انا اسف بس حسيت اني لازم انقل الموضوع ده

[sam ram]

الحمد لله انه طلع منها وربنا يعوض عليه ويقوم بالسلامه ان شاء الله
المتوقع لما اي عربيه تترزع في مطب او تقع في نقره ان العجله اللي حصل فيها كده بتفقد تماسكها مع الطريق في نفس الوقت اللي بتكون فيه بقيه الاطارات متماسكه.. و بالتالي بيحصل انحراف للعربيه (العربيه تحدف ) لحد العجله دي ما ترجع تاني لتماسكها مع الطريق ... ولحظه عوده التماسك دي اخطر لحظه لأن لو العربيه اتجاهها اتغير وبعدين الكاوتش كمان اتجاهه اتغير عكس اتجاه الحركه .. العربيه بتفقد اتزانها تماما ... و الاخطر بعد كده استخدام الفرامل
التلات عوامل دول بترتيبهم قلبو العربيه ( فقدان التماسك - اختلال التوجيه - الفرامل المفاجاءه )

طبعا كون العربيه يكون فيها عيب والواحد يمشي بيها ده شيء في منتهى الخطوره
يعني الواحد لما يحس ان ضغط الهوا مش مظبوط او عيب زوايا و اتزان بيظبطه في اقرب محطه ...
ولو حس ان المشكله اكبر من كده وفي عيب في العفشه .. ميستناش عليه ابدا ويطلع على التوكيل على طول
لأن علشان يفضل ماشي بعربيه بتحدف شمال 10 الف كم دي حاجه تخنق فعلا
خصوصا لو جديده زيرو وفي الضمان
الا اذا كان صاحبها حاسس انها حاجه بسيطه وتتعمل مع الصيانه العاديه ..وبعد الحادثه حس بالخطوره !!
عموما ياريت الاعضاء اللي معاهم سيراتو يقولو على موضوع الحدفه الشمال دي !!
وكل واحد يخلي باله من لغاليغه .. قصدي عفشه عربيته

مش قصدي اتريق او اشكك ابدا في كلام صاحب الحادثه ... بالعكس ربنا يكون في عونه و يخفف عنه و يعوض عليه
لكن الخطاء البشري وارد جدا في اي لحظه ... و ان الواحد يبقى عارف ان العربيه فيها عيب و يمشي بيها فده غلط برضو .. 100 كم في الساعه دي مش سرعه قليله خصوصا لما تبقى شاكك في العربيه اللي انت راكبها !!



موقفين حصلو معايا شخصيا
الأول : سكودا فيليشا
منزل 6 اكتوبر لشارع النيل ... بقعه زيت على الارض في اول المنزل (دوران ) والفرده الشمال فقدت تماسكها تماما و العربيه ابتدت تحدف يمين ... شلت رجلي من على البنزين و تبت في الدريكسيون على وضعه لحد ما التماسك ابتدا يرجع للكاوتش و ابتديت اعدل نفسي و الحمد لله اني كنت في شمال الملف و العربيه بتحدف يمين ... لأني لو كنت جنب الرصيف مكنتش حعرف اعمل اي حاجه ... و ربنا سترها
الموقف تاني : فيات سيينا
في ميدان التحرير ...
في الشتا ...فجر يوم الجمعه و مفيش بني ادم في الميدان
مكنش في مطر لكن ندى جامد و الكاوتش في اواخر ايامه
بلف مع الملف عادي جدا ( ملف ميدان التحرير ) يعني ملف واسع جدا .... العربيه مره واحده بقت بتلف زياده شمال
حاولت اعمل نفس اللي عملته قبل كده ... رفعت رجلي من على البنزين وتبت في الدريكسيون من غير فرامل ...العربيه فضلت تلف شمال و بقت بعرض الميدان وداخله على الصينيه .. غصب عني حدفت كله يمين .. و لا الهوى .. ويدوبك قبل الرصيف العربيه مره واحده بعد ما كانت بتزحف شمال لفت يمين ... لدرجه اني لفيت 180 وبقت بعرض الميدان برضو ... بس رجع ليا التحكم تاني على العربيه ... عدلتها و كملت طريقي ... و الحمد لله ان مكنش في اي عربيات واني مكنتش ماشي بسرعه
الموقفين دول حصلو بعربياتي الشخصيه وبقالي فتره طويله بسوقهم و حافظهم
لكن ساعه القدر يعمى البصر ... و اللي ربنا كاتبه هو اللي بيكون ... حتى لو كنت جوه دبابه
الله يرحم ايرتون سينا .. كان بطل العالم في الفورميلا وان ... و مات راشق في حيطه !!!



ده فيديو لشويه عربيات راليات ( سليمه ومبتحدفش) واتقلبت برضو

http://www.youtube.com/watch?v=R5NEn...layer_embedded

الف حمد الله على السلامه ... وربنا يسترها معانا جميعا

[SuMo]

الف سلامة على صاحب العربية و طبعا فى داهية الفلوس
لكن انا ليا تعليق على حاجتين
اولا موضوع النقرة ده انا حصلى فى موقفين
الاول باوبل فيكترا و كنت ماشى على 120 فى طريق العوده من الرحاب و على اليمين عربيه تريلا و فى الوقت اللى انا كنت فيه بجوارها تماما لقيت قدامى نقرة كبيرة جدا و على فكرة لسه موجوده حتى اللحظة و نزلتها بالفردتين واحده تلو الاخرى و الحمد لله طبعا لكن العربيه معومتش
التانى كان اول يوم العيد و كان بعربيه لانوس بعد مدخل جاردنيا فى اتجاه الرحاب و كنت ماشى 100 و عاوز الحق الجمعه و المنطقه دى فيها اعمال رصف و اللى مشى فيها شاف الحفر عشان دى مينفعش تكون نقر و برده نزلت العجلتين الشمال و سمعت صوت هبده جامده لدرجة انى حسيت ان العجلة الاماميه اتخلعت من مكانها بس برده الانوس معومتش و دى لانوس فما بالكم بالسيراتو
اكيد العربيه اللى فى الحادثه دى فيها عيب صناعه
تانى نقطه ان حادثه بالوصف البشع ده و اجد فى الصور ان الكابينه سليمه يبقى العربيه دى فيها مواصفات امان عاليه ولازم تحترم
اسف على الاطاله و تحياتى

