استشارة عاجلة بخصوص لادا 1500 موديل 1975

[أسامة777]

السلام عليكم ،،
اخوانى وأصدقائى بالمنتدى اشكركم على نصايحكم اللى مش بتبخلوا بيها وجهودكم اللى بتقدموها
انا لسة عضو جديد بالمنتدى ولما شوفت امانتكم فى النصح وفى نفس الوقت خبرتكم حبيت اَخد رأيكم فى الموضوع ده
انا عاوز اشترى ـ باذن الله ـ عربية مستعملة بحد أقصى 15000 جنيه
وعمرى ما افهم حاجة فى العربيات من اى نوع ولا فى انواعها ولا فى الميكانيكا بتاعتها ولا السمكرة وحتى لسة متعلمتش السواقة بس الأسرة محتاجة عربية ضرورى جدا الأيام دى
وشوفت عربية لادا 1500 موديل 1975
بصراحة شكلها كويس نوعا ما وفرشها مقبول واستعمالها معقول
صاحبها طالب 15500 وقاللى ان كل اللى فيها ان الكامة محتاجة تتغير عشان بتعمل صوت لما المكنة تدور وان سعر الكامة دى حوالى 300 جنيه والحاجة التانية انها عايزة تاخد وش نضافة لو انا عاوز
أنا روحت مع واحد صاحبى واخدنا العربية وروحنا بيها لميكانيكى بس الدنيا كانت ليل والميكانيكى استخدم كشاف وبص عليها من ورا وقدام وصاحبى برده عمل نفس الكلام لانه بيفهم فى العربيات والميكانيكى وصاحبى رأيهم ان العربية حالتها العامة مش وحشة لكن فيها حاجتين : الكامة وحشة وعايزة تتغير (مع العلم ان انا مش عارف الكامة دى بتاعة ايه انا معرفش غير الكامة بتاعة الريسيفر بس) والحاجة التانية انها عاوزة سمكرة ودوكو فى حدود 3000 جنيه ، فبالنسبة للكامة اتفقت مع صاحب العربية ان هو حيغيرها قبل ما اخد منه العربية ، وبالنسبة للسمكرة والدوكو مش مهم اعملهم دلوقتى ، وانا لاحظت ان المرايا بتاعة الباب اليمين مش موجودة ، وكمان العربية مفيهاش أى كماليات (لا زجاج كهرباء ولا سنتر لوك ولا مروحة ولا تكييف ولا جنوط .... إلخ) ، وصاحبى قال له ان العربية فيها برومة من برة من الجسم فرد عليه صاحب العربية وقاله لأ العربية مفيهاش أى برومة اللى فى الجسم ده معجون مفرقع لكن مش برومة وخبطله جامد على الصاج اللى تحت المعجون المفرقع عشان يبين له ان مفيهاش برومة
وأسئلتى هى :ـ
ـ (1) ـ إيه رأى أصدقائى فى المنتدى فى السعر اللى حاطه صاحب العربية ليها وهو 15500 جنيه ، بعد ما شرحتلكم حالتها (مع العلم احنا مبصناش على عدادات ولا مساحات ولا أرضية عشان الدنيا كانت ليل) ، وممكن أوصل معاه لكام كسعر نهائى ليها .
ـ (2) ـ هى إيه العفشة بتاعة العربية دى : مكانها فين وفايدتها إيه فى العربية وأتأكد ازاى إذا كانت كويسة ولا لأ .
ـ (3) ـ هو قاللى انه مش هو مالك العربية وانه معاه توكيل من المالك الأول للعربية اللى مات من فترة ، وان الرخصة لسة فيها سنة على ما تحتاج تتجدد وهو حيسافر فأرجو ـ رجاء حار جدا ـ ان إخوانى يشرحولى بالتفصيل الممل إيه الإجراءات المطلوبة عشان أنقل ملكية العربية ليا ، وايه اللى ححتاجه من اوراق واجراءات وفلوس .
وشكرا جزيلا ليكم

[master2010]

اية يا هتدفع فى عربية موديل 75 مبلغ 15500 حرام هات ريجاتا بالمبلغ دا على الاقل عربية محترمة موديل 85

[عامر سعد]

غاليه خش دوبيزل حاتلاقي عربيات بالهبل وببلاش ياراجل 15 تجيب بيهم تمانينات

[AbOnOrA]

بالنسبة للسعر ممكن تلاقى احسن من كدة ان شاء الله مستستعجلش فى شراء المستعمل ابداً

وبالنسبة لنقل الملكية المواضيع ديه فيها شرح بالتفصيل وممكن تستخدم البحث هتلاقى مواضيع اكتر فى كل اللى يهمك ان شاء الله واهلاً بيك فى مصر موتورز نورت المنتدى

خطوات نقل ملكيه سياره مستعمله خطوه بخطوه - مصر موتورز مجتمع وسوق السيارات العربى

نقل ملكية السيارة من الالف للياء - مصر موتورز مجتمع وسوق السيارات العربى

خطوات نقل ملكيه سياره مستعمله من مرور الى أخر 2014 - مصر موتورز مجتمع وسوق السيارات العربى