بكتير ما عدا عيب تقفيل التابلوة هو فية اجزاء مفارقة حوالي نصف سنتي من ناحية و الناحية التانية راكبة فوق اللي جنبها و مغطياها بربع سنتي او اقل و لان العربية مكنتش متهانة محستش ان الزراير ضعيفة او التابلوة بدأ يقشر زي ما شفت العربية الاولي كمان الكبوت كان معدول وجوانات الباب ماسكة نفسها بس واضح انها ضعيفة انا عامة حسيت الفرق بين العربيتين حتي في قفلت الباب لاني نسيت اقول ان الاولي بابها كان لازم يترزع علشان يقفل و متاكدتش من كدة الا لما شفت العربية في معرض تاني و لقيت المشكلة دي مش موجودة و فية حاجة لاحظتها انة فية بعض اجزاء من العربية مدموغ عليها علامة دايو بجوار علامة شيري زي الزجاج الامامي و الاكياس اللي علي الفرش و للعلم انا اتفرجت علي الاي 10 في معرض تاني بالنسبة للتقفيل فية فرق السما من العما في كل شيء لكن خايف من الاي 10 علشان الماتور اضعف من الاسبرنزا و البتالي مش حتستحمل سفر ولا حعرف اشغل التكييف و انا راكب

حضرتك بتتكلم عن i10 و دى عربية بتبدأ من 58000 جنيه ... يبقى الكلام المنطقى انك تشترى عربية 1600سىسى و تكون قريبة فى السعر زى الفيرنا... و لو حضرتك بتسافر و محتاج تكييف و كده يعنى أدائها معاك هيكون ممتاز...
و نصيحة خالصة لوجه الله .. انت انطباعك الأول عن العربية كان مش حلو فبلاش تشتريها أحسن .. لأنك لو اشتريتها و حصل فيها حاجة هتكرهها جدا...
و هى دى عربيات الاسبيرانزا .. صعب انك تلاقى الاراء متشابهة و لكن دايما تلاقى ناش بتشكر فيها جامد و ناس بتلعن اليوم اللى اشترتها فيه .. و ده مش جنان .. ده حقيقة لأنها فعلا عربيات عاملة زى البطيخة بجد.. فى عربية تلاقيها ممتازة و تقفيلها رائع و عربية تانية تحس انها متكروتة...
على فكرة أنا من ملاك اسبيرانزا M11 يعنى رأيى ده من خلال تجربة شخصية..
و فى النهاية ربنا يوفقك للخير.. بس فكر كويس ..