الجزء الثالث من خدعه غبور ..الايمجراند -

[الويب المصرى]

ونبى انتم ناس عسل وهيا عمله ايه دلوقتى

[silentman84]

السلام عليكم
احب اشارك معاكم برأيى هنا .......وانا ولا مسؤل مبيعات فى غبور ولا فى اى معرض......انا مواطن عادى........وكنت دايما ضد العربيات الصينى ماعدا الجاك بى 15 اللى وكيلها منه لله فشل العربيه وحد من انشارها لعدم توفير صيانه وقطع غيار.... وكنت بفكر اشترى اوكتافيا a4 بس مالقيش حالات كويسه والسعر 80 الف جنيه وعامله 150 الف كيلو قولت على ايه الزيرو زيرو والجديد له طعم تانى بس الحمد لله الايمجراند عربيه محترمه بجد من خلال التجربه وربنا يباركلى فيها ويدينى خيرها ويكفينى شرها
الحمد لله توفيق من الله اشتريت جيلى ايمجراند 7 انتاج 2015 مش انتاج قديم كان فيه بعض العيوب.......وبصراحه لما بحب اشترى حاجه بحب اقرى عنها كويس واسأل كويس علشان الواحد مش بيلاقى الفلوس على الارض........بعد بحث كبير فى المنتديات والاستماع لاراء الناس الايجابيه والسلبيه واللى بشكر ويمدح فيها واللى بيذم فيها فتوكلت على الله وقررت اشترى وده برده من بعد ماركبتها وشوفتها مع واحد صاحبى وشكرلى فيها جدا وهو جايب منها اتنين وحيجيب كمان اتنين (مشغلهم ليموزين) وكمان مسكتش بقيت لما الاقى واحد معاه العربيه واقف فى اشاره ولا فى بنزيه ولا سواق تاكس بيقت اسأله عنها ........وكل اللى قبلتهم شكروا فيها جدا.........روحت واخد بعضى وروحت شارى واحده........هنا بقى احب اوضح للناس بعض الامور
العربيه دى تقفيل محلى يعنى ممكن تلاقى عيوب تقفيل فعلشان كده لازم تفلى العربيه حته حته وانت بتستلم
ححكيلكم حكايتى بعد ماعرفت انى ممكن تلاقى عيوب زى ماقريت قبل كده والحمد لله اخدت بالى من النقطه دى كويس......لانى لما جيت استلم شرطت ان يكون استلامى من المخزن يعنى اخدت بعضى ومسؤل التسليم للمخزن علشان استلم صح ولو فى حاجه لقدر الله مايفضلوش رايحين جاين
هنا بقى الموضع والمهم طبعا كنت مختار اللون الفيرانى......المهم فضلت منتظر لحد ماجبولى العربيه فضلت الف حواليها لاقيت فيها عيوب تقفيل (فبره الزجاج الامامى اللى جنب القايم مخلوعه ومش ملزوقه كويس........الرفرف الشما قدام مش مطبع وماشى مع القايم وطالع من مكانه .......العربيه فرشها متبهدل وتقفيله وحش من جوه........كافرات العجل تقفيلها سئ ومش مقصوصه عدل.......المهم قولتلهم عايز واحده غير دى........راحوا جايبن واحده تانيه ......المهم بردوا فلتها من بره تمام .....روحت مدور الموتور وجربت التكيف والانوار والكاسيت.........المهم وانا بجرب لاقيت ريحه شياط وحاجه بتتحرق وسالت المسؤل قالى لا دى ريحه من بره......قولت ماشى.......ركبنا وطلعنا بالعربيه من المخزن فى طريق المعرض لانهاء اجرات التسليم......وهنا بقى الكارثه واحنا ماشين وطبعا مسؤل التسليم سايق وانا جنبه ولاقيت صوت انذار كنت بحسبه انذار الحزام ولكن للاسف لاقين انذار الحراره ولاقيت الحراره فوق النص ب 3 شرط روحت مزعق وقايله يوقف فورا وفعلا ركنا ونزلت فتحت الكبوت وفتحت غطاء الريادتير وهنا الكارثه مالقيتش نقطه مياه.......المهم اتصل بالمسؤل عن المشاكل دى وجالنا فورا وجاب جركن مياه وفضلنا نحط مياه لحد مامش عايزه تتملى ....روحت بصيت من تحت لاقيت الردياتير مخروم من تحت وعمال ينزل كل الميه على الارض........المهم اخدوها تانى على المخزن واجلت الاستلام ليوم تانى يكون فى النهار علشان كان الليل دخل علينا......روحت تانى يوم وبصراحه كنت ناوى اخد فلوسى وكنت دافع كاش ......قعدت مع مسؤل المبيعات وفهمته عايز عربيه نمره واحد ومايكونش فيها اى عيوب تقفيل علشان ماعنديش وقت اضيعه ومنتعبش بعض.......المهم بكل احترام قالى حتروح المخزن دلوقت ونقى اللى انت عايزه.......المهم روحت وكانت نفسيتى مقفوله من العربيه دى خالص وكنت مستنى اى حاجه علشان اخد فلوسى .......انتظرت شويه فى المخزن لحد ماجبولى واحده تالته غير الاتنين اللى قبل كده......المهم قعدت افلى فيها وادور على غلطه من بره تمام ......تقفيل كافرات العجل تمام.......تقفيل فرش من جوه تمام..........البويه تمام.......كافر الشنطه من جوه والكبوت تمام........جيت بقى للاهم وقبل ماادور العربيه فتحت الردياتير وشيكت على الميه.....لاقيتها تمام.....سميت الله ودورت .......وقعدت اجرب التكيف والانوار والزجاج والكاسيت وكل شئ من جوه وسبتها تسخن شويه علشان اشوف الحراره لاقيتها تمام فى النص........ونزلت ابص على الموتور وهو شغال علشان اشوف فى زيت او تسريبات من عيوب التقفيل لاقيت الموضوع تمام وتوكلت على الله واخدتها على المعرض واستلمتها........عرضت كل شئ بما يرضى الله علشان محدش يذم فى العربيه بسبب عيب فى التقفيل......يعنى الحمد لله انا من ضمن الناس اللى بتشكر فى العربيه فى كل شئ ثبات سحب وموتور جيد مش حيبان عزمه الا بعد التلين الجيد والناس اللى بتقول العربيه تقيله على الموتور ...طب ماانت عندك الاوكتافيا تقيله على الموتور.......تكيف روعه شغلته 3 دقايق ووقفته علشان التلين......عفشه جيده ولاناعمه ولا ناشفه وفيش دبدبه .......صالون واسع ومريح .......شنطه واسعه........عيبها لو مركب حد معاك ورا وداخل على مطب لازم تاخده وحده وحده....يعنى تهدى وتقف قبل المطب وتجيب الاول وتطلع واحده واحده حسس على المطب.......والحمد لله فى توفقى لشراء العربيه بعد قلق وخوف كبير ......ولولا الله سبحانه وتعالى والاراء وتجارب بعض الاعضاء اللى خلتنى اخد بالى وافتش وافلى وادور فى العربيه عند الاستلام كان زمانى مع الاخوه اللى بيذموا فى العربيه ويلعنوها

[MIDOO10]

ربنا يباركلك فيها ويعطيك خيرها ويكفيك شرها

[نبيل عبدالرحمن]

ألف مبروك على العربيه وربنا يبارك لك فيها ويكفيك شرها
وكل الشكر لك لعرض تجربتك وياريت كل اللى عايز يشترى العربيه دى يستفيد من تجربتك فى الإستلام