[oceanboy425]

حمدلله على السلامة وربنا يعوض عليك

[ahmedlion599]

الحمد لله على سلامتك

[horas3000]

ده برضة من مداخلات صاحب الموضوع

شكراا لكل الناس و ربنا يخليكوا ... دوول صور تانيه عشان الناس بتقول ان الكوتش هو السبب و الدليل ان الفرده الشمال فرقعت... الصور دي ابشع شوية و بتبين ان الفردتين اللي قدام مفرقعين مش بس الشمال.. و الواضح جداا ان المقصين اللي قدام مكسوريين... و شوفو الكوتش اللي قدام يمين و شمال عامليين ازاي.. و انتو تعرفو ان ده مقص اتكسر فيه ملاك للعربية هنا فاكريين اني منفسن او حاقد على العربية مثلا..!!!!! طيب ليه!!!! هو لا سمح الله اللي في الصور دي مش عربيتي!!!!! هو انا مثلا مشتريتهاش و بتكلم معاكوا عن مشكلة حقيقية والله عشان مش قادر اشتريها مثلا؟؟؟؟ دي كانت عربيتي اللي خسرتها و اهلي كانوا هيخسروني معاها يا ناااااس..!!!!!! عقلنا راااح فين بس عشان نفكر..!!!! ناس تقول اني عامل حرب, و ناس فاكره اني ليا كذا اكونت و بدخل بكل واحد شوية و بهاجم العربية..!!! ايه ده بالله عليكم....؟؟؟؟ ده انا بحاول انصح الناس والله العظيم و اعرفهم الصح, و اعتذرت لكل الناس اللي خافت و قلقت, و قلت والله ما قاصد اخوف الناس, بس دي مسؤليه عليه تجاه كل فرد في المنتدى, انا اول واحد قلت منهاجمش العربية و نستنى لما تتجرب, و انا اشترييت و اعتبرت نفسي بجربهالكوا والله, و انا كنت مقتنع اكييييد بيها, بس لما الموضع يوصل لكده يبقى لازم اتكلم و احذر و مش عيب اني اقول الحقيقة و الصور تتكلم مش انا... بس حابب اقول موضوع مهم بصراحة... انا كان معايا لانسر كريستالة 98 كاملة مانيوال, 1300 سي سي... و والله قبل ما نبيعها من سنه, يعني كان بقالها 10 سنيين شغالة و والله بتتفحت معانا, كانت عامله 300,000 كم على العداد... اقسم بالله العلي العظيم, العربية دي كنت بمشي بيها على الدائري و باخد الفواصل بتاعت الكوبري و دي اسوأ من نقرة بمراحل, لأنها زي المطب على 120كم, و ده طوال فترة المشروع اللي كان في الماظا (معرض بافاريا و بي ام دبليو تبع ياسين) و عمر لا مقص كسر ولا عمري غيرتلها مقص اصلا, ده غير البلاعات و النقر اللي في كل حتة طبعا..!!!!! بعد 10 سنيين (ثبات, موتور, عفشة) 100% على حالتها دي.... انا عايز اقول ان اللي حصل مش طبيعي و مفيش مقص ممكن يتكسر بسبب نقرة زي للي خدتها دي ابداا, لأ و كمان تتقلب.... انا مش هطول اكتر من كده بس انا هقول كلمة لوجه الله (العربية دي فيها مشكله حقيقية في العفشة + العفشة في موديل sx مش مستحملة الجنط الــ17 + المواد المستخدمة في العربية دي سواء تقفيل او عفشة رديئه جدااا)... اللهم بلغت , اللهم فاشهد....

اولا شكرا لكل من تمنولي السلامة و اللي عمل الحادثه ده شخص تاني ادعو له بالشفاء و ان ربنا يصبره و يعوض عليه

سام رام و سومو تحليلكم عين العقل و زي تحليل حازم شاهين منطقي و فعلا احتمال وجود العامل البشري كبير
بس من كلام صاحب العربية هو بيقول ان المقصات اتكسروا نتيجة الوقوع في النقرة و هو ده سبب فقدانه الاتزان و التحكم و ده اساس نصحة للناس بتوخي الحذر و عدم تحميل العربية فوق طاقتها
المهم و زي ما قلت قبل كده لازم نعرف هل المشاكل ده موجوده في السيراتو بشكل عام و لا دي حالات فرديه
المشكلة ان ناس كتير بتتكلم و خلاص و محدش بقي عارف مين الصادق و مين اللي بيفتي و ايه الهدف من وراء الكلام ده
في الاخر مقدرش اقول غير ربنا يبارك للي جابوا او هيجيبوا العربية و طالما مقتنعين بيها يتوكلوا علي الله بس يخلوا بالهم و ميتهاونوش في اي حاجة تكون مش مظبوطة او مش عجباهم. الوضع دلوقتي اتغير و الواحد ممكن يطلع بنتيجة و ياخد حقه

<!-- google_ad_section_end -->