استفسار عن مشاكل في الابيزا 2000

[mohamed ibiza]

يا باشا الكلام ده والله مش عارف اقولك ايه ربنا يخليك بس انا مستاهلش كل ده انا بحاول اساعد علي اد ما اقدر و ربنا هو اللي بيوفق

بص يا باشا

لو عايز توفير بنزين (250كيلو في الصفيحة) في حدود 200-220 بالتكييف و عايز سحب و جري و اداء حلو و يستحمل التكييف يبقي هو ال 1400 هيديك اللي انت عايزو و جراي و موتور جميل جدا جدا جدا جدا بس هو عيبه في سعره العالي انا كل اعتراضي علي ال 1400 بس انه غالي و لو زودت علي تمنه حاجة بسيطة ممكن تجيب حاجة اشد و تبقي راكب طياره فعلا

نظرا لاني شايف دبح الفلوس اللي انت فيه المفرضو اساسا لما تسقط مكنة تسقطها بفتيسها بكل حاجتها تمام انما الموتور ال 1400 بيسقط علي فتيس ال 1000 بس الار بي ام بيبقي عالي سنه علي ال1 يعني و عموما لو عايز تسقط الموتور بفتيسه فتيس ال 2001 ال 1000 سي سي عامل حوالي 650 جنيه استيراد يعني ال 1400 يا اما نفس السعر يا اما مثلا 750 800 جنيه تمام كده

التوكيل طبعا لا يعلي عليه و مش هترجعله بعيب رحتله بيه انما صباح المصاريف هتكره نفسك و تكره حياتك و تكره العربية من كتر الفلوس اللي هتصرفها خصوصا ان حضرتك عربيتك الله يحرقهم عكوا فيها جامد و مغيرين حاجات انا علي يقين انها مكانش ليها لازمه تتغير و حاجات تعيش اضعاف اضعاف الارقام اللي حضرتك قلت عليها في الموضوع الاساسي

انما ميكانيكي معين هو واحد (محمد سمير) ورا حديقة بدر في جسر السويس راجل محترم جدا و فاهم مفيش حد راحله الا لما شكر فيه و الحرفيين مليانه برضه

التكلفة الاجمالية:موتور 5000 فتيس نقول 750 يبقي 5750 بالتسقيط 6250

انت هنا هتدفع 6250 تمام كده

انت بقي ممكن لو زودت 1250 تجيب موتور ABF ده موتور جولف و كان بينزل في الابيزا 99 برا برضه تمام
يعني هتجيب موتور و فتيس و عفشه كاملة ادام و ورا بنظام الفرامل بكله ب 7500 تمام كده بالتسقيط قول 8000

و اللي فرصه بجد و ده هيخليك تحس ان العربية عايزه تطلع علي الحيط هو ال VR6 و انا ادامي واحد 2800 سي سي 175 حصان 235 نيوتن عزم ادامي موتور بفتيسه المانوال الاصلي بعفشته كامله ادام و ورا بالقنطره ب 7000 بالتسقيط 8000تجيبله العدادات و تانك الانجكشن و الطرمبه ان لم تكن الطرمبه موجودة مع الموتور

شايف تقارب الارقام ال 1400 و حاجته تكلفته حوالي 6250
الABF ده 2000 سي سي بحاجته كلها تكلفته حوالي 8000
الVR6 بحاجته كلها 7000 بتسقيط المكنة بالعفشه بالفتيس بكله قول 1000 جنيه مثلا بس انا رأيي استبعد الVR6 لان حاجته غالية اوي و غول بنزين 6 سلندر بقي تمام

احصر تفكيرك في الاتنين دول ال1400 و ال ABF

[mohamed ibiza]

س سؤال....مبتفكرش تظبط عربيتك؟؟ من غير تسقيط يعني انت بتقول التكييف ضعيف و السحب قليل و كده الكلام علاجه سهل بعون الله سيبك بقي من البساتم اللي اتغيرت و الكلام ده دي حاجات اتغيرت و خلاص بس سؤال عندك القديم؟؟؟؟ بساتم الفابريقه عندك؟؟

و لو تقدر تعدي عليا انا ساكن في الهرم نجرب العربية سوا و نشوف ايه الممكن عمله مع العربية دي لان اساسا تكييفها ممتاز و سحبها مش وحش لو تحب تعدي عليا و نعد نحسبها سوا انا معنديش مانع

[hazam]

كلامك كلة تمام ونصