أدب الرحلات

[خالدخليفة]

فين مواقف السفر بتاعة الأعضاء والا كله بيسافر من غير اى مشاكل او حاجة

المشاركة الأصلية كتبت بواسطة خالدخليفة الحكاية دى تحفة ركبت الفرنساوى بتاع الساعة 2 وربع الضهر على اسكندرية وشوية ولقيت رئيس القطار رايح جاى رايح جاى وباين عليه الفزع مالك ياعم سيد قال مفيش مفيش ازاى وانت عمال تنزل ميه من كل حتة رغم التكييف الساقع فقال سيبنى دلوقت المهم وصلنا اسكندرية فسالته فقال عربية1(درجة اولى ) التكييف فيها باظ بعد شبرا وبقت فرن فانا قلت له وايه يعنى ايه الجديد فقال الجديد ان فى وفد يهودى فى العربية حوالى 6 افراد وجايين من اسرائيل وقررو يركبو القطر لان معندهومش سكة حديد ولما التكييف عطل بقو يرطنو باللغة بتاعتهم ( العبرية) وخايف حد يعرف هما مين وجنسيتهم ايه ممكن يعمل فيها وطنى ويعتدى عليهم ويعمللنا مصيبة فى القطار فقلت له كنت قول ياراجل واانا هخدمك فقال كنت هتعمل ايه فقلت كنت هعورهم انا فضحك وقال متورينيش وشك فى السكة الحديد تانى ههههههههههههههههههههههههه ههههه اكيد ده كانت هتبقي فضيحته علي ايدك ولو كان حصله حاجه كان زمانك انتا السبب ودى اتحف منها كنت راكب قطار النو م وقطار النوم ده مملكة ولاتحس انك فى قطار المهم صحيت من النوم قمت من على السرير جنب منى الحوض غسلت وشى وقررت اغير هدومى والبس لبس خروج واروح الكافتيريا بتاعة القطار و دى زى الكوفى شوب كده ترابيزات وكراسى ومعيشة المهم وانا بغير هدومى وواقف بالغيار الداخلى فوجئت بواحد بيخبط لى على الشبالك وراكب حماره وبيقول لى بصوت عالى عيب كده يااستاذ اتارى القطار واقف على رصيف محطة بتاع قرية لان فى اصلاحات فى السكة وانا مش واخد بالى انه على رصيف محطة غير لما لقيت صاحبنا ده واقف بحماره قصادى وانكسفت جداااااا من نفسى ولبست هدومى بسرعة واعتذرت

ههههههههههههههههههههههههه ههههههههههههههه


مش تخلي بالك يا معلم بس كويس ان اللي كان راكب الحمار ده معهوش موبيل بكاميرا وكان زمانه صورك وسيحلك علي الخط كله ههههههههههههههههههه

المشاركة الأصلية كتبت بواسطة خالدخليفة فين مواقف السفر بتاعة الأعضاء والا كله بيسافر من غير اى مشاكل او حاجة

هو في حد بيسافر زيك يا معلم

انا هحكيلك موقف في الشغل عندي لسه حاصل امبارح

قاعدين في الشركة وفي امان الله ولا بينا ولا علينا ولاقينا كلب دخل علينا في الشركة وكان في واحد زميلي قاعد معايا في المكتب اول ما شافه لاقيته في ثانيه نط فوق كتافي وكان حته منظر كان يهلك اي حد من الضحك

[خالدخليفة]

طب محدش بيسافر غيرى طب حتى شجعونى بالردود بدل م انا بحس انى بكلم نفسى

ايه يا عم انتا شايفني شفاف ولا ايه ما نا بشجعك اهو

ارقص يا خالد ارقص ياخالد ارقص ياخالد

[خالدخليفة]

المشاركة الأصلية كتبت بواسطة corsair ايه يا عم انتا شايفني شفاف ولا ايه ما نا بشجعك اهو ارقص يا خالد ارقص ياخالد ارقص ياخالد

طب فين البطيخة ياعم كروزير
ماشى نكمل
دى بقى مباراة قانونية فى الجووون
القطار العادى اللى من غير شبابيك ده اول م طلع كان اسمه المميز لانه كان بالحجز تروح الشباك تدفع ربع جنيه زيادة على تمن التذكرة وتاخد رقم كرسى ورقم عربية زى المكيف بالظبط (طبعا مع الوقت وعدم تطبيق الكلام ده لم يبقى الا الاسم فقط وهو المميز وحتى فى ناس مش عارفه هو مميز فى ايه ولا ليه )
المهم
راكبين ذات مرة (حلوة ذات مرة دى ؟؟) وركب شخص منوفى لذيذ كده وفاهم وقاطع تذكرة برقم كرسى وراح للكرسى لقى واحد قاعد عليه بيقول له بادب / الكرسى بتاعى بعد أذنك فشوح له بايده وقال له غور من هنا والراجل المنوفى مكدبش خبر وطلع على شرطة القطار وعلشان بختهم الأسود كنت انا واقف جنبهم والراجل بيقول فى واحد قاعد مكانى فبص له ببلاهة كده وقال له /عاوزنى اعمل لك ايه هو علشان دفعت لك ربع جنيه هتقرفنا ؟ والراجل م ردش وهنا انبريت له (حلوة انبريت له دى ؟؟؟) وقلت له / اومال مهمة سعادتك فى القطر ده ايه ؟؟ انك تاخد جوز جنيهات من كل بياع وبس فرد بقلة ادب / لا مهمتى اقعد الركاب واجيبلهم الرضعة روحت مزعق فيه وقلت له / مهمتك حفظ الأمن والنظام داخل القطار يارجل الامن وفى واحد واكل حق واحد هتقوم تجيب له حقه والا اقول له يعمل ايه فقال بعند / مش قايم واعلى مافى خيلك اركبه قلت له ماشى ورحت باصص للراكب وادام الشرطة والناس والكل سامع وقلت / انت نازل فين فقال ايتاى البارود قلت حلو تنزل ايتاى البارود وتعمل محضر عند القضائى بس انت قتيل التذكرة اوعى حد ياخدها منك لانها عقد الرحلة بينك وبين السكة الحديد طبعا هيرفض علشان ميأذيش زميله فتطلع على المستشفى الميرى بايتاى البارود وتضرب ايدك ف جيبك وتدفع 20 جنيه وتجيب تقرير طبى انك رجلك بتوجعك ومتقدرش تقف عليها اكتر من 10 دقايق متواصلة وانك وصلت المستشفى فى حالة صعبة بسبب انك وقفت على رجلك مدة تزيد على الساعة وبعدها تطلع على قسم الشرطة التابع له محطة ايتاى البارود ومعاك التقرير الطبى وتعمل محضر تتهم فيه كل افراد شرطة القطار رقم كذا والذى قمت بركوبه من محطة قويسنا متوجها الى ايتاى البارود بالتقاعس عن عملهم مما تسبب فى ايذائك بدنيا ونفسيا طبعا هيبعتوله استدعاء هيطنشه والمحضر هيروح النيابة فى النيابة تطالب بتعويض 5000 جنيه والقاضى هيخليهم 500 كويسين؟؟ قال / حلوين قلت له /صاحبنا اللى قاعد بيسمعنا ده هيحصل معاه حاجة من 2 يااما النيابه هتبعت له استدعا وهنا ميقدرش ميروحش او مش هيروح وده هيبقى دليل ضده فى المحكمة وساعتها هينطس حكم بالسجن اقله شهر وتتحط فى ملفه وهيتحاسب اداريا وثانيا هيضيع يومين سفر رايح جاى من رصيد اجازاته طبعا لان مفيش نيابة الجمعه مرة فى النيابة ومرة فى المحكمة واذااتحكم عليه هيستانف وهكذا هتصرفه فلوس للمحامى اللى رايح يدافع عنه وهتاكل من رصيد اجازاته السنوية بدل م يريح فى البيت
وبضرب عينى لقيت القطار اللى كله كان هيصة ترمى فيه الابرة ترن وكلهم ملمومين حوالينا وانا بشرح للراجل بيسمعونى
راح فرد من افراد الشرطة قام وقال ده انت ابليس وبص للراجل وقال له تعالى ورينى الكرسى بتاعك قلت ابليس اللى بياخد مرتب نظير عمل مبيعملوش المهم وانا نازل لقيت صاحب الكرسى بيشاورلى من الشباك وعمال يدعيلى و كل افراد الشرطة باصين لى ونفسهم يخنقونى
ومرة ركب معانا مرتضى منصور ايام انتخابات نادى الزمالك اللى فاز فيها كمال درويش وطول الطريق لحد م نزل طنطا بلد حبيبه شوبير وهو عمال يحكى بطولاته وهيصة فى القطار وكانت سفرية م يعلم بيها الا ربنا
من الطرائف بقى
كانو بيصورو فيلم داخل محطة القاهرة المهم انا رايح اركب ولقيت كردون وكاميرات وممثلين المهم فيهم واحدة بصت لها وبشبه عليها وهيا بصت لى وابتسمت وقالت لى اهلا بيك وقلت مين دى ياعبد الرحيم مين دى ياعبد الرحيم مين دى ياعبد الرحيم وهدانى المخ الصعيدى انها ممكن تكون كانت زميلتى فى الجامعه وقلت ياواد عيب دى قالت لك اهلا بيك يعنى تعرفنىفروحت اسلم عليها سلمت عليا بقول لها انتى مين بصت لى بغيظ وقالت فى حاجة ؟ فقلت ولازال المخ الصعيدى شغااااااااااااال انتى غالبا مديحة بتاعة شبرا فقالت لى اتفضل روح شوف طريقك فقلت ولازال المخ الصعيدى شغااااااااااااال تبقى ايمان بتاعة مصر الجديدة فقالت ياعم ابعد عننا بقى وصرخت فين الامن ولقيت شوية تيران لابسين بنى آدمين جايين جرى صرخت فيهم انتو فين ياحيوانات وهما نازلين اعتذارات اسفين ياهانم ولقيتهم اتلمو حواليا فحسيت نفسى عبارة عن فار واقف بين 4 عمارات هيقعو عليه فى اى لحظة فقلت وانا عندى بقايا شجاعة وبتهور أحسد عليه / فى حاجة قالولى انت مش عارف دى مين فقلت بثقة عجيبة دى غالبا كانت زميلتى فى كلية الحقوق جامعة عين شمس وبالأمارة خريجة سنة1987 وهنا انفجرت غوروه من هنا فواحد فيهم حط ايده على كتفى وحسيت ان جبل المقطم واقف على كتفى وقال دى الممثلة فلانة الفلانيه (الكارثة انى ناسى اسمها دلوقت لانى مش متابع جيد للمسلسلات والافلام غالبا منى زكى او حنان ترك مش فاكر لان الكلام ده سنة 2000 ومكانوش مشاهير ااوى كده) فقلت له اهلا وسهلا معلش انا اسف كنت فاكرها زميلتى اصلها شبه ايمان ... وقبل م اكمل فقال امشى بقى متخليهاش تقول لنا اضربوه وانت مش هتستحمل ومشيت وانا عامل شجاع لكن من جوايا كنت بموت وايده اللى حطها على كتفى وجعتلى كتفى لمدة اسبوع