عاوز اجيب عربية مستعملة تنصحونى باية

[مهند سالم]

المشاركة الأصلية كتبت بواسطة dr_maged السلام عليكم اولا احب اهنى كل القائمين على المنتدى هنا انا لسة مسجل فيه بقالى حوالى نص ساعة وبصراحة من كتر اهمية المواضيع اللى فيه مش عارف اقرى اية ولا اية وارجوا ان تتقبلونى عضو جديد معاكم وابقى واحد منكم ثانيا انا ناوى اجيب عربية ودى هتكون اول عربية ليا ومش عارف اجيب اية بصراحة بس انا محكوم بالمبلغ اللى معايا وهوه من 20 الف الى 25 الف مش اكتر من كدة فياريت تنصحونى اجيب اية بالمبلغ ده واية احسن وانسب حاجة ممكن اجيبها وحاجة تحببنى فى العربيات والسواقة ومكرهش نفسى بسببها وشكرا ليكم

بص يا سيدي، المبلغ إلا معاك ده مش هيجيب حاجة تسعينات كويسة إلا العربيات الهاتشباك الصغيرة، زي السوزوكي ماروتي وكدة، لكن تجيب عربية ثمانينات كويسة ، زي البيجو 504، أو فيات 131، أو ريجاتا، أو مازدا 323، ولو عرفت تجيب هيونداي إكسيل يبقى كويس جدا، لكن عموما شرا المستعمل مش زي الزيرو أبدا، يعني السوق إلا بيحكمك، ببساطة اللقطة إلا بتقع قدامك هي إلا بتحكمك، لأن المستعمل الغش فيه كثير، وخصوصا بالنسبة يعني لواحد خبرته قليلة، فممكن تشتري عربية ما كانتش تخطر على بالك لمجرد إنها بحالة كويسة وصاحبها ثقة مش هيضحك عليك يعني، فعموما نصيحتي اسأل كثير ودور كثير، وحاول دائما وإنت بتشتري يبقى معاك حد ثقة وفاهم كويس، والعربية اللقطة إلا تقع قدامك هي أولى بفلوسك، يعني تبقى فبريقة وحالة الماتور والعفشة كويسة، لكن مبدئيا الموديلات إلا سبق وكتبتها لحضرتك هي أنسب حاجة ليك، بس تلاقيها بحالة كويسة، وده هو الأهم، عموما أقواهم ال 504 طبعا، لكن عيبها إنها 2000 سي سي، يعني هتبقى مكلفة شوية في التجديد والترخيص والضريبة وكدة، وأفضلهم من حيث الانتشار ورخص قطع الغيار الفيات 131، ودي عربية سمعتها ممتازة، وأفضلهم من جهة النعومة والسحب الكويس وقطع الغيار المعمرة مازدا 323، أما الهيونداي إكسيل فدي فئة أعلى ، يعني لو وقعت على وحدة كويسة بالسعر ده هاتها ، وتقبل مروري.

تجيب شاهين موديل 93 او بيجو 504 او اكسيل او 131 او ريجاتا زي ما تحب ولكن احظر وخلي بالك النصب كتر اوي اليومين دول في المستعمل وربنا يسترها عليك

[dr_maged]

طيب يا جماعة انا فى واحد اللى معايا وبيفهم فى المواضيع دى بيقولى المبلغ ده هيجبلك لادا بحالة كويسة اوى ودى احسن حاجة ممكن تجيبها بس انا مش بحب ال لادا بس اقتنعت بكلامة علشان هوه بيفهم فى المستعمل كويس وانتم محدش منكم جاب سير ال لادا خالص فى اللى قولتوا عليهم

فاية رأيكم فى الكلام ده لو جابلى لادا لقطة استعمال نضيف اوى اخلص فيها ولا اقولة يشوفلى حاجة من الموديلات اللى ذكرتوها انتم معلش هتعبكم معايا

[dego_story]

حضرتك ياباشا قولت نفسك فى عربيه تحببك السواقه وتريحك فكل اللى رد عليك ماحطهاش فى الاختيارات بص اللادا عربية حمارة شغل وقطع غيار رخيصة وكل حاجة بس مش مريحة فى السواقه يعنى دا الفيات131 احسن منها دا من رائ الشخص وعلى فكرة زى ماقلولك السوق بتاع المستعمل بيكون فى حاجات لقطة يعنى انا قدامى شفت فولكس جولف2 وبجد متظبطة ومحترمة جدا وبعها ب26 بس فدور كويس ان شاء الله بس اهم حاجة تركز على الحاجة اللى عايز تشتريها عشان مادوخش وانت بتشترى يعنى لو عايز للادا دور على اللادا وربنا معاك ان شاء الله ولو فى اى استفسار تحت امر حضرتك

[مهند سالم]

المشاركة الأصلية كتبت بواسطة dr_maged طيب يا جماعة انا فى واحد اللى معايا وبيفهم فى المواضيع دى بيقولى المبلغ ده هيجبلك لادا بحالة كويسة اوى ودى احسن حاجة ممكن تجيبها بس انا مش بحب ال لادا بس اقتنعت بكلامة علشان هوه بيفهم فى المستعمل كويس وانتم محدش منكم جاب سير ال لادا خالص فى اللى قولتوا عليهم فاية رأيكم فى الكلام ده لو جابلى لادا لقطة استعمال نضيف اوى اخلص فيها ولا اقولة يشوفلى حاجة من الموديلات اللى ذكرتوها انتم معلش هتعبكم معايا

بص اللادا مش وحشة، وفي ناس بتحبها جدا، لكن فيها عيوب، زي الخشونة ونشوفية العفشة، وسمعت إن قطع غيارها الجديدة مش كويسة، يعني حضرتك هتعتمد على حاجة الاستيراد عشان تجيب حاجة روسي كويسة، لكن عموما اللادا عربية بتاعت شغل، ودي حاجة مهمة جدا إنت عايز العربية ليه؟
لو عايز العربية عشان إنت موظف هتروح الشغل وترجع تجرشها يبقى هات لك عربية ناعمة، سي سي متوسط، يعني في حدود 1300 سي سي عشان ما تاكلش معاك بنزين، وتريحك.
أما لو عايز عربية هتحمل فيها وتسافر وتروح بيها مشاوير بعيدة يبقى ابعد تماما عن الفيات - ما عدا الفيات 132 لأنها بتاعت شغل وبتاكل بنزين- ويبقى معاك أفضل خيار بيجو 504، وطبعا اللادا، وطبعا الفولفو، بس الفولفو مكلفة وبتاكل بنزين لأن السي سي بتاعها عالي، بس حمار شغل ومريحة جدا في السفر وواسعة من جوة، تحس إنك راكب مرسيدس.
لكن أنا بصراحة بأفضل للموظف إلا مشاويره على الأد، يا إما فيات يا إما ياباني لأن الفيات قطع غياره متوفرة وكل الناس بتشتغل فيه، والياباني كذلك، والياباني فيه ميزة في قطع الغيار، قطعة الغيار الياباني لو ما لقيتهاش هتلاقي أكيد التايواني أو الماليزي أو حتى الصيني، يعني عندك دائما بدائل في قطعة الياباني وعلى قد فلوسك لو الياباني غالي عليك تجيب التايواني تقريبا بنصف السعر، او الصيني تقريبا بربع أو ثلث السعر، ومحلاته كثير ومنتشرة في كل مكانن ده غير طبعا حاجة الاستيراد
وعلى فكرة إنت ممكن تجيب عربية تويوتا كرولا تمانينات كويسة في حدود 25000 بس نصيحتي ما تستعجلش، وحاول في حتة ياباني، لو لقيت حاجة ياباني تمانينات فبريقة هتستريح جدا، سواقتها سهلة، ناعمة، سحبها جميل، قطع غيارها متوفرة، بس اوعى تجيب داتسون قديم أو مازدا 626، 929، أو هوندا أكورد، طبعا مش عشان هم وحشين لأ طبعا، عشان قطع غيارهم صعبة شوية، عندك نيسان صني، أو مازدا 323، أو هوندا سيفيك -وإن كانت الهوندا عموما قطع غيارها غالية شوية وشحيحة- وزي ما قلت ليك لو لقيت كرولا تمانيات بحالة حلوة يبقى ممتاز...
أما غير الياباني والفيات ففي عربية كويسة جدا بس صغيرة وهاتشباك وعايزة واحد موظف واستعماله نظيف، وهي ماركة ماليزي جديدة شوية في مصر، بس أثبتت كفاءة والناس بتشكر فيها، وهي البيرودو، لو عرفت تجيب حاجة فبريقة بيرودوا كانشيل يبقى كويس جدا، بس الأول اسأل على أماكن قطع غيارها، لأني سمعت إنها متوفرة في دمياط، أما القاهرة فما سألتش، والبيرودو بق هتجيب ب25000 عربية أواخر التسعينات فبريقة، وممكن موديل 2000 أو 2001 كمان، بس هي صغيرة شوية بيتهيأ لي 850 أو 900 سي سي، بس قطع غيارها رخيصة وكويسة.
وعلى فكرة إنت ممكن تجيب عربية جولف ألماني كويسة بالمبلغ ده، وهتبقى في أوائل الثمانينات، بس حضرتك عارف الألماني مكلف شوية، بس الجولف طبعا ولا كلمة.
ولو عرفت تزق المبلغ شوية وتطلع للتسعينات بحتة هيونداي كويسة أو دايو لانوس يبقى ممتاز، وهتبقى إمكانياتها أعلى، ولو حبيت تبيع هتتباع معاك بسهولة.
وبرده ما تستعجلش، واعرف إن كل يوم زيادة هتسأل فيه هيوفر ليك فلوس، ويخليك واقف على أرض صلبة وإنت بتشتري. وتقبل مروري.