شرح لبعض مكونات حوص الريجاتا - تابع لرابطة الريجاتا

[NicEgypt]

السلام عليكم ورحمة الله ...
الموضوع يتبع لموضوع رابطة الريجاتا للاحياءها وتحديثها بشكل افضل . هبدء انهاردة نشرح اجزاء
حوض الريجاتا بالصور .. الكثير من ملاكها لا يعلمون ما بداخلها سوى الموتور .. لذا سنتعرف سوياَ بمشيئةالله على اجزاءها واحدة تلو الاخري ...



هقسم الشرح لنقاط علشان اسهل توصيل المعلومة : رقم 2 فى الصورة :

اسمها عـمة الزيت

وظيفتها : تـنقية الهواء قبل ميدخل للكربراتير .. وهى اختراع ممتاز .. بس عايزة متابعة ونضافة على فترات متباعدة

طريقة عملها بالتفصيل : فية ماسورة كاوتش المفروض انها تكون عندك .. لو مش عندك تبقى ضاعت .. الماسورة دى واصلة ما بين عمة الزيت .. وعمة الكربراتير " اللى هو فية فلتر الهوا اللى فوق الكربراتير " لما حضرتك بتمشى بالسيارة الهواء بيدخل من ممر ف علبة الزيت .. بيعدى على زيت جواها حضرتك بتحطة وبتغييرة على فترات متباعدة وهو عبارة
عن زيت موتور .. الهوا بيدخل ع الزيت .. الزيت ياخد التـراب والشوائب وبعدها يطلعة ع الفلتر .. الفلتر يمسك شوائب ثم الى عمة الكربراتير .. العمة جواها فلتر هوا صح ؟ ... الفلتر ينضف الهوا تانى .. ثم يدخل الى باب الكربراتير بكل سلامة وبكل نظافة .. وبكدة بتحافظ على نضافة الكربراتير .. حتى لو استخدمت العربية فى اجواء فيها تراب كالصحرا العلبة دى اول حاجة شغلتها ف العربية .. طبعا بتريحك من نظافة الكربراتير كل شوية .. لان الكربراتير مقرف ف نضافتة وبالتالى مش بتحتاج تنضف الكربراتير ... وظيفة اخيرة ليها وهــى : كــتم صوت الموتور .. مش بتكتمة بالمعنى المقصود لاء
بتخلي الصوت هادى وحلو ومش مسموع .

عيـوبها : ملهاش عيوب .. ولو مش راكب عليها الماسورة الكاوتش عادى .. يعنى لو مش شغالة عندك او مفصولة لعدم

وجود الماسورة الكاوتش عادى خالص مفهاش مشاكل .. بس غير فلتر الهوا كل 5 شهور مثلا .. بدل مرة كل سنة

يعنى مش هيحصل حاجة متقلقش .. فلتر الهوا موجود وهيقوم بوظيفتة بس هيلم تراب بسرعة .

* رقم واحد فى الصورة وهو" الاسبراتير " الكترونى .

وظيفتة : توصيل الكهرباء لبوجيهات الموتور

مميزاتة : الاسبراتير الالكترونى حلو انة مش محتاج ظبط .. ومفهوش ابلتين ولا كوندنسر وبيظبط الكهربا لوحدة بشكل حلو

عيوبة : لة عـــيب قـــاتل جداَ ... ان المشط بتاعة لما بيتحرق ويطير ملوش اي علامات .. يعنى تبقى ماشى فى امان الله بالسيارة .. وهوب ... العربية تقف .. مهما تزق مفيش .. العربية هتعطل لعدم وصول كهربا للبوجيهات !

الحل : كـل الناس اللى قابلتها مغيرة من الالكترونى لعادى ابلتين وكوندنسر ... وعربيات ريجاتا كتير شوفتها مغيرة وانا عندى باردو اسبراتير عادى ابلتين وكودندنسر .

سبب تغيير الناس للعادى من الالكترونى : ان العادى لة علامات واضحة جداَ بتوضح انة قرب من التلف .. زى مثلا يطلع مدافع من الشمكان .. الموتور يـتــلــت " يعنى يشتغل 3 بوجيهات بس ويقطع واحد " ... وهكذا ..

انما الالكترونى عيبة القاتل انة غـدار ف ساعتها ... لو جبت مشط وشلتة معاك ف الشنطة بحيث لما الالكترونى يضرب مشط تركبة .. ردي لحضرتك مع كل اسف .. مش هـتعرف تركبة !! ولا انا بعرف اركبة اللى بيعرف الميكانيكى للاسف . وبياخد وقت شوية .. انما الاسبراتير العادى .. بتفك الوش .. وبتركب الابلتين والكوندنسر وتقيس بحرص ولو بورقة من الشارع الابلتين دور العربية دارت مبروك .... أو .. اول ما اي علامة من علامات التلف اللى قلناها تظهر تغيرة قبل متتحرك .. وعلاماتة واضحة وبتبان قبل متتحرك بالسيارة .

[NicEgypt]

رقم 2 ف الصورة اسمة : سـلك الشفاط " بيكون واصل للكربراتير "

مميزاتة : فية حاجة زى بكرة تحت الدريكسيون عندك

البكرة دى لما بتشدها بتفتح باب ف الكربراتير علشان يسخن الموتور بسرعة الصبح قبل متتحرك

وخصوصا لو الجو ساقعة .. بيخلي صوت الموتور يعلي شوية كأنك ضاغط بنزين برجلك

عيوبة : ملوش عيوب حتى لو نسيتة .. هياكل بنزين بس شوية وهيسخن العربية لو وقفت ف اشارة
او ماشى بطيئ لذا لازم تطفية بعد متستخدمة .. وهو مش ضروري تستخدمة .. نادراَ لما بشغلة ..بسيب

العربية تـسخن براحتها وبمزاج تحس ان العربية بحس انها مبسوطة بكدة ... لو مستعجل بشغلة طبعاَ .

ملحوظة : يجب الضغط على دواسة البنزين للربع مثلا وفى نفس الوقت شد الشفاط .. والسبب انى لما فكيت الكربراتير

قطع قدامى ضغط على باب الشفاط ف الكربراتير اللى بيسخن الموتور " الباب العلوي " شوفت طريقتة الميكانيكية بنفسى

وقعدت اجرب والعب لقيتة تقيل جداَ فى حالة عدم الضغط على دواسة البنزين .. طيب لو حصل وحضرتك نسيت تضغط

بنزين وشديت سلك الشفاط .. مش هيحصل حاجة ف وقتها .. هيكون بس تـقيل معاك ورخم وانت بتسحبة .. بس مع الوقت

هيتقطع السلك وتشتري غيرة بـ 18 ج بحالهم .. لما ضغط على الجزء اللى بيضغط علية دواسة البنزين برجلك وضغط

على فتح الباب بتاع الشفاط لقيتة سلس جدا ف ايدي " الكلام دة والكربراتير مفكوك ف ايدي برة وفاتح باطنة ومجهزة للاجراء

عملية جراحية " وبالتالى لما حد يستخدم الشفاط اضغط بنزين وشد الشفاط .. العربية سخنت وتمام وهتتحرك .. اضغط بنزين

تانى لحد الربع ونزل الشفاط علشان يرجع مكانة .. هتلاقية سلس ومية ف ايدك

ملحوظة اخري مهمة : تمن السلك 18 ج .. اسمة سلك شفاط ... لما تيجي تشترية

قولة عايز سلك شفاط 128 .. هو نفسة بتاعنا هو بعينة . انما لو قلت لة ريجاتا لو غبي هيقولك مش عندى ! لو اللى

واقف ناصح هيقولك هات 30 ج وتبص ع الكيس تلاقي مكتوب علية فيات 128 ! ..تمام كدة ؟

* رقم 3 ف الصورة دة خرطوم الفايظ .. " او الفائض " وهو المسمي الصحيح.. دة بيخرج ابخرة الموتور ولو لا قدر الله

بيطلع قطرات زيت او بخار ابيض معناها ان الموتور محتاج شمبر ولو دة موجود لا قدر الله بعيد عن السامعين ومالكها

