عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

[didos]

انا معايا فيات 125 بولندى ستيشن عايز اعرف شوية حاجات
التابلوه زبالة واسمع ان فيه ناس بتغير تابلوه العربيات القديمة بتابلوه حديث مثلا لانوس او كورسا الخ من الحاجات اللى ممكن تلاقى فيها سعر لقطة عايز اعرف انواع التابلوهات اللى ممكن تمشى عندى وان امكن رانج السعر وايهما افضل التعديل ولا رش التابلوه (مع العلم انه متقطع ) ولا تنجيده ؟؟
اسمع عن البوجيهات 2و3 شمعة تنفع عندى ؟؟ وتفرق ولا عالفاضى ؟؟
بالنسبة للاكصدام انا عندى ورشة حداده كنت بفكر اعمل اكصدام عبارة عن ماسورتين 1/2 بوصة بحلية فى الاخر وانكله بس ينفع مع المرور ولا ممنوع؟؟
سمعت عن تعديل المقصات بسكاتره الموضوع ده صح ولا غلط وايه نظامه ؟؟
بالنسبة لتركيب تكييف (وسعت منى بس طلبت) ينفع وبكام وهل هيكون مؤثر ولا فاشل ؟؟
الطارة عندى ناشفة زى اللادا واحد صاحبى قاللى ننزل كفر الدوار نركبلها باور ب700 جنيه و التانى قاللى ركب علبة دركسيون ماذدا ب70 جنيه تبقى زى الباور ؟؟
موضوع انى ارش العربية لونين مخالف فى المرور ولا ينفع ؟؟

[Injection]

معلش يارجالة صاحب الموضوع شكله هرب, أنا هحاول أرد على أد معرفتى:-

معتز: صعب تلاقى الصور لأن العربية أساسا نادرة هنا أو بره, وصعب تلاقى حد بيعدل فيها من مالكيها, ولو عايز تعدل فى الفوانيس ممكن تفيم الفوانيس أسود أو أحمر أو تركب عدسات, أو حتى تغير اللمض ب ليدات, وشكلها هيبقى تحفة, وفى محلات كتير جدا بتعدل على فانوس أى عربية, وهتلاقى كتير فى الحرفيين وكمان فى منهم ليهم جروبات على الفيس.

سيف بدير: العربيات الواطية بيركبلها علايات ترفع العربية عن الأرض, وفيه ناس بتركب صدادات علشان المساعد مينضغطش لأخره وميوطيش العربية, والحاجات دى أى عفشجى بيعملها, بس عموما دى حاجات خطر على العربية والسوست لأنها بتزود نشوفية العفشة وبتتقلل عمر السوست والشاسيه وكمان بتقلل ثبات العربية جامد.

ديدوز: بص ياباشا أنا هحاول أرد فى حدود معرفتى

ممكن تركب علبة دركسيون عربية تانية, هتخلى دركسيون العربية أخف شوية عن الأول ومش هتلاقى مشاكل زى الباور على السرعات العالية, وطبعا التكلفة أقل سواء فى الصيانة أو التركيب.

التكييف عادى مفيش حاجة مستحيلة, بس بيعتمد على قوة الموتور وقدرته, وهل فى مكان لمستلزمات التكييف ولا لأ, وممكن تقعد تركب فيه كتير وكل شوية تلاقى مشكلة, مفيش مكان للطلمبة, هنجيب سمكرى يعمل قاعدة, وهكذا وكله بفلوسه, وأنا معايا لانوس وبمشى من غير التكييف وبفتح الزجاج, ومن رأيى الشخصى موضوع التركيب غير مفيد بالمرة طالما اللى بيركب ممرش على أيده عربيات زى دى وعمل شغل فيها ده غير أن السعر مبدأيا بالتركيب والمكونات هيتعدى 1000 جنيه.

البوجيهات 3 و2 شمعة بصراحة مالهمش أى لازمة وعن تجربة, كل اللى بيحصل أن لما سن من سنون البوجيه يبوظ الشرارة بتنقل للسن التانى, يعنى تعتبر للناس اللى بتكسل تغير بوجيهات فى مواعيدها, ده غير أن تمنها غالى, ممكن تجيب سلوك أعرض دى هتقلل مقاومة السلك للشرارة والعربية هتطلع شرارة أقوى وأحسن, وهتحرق بنزين بكفاءة أعلى.

التعديل على العربية خارجيا ممنوع وتركيب زوائد ممنوع تماما, ولو لاحظت هتلاقى معظم الماتريكس اللى فى الشارع معاليهاش زوائد, بس لو عايز تعمل توكل على الله, بس رأيى بلاش علشان المرور وعربيات الناس الغلابة, وغير كده أى خبطة هتسمع فى الشاسيه على طول.

رش العربية لونين مش مخالف طالما مثبوت فى الرخصة, غير كده مخالف, يعنى هتروح تثبت أنها راشة لونين كذا وكذا.

التابلوه عادى ممكن تجيب أى واحد وتركبه, بس محدش هنا هيقدر يقولك مقاسات التابلوه بتاعك ويجبلك تابلوه على قد العربية الا لو كان بيرضع بنزين وهو صغير, فده بتروح تعمله فى الحرفيين, السروجى بيقولك المقاس, وبتشترى تابلوه على قد العربية أستيراد أو أكبر من العربية وبيتظبط على مقاسه, ولازم كهربائى علشان يوصل العدادات والزراير, بس موضوع مكلف بغباء وهيقرب من 1000 جنيه أن مكانش أكثر.
رش التابلوه بيتعمل عند أى بوهيجى وبيرشه مط, والسعر حوالى 300 جنيه بالبوية والمصنعية ولو أتعمل صح شكله هيبقى تحفة, ده غير أنك ممكن تغير العدادات ونورها قبل الرش, الخ.
والأحسن, الأمكانيات المادية والصنايعى اللى هيعمل الموضوع ونضافة شغله هما اللى بيحددوا.

الأسكاتره دى معرفش فيها صراحة, بس متهيألى بتتعمل علشان تخفف الدركسيون شوية.

وأرجو أن أكون أفدتكم, وطبعا مع حفظ الألقاب.

[Injection]

يا أهالى الحى الكرام أنا هحاول أتابع الموضوع, واللى عايز يسأل عن حاجة يسأل وأنا هرد فى حدود معرفتى, وياريت باقى الأعضاء "ذوى العلم" يشاركوا ويجاوبوا علشان تعم الفائدة بين الناس.

وصبح صبح ياعم الحاج.

[kapreta]

معايا لانسر 98 زيتي و
عايز ابدل مكنتها الاصلية بمكنة مايفك بس هي المايفك 1500 ولا 1600 وسعرها كام
و لوتعرفوا حد يبدلها و ادفع الفرق
بس انا عايز المكنة بالفتيس و الدفيرة
و العفشة اللي تركب علي الميفك عفشة اية و بكام
و عايز 4 ابواب كهربا و مريات كهربا و بكام
اسف علي الاطالة بس انا عايز اعرف عشان احسب مزانيتي

[Injection]

أنا هحاول أجاوبك حسب معرفتى برضه:-

ال1500 ده موتور 2 كامة عادى وسعرها حوالى 2000 الى 2500 من غير جير بوكس, يعنى هتدخل فى 3000 جنيه بالجير بوكس وبتطلع 110 حصان.

ال1600 موتور مايفك سعره حوالى 7000 جنيه بكل حاجته مع العفشة, وبيطلع 175 بس المفروض ميشتغلش على بنزين أقل من 95 فخلى بالك من النقطة دى.

العفشة بتاعة المايفك هتاخدها معاه, بس ممكن تجيب مساعدين كونى أو EIBACH وتبقى ماشى بعفشة سباق بس سعر العفشة حوالى 4000 جنيه

والمايفك هيحتاج فرامل أقوى و شداد شاسيه وجنوط علشان تستفيد منه وتعرف توقفه عند حده.

ال 4 أبواب أنت لوعايز زجاج كهرباء بس كل الى أنت محتاجه البانل أو اللوحة البلاستيك بالزراير وسعرها فى حدود 200 للواحدة لكل باب من محل حاجات أستيراد, و 4وحدات رفع لكل زجاج الواحدة تقريبا هتبقى فى حدود 70 الى 100, وزيارة لكهربائى نضيف وشوية سلوك وبس.
أما الباب كله ده موال فى حد ذاته وسعره هيجيب 1000 للواحد وأحتمال يعدى كمان.

المرايات الكهربة صعبة حبتين لأنى معتقدش فيه مكان للزراير بتاعتها فى التابلوه.

ونزولة للحرفيين وكل حاجة هتتحل بأذن الله.