تقرير عن نيسان صني 2013 سوبر صالون بالصور

[eng.noureldin]

المشاركة الأصلية كتبت بواسطة abdohtaby اقدم لكم تقرير عن نيسان صني سوبرصالون 2013 : مبدئيا انا لسة عامل صيانة الألف (المجانية) وكنت مأجل التقرير دة بعد ما اعملها علشان اقدر احكم عليها صح نسبيا نبتدي على بركة الله 1-الشكل الخارجى : هو مش عاجب ناس كتير بس ده اذواق لكن بالنسبالى الشكل كويس جدا بالذات السوبر صالون مع الاسبويلر الخلفى والجنوط والفاميه الخلفى 2-الشكل الداخلى : تعتبر فقيرة شوية من جوة او (مش شبابية اوى) لكن مش وحش لكن التقفيل كويس جدا 3-الراحة فى الجلوس والوسع الداخلى : طبعا مش هتكلم فيها كتير غير انها اوسع عربية ممكن تشوفها والكراسى قعدتها كويسة جدا بس لسة محتاج اعملها فرش جلد علشان تظبط اكتر 4-الموتور والسحب : الموتور صوته هادى على ار بى ام 2 بعد كدة بيبقى صوته مسموع لكن مش مزعج والسحب ما شاء الله عاجبنى جدا واستجابة دواسة البنزين ممتازة جبت بيها 150 بسهولة وكانت عايزة تسحب اكتر بس الطريق ما كانش مساعدنى 5-الثبات : أقصى سرعة جبتها بيها 150 زى ما قولت وكنت مسيطر عليها جدا ومش حاسس انها خفيفة خالص وكانت ثابتة جدا معايا (بس على فكره موضوع الثبات ده نسبى من واحد للتانى على حسب هو متعود على ايه لكن بالنسبالى كانت ثابتة جدا) 6-العفشة : الصراحة مش عجبانى وتعتبر هى الحاجة الوحيدة اللى مديقانى فى العربية حاسسها ناشفه مش ناعمة زى مالناس بتقول انا معايا شاهين ومش حاسس بفرق تقريبا اولو فى يبقى يسيط جدا ومش ملحوظ وقولتلهم يكشفو عليها فى الصيانة وطلع مافيهاش حاجة (وممكن برده يكون الموضوع نسبى للناس بس لو عفشة الصنى كده ناعمة ومتحسسكش بالمطبات يبقى كدة الشاهين ناعمة برده) 7-عجلة القياده : عاجبنى اوى الباور الكهربا بتاعها هو خفيف اوى فى السرعات الواطية وبيتقل مع السرعة وسهل اوى انك تتعود عليه ده و المالتى فانكشن والبلوتوث شغال زى الفل الحمد لله مفيش مشكلة 8- الفرامل : انا مجربتش اقفش مرة واحدة الصراحة بس انا بحس بالأمان من ناحية الفرامل ولما بدوس عليها بحس بالقوة وانها ممكن تلحقنى لو حاجة حصلت فجأة لا قدر الله (اه صحيح مرة سمعت صوت صفارة خفيفة وانا بفرمل بس ما اتكررتش تانى ولما رحت الصيانة قلتلهم المهندس قالى لو اتكررت معاك تانى كتير والصوت كان عالى يبقى هيركبولها صاجة التيل الخلفى فى الضمان وقالى ده تعديل نزل للعربية لو المشكلة دى ظهرت بوضوح) 9-الكاوتش : لامؤاخذة فى الكلمة زباااااالة بيلم زلط بطريقة بشششششعة وينطرها جوة الكارتيرة دة غير ان فى ناس قالتلى ان الكاوتش محتاج يتعرض عن كدة و قالولى هو اللى مدينى الاحساس بنشوفية العفشة دى ولو اتغير هيفرق جامد (يا ريت لو حد غير الكاوتش وعرضه يقوللى ايه اخباره معاه) 10-استهلاك البنزين : ممتاز ولسة الاستهلاك بيقل كمان بس بصراحة محسبتوش لكن اول ما جبتها كان العداد مدينى متوسط استهلاك 13.5 دلوقتى وصل 8.6 بس انا مابثقش اوى فى القراءات دى لأنها بتتغير كل شوية على حسب طريقة سواقتك 11-الكاسيت والصوت : الكاسيت انا عارف انه ممتاز وهو اللى بينزل فى التيدا والجوك والقشقاي والسماعات كويسة لكن لو اتغيرت هيبقى احسن بكتيير مع الكاسيت ده وبالمناسبة هو فيه aux بس مفيهوش usb 12-اماكن التخزين : من نقط ضعف العربية ومفيهاش غير درج التابلوه الصغير والحته الفاضية اللى فوقيها والحته الصغيره قوى اللى جنب فرامل اليد ومفيش طفاية سجائر (أنا ما بدخنش بس الطفاية ممكن تحط فيها عملة او اي حاجة صغيرة) لكن فى حوامل الأكواب قدام وورا ممكن تستفيد منهم وتحط اى حاجة 13-التكييف : ما جربتوش غير وانا بستلمها ومرتين كمان لمدة لا تزيد عن 5 دقائق وكنا دخلنا فى الشتا فسقعت جدا والمروحة كانت على 1 عشان كدة مقدرش احكم عليه مظبوط لكن الأعضاء اللى جربوه فى عز الحر بيقولو عليه ثلاجة 14-الدلايات : مش عارف ليه مش منزلينها بدلايات (الحتة البلاستيك اللى بتبقا ورا الكاوتش عشان التراب والميه) ومش موجودة فى التوكيل لكن انا شايف انها مهمه جدا ومش عارف لو جبتها من اى حد بتاع اكسسوارات هتبقى مظبوطة ولا لأ ؟؟ التوكيل بيقولى مينفعش !! اولا: المواصفات الميكانيكية هى نفسها المتوفرة فى فئة الEX بنسختيها المانيوال والاتوماتيك مع الفارق ان السوبر صالون ستتوفر بناقل حركة اتوماتيك فقط . ثانيا: الكماليات وتتمثل الاضافات فى فئة السوبر صالون الجديدة فى الآتى: خارجيا * جنوط سبور مقاس 15 لاضافة المزيد من الثبات والثقة على الطريق * سبويلر خلفى أعلى الشنطة مزود بنور توقف وسطى لإعطاء شكل جمالى للسيارة لا سيما اضافة ثبات وتحكم اكثر على الطريق خاصة على السرعات العالية جنبا الى جنب مع الخطوط الانسيابية فى مقدمة وسقف السيارة * مرايات ضم تغلق وتفتح أتوماتيكياً * تعتيم (فاميه) للزجاج الخلفى والزجاج الجانبى الخلفى فقط كما سبق وطرحته نيسان فى فئة الهاى لاين من الصنى الشكل القديم داخليا * طارة مالتى فنكشن وتحكم وظائف الكاسيت عن بعد * بلوتوث للتليفون * مقابض ابواب نيكل مع تطعيمات بشكل الكروم تعطى لمسة تميز ورقى للصالون الداخلى * فرش الأبواب الداخلى به جزء قماش وليس فيبر بالكامل مثل الـ Ex * عدادات رياضية وليدات متطورة وقد اضافت التطعيمات الداخلية مزيد من الاناقة لصالون السيارة كما اضافت التطعيمات الخارجية شكل اكثر تميز وجمالا للسيارة نيجي للصور: صور السياره من الخارج: ******************** صور السياره من الداخل: ******************** يارب الموضوع يعجبكم تحياتي :lov eu: (بعض الاشياء منقوله)

شكرا جدا علي الموضوع
يعني في رأيك العربية كويسة علي سعرها الحالي 117000
مش كتير يعني
وسؤال أخير استلمت بعد قد ايه من الوقت ومين اكتر الاماكن الكويسة للتسليم والشراء

[esam_ayad]

شكرا يا باشا علي التقرير
العربيه علي فكره ابتدت تنتشر هنا في الكويت.
لكن انا عايز طلب منك يا باشا
ياريت تصورلنا صوره العفشه بتاعة العربيه علشان انا دورت عليها علي النت ومش لاقيها
ولك جزيل الشكر.

[alexpower]

والله السعر دلوقت ولع
بقت 124 عند المصريه
هى مش بتيجى بسنسور خلفى ولا لأ اصل انا شوفتها بالخليج بها سنسور

[ابو الفضل]

انا اشترتها ex بسعر 115 الف والسوبر كانت عامله 128 الف هى العربيه حلوه بس انا ملاحظ استهلاك البنزين عالى ( بس بيقولوا عشان لسه مش ملين ) انا عملت بيها 600 كيلو حتى الان
بس العقشه فعلا حاسس انها ناشفه شويه والتكيف ضعيف شويه
بس هشوف التوكيل مع صيانة الالف كيلو عشان اسال عن الموضوع ده
وسالت عن تفعيل الانذار فقالوا فى مودرن موتورز انه بيتفعل بسعر 220 جنيه