امين .. لازم تفكة من العمة علشان ميبهدش الكربراتير بعد فترة طويلة .. فك الخرطوم دة بعد مترجع من مشوار والعربية

دايرة بص علية .. ليقت ابخرة عادية ماشى ركبة .. لقيت دخان ابيض كثيف ورائحة زيت شديدة " زيت محروق " وجوة

زيت وبيطلع زيت برة وحياتة كلها مزيتة يبقى خلية مفكوك برة مش هيحصل اي حاجة ف العربية متقلقش .. سبب تركيبة ف

العمة : الخواجة عملة علشان يطلع ابخرة الموتور زي مقولنا .. وهو بيضرب كوباية الشاي الصبح .. قالك نعملة مكان ف

العمة ونركبة فيها .. لية يا خواجة ؟ قالك علشان يساعد فى تسخين العربية الصبح ومتاخدش وقت طويل .. فكرتة حلوة لو

حالة الموتور كويسة .. وفاشلة لو حالة الموتور مش حلوة لازم يتفك وتربطة بحاجة بحيث انة ميدخلش جوة مروحة الريداتير

يدمرها لقدر الله .. يتفك ويتربط بأفيز ف حتة ونقول للخواجة بلاش تشرب شاي هو السبب

[COLOR="DarkRed(139, 0, 0)"]رقم 1 ف الصورة دة اسبراتير الكترونى .. وظيفتة شرحناها بالمشاركة الاولى بالاعلى علما انة الاصلي بتاعها وملوش موبينة ! كما انة بيعتمد ف شغلة على حــساس الـكرنك ولو شلتها او لغيتها هتسيب الجزء دة زى مهو .. والا هتحتاج لطبة تركبها مكانها وبالتالى لو مش شغالة سبها زى مهي ف مكانها وهات اسبراتير الكترونى اخر بتاع الشاهين او 128[/COLOR]

[Hazemomar]

الله ينور عليك ... و انت اللي معلي حس الريجاتا في المنتدى
يعني ممكن تقول - قلب الاسد - و نكون قبيلة في غابة الفيات ..
- ريجاتاوي قريب بأذن الله -

[NicEgypt]

المشاركة الأصلية كتبت بواسطة Hazemomar الله ينور عليك ... و انت اللي معلي حس الريجاتا في المنتدى يعني ممكن تقول - قلب الاسد - و نكون قبيلة في غابة الفيات .. - ريجاتاوي قريب بأذن الله -

رابطة الريجاتا محتاجة تصحصح شوية .. وان شاء الله هقوم بواجبي اتجاة اعضاءها
هرد على رسالة حضرتك الخاصة بكتب تفاصيل عنها بشكل اكبر وهبعت لحضرتك اللينك
بحيث ان الاعضاء كلها تستفيد .. اللينك هيوصل لحضرتك خلال لحظات ف الرسائل .. وتحت امرك ف
اي استفسار

[ahafna]

بسم الله ماشاءالله بجد انا حاسس انكم توكيل الريجاتا مش معجبين بس و بصراحه العربيه دي تستاهل , بالرغم من اني عندي 128 ولا املك ريجاتا بس ناوي اشتري خلال الشهرين اللي جايين بس في حاجه غريبه في السوق،،،، تقريبا كل الريجاتا اللي في السوق موديل 85 اما 86 وغالبا الرفارف متغيره وبدون تكييف والفرش مش فابريقه والناس بيتكلمو في حدود ال 24 الف مع العلم ان حالت البيع و الشراء غالبا ان ماكنش اكيد لا لا لا لا لا لا توجد اي حركه ليه الله اعلم هل الاسعار هي السبب ام ايه السبب ؟؟؟؟؟؟؟ فالنهايه اكون شاكر جدا ليكم لو حد وقعت امامه حاجه لقطه و مش ناوي يشتريها انه يكتبها هنا او يحط اللينك وبكده نقدر نعرف ظروف سوق الريجاتا وربنا يكرمنا على ايدكم و نجيب حاجه كويسه باذن الرحمن : CONGRA~238::C ONGRA~238::GR OWIN~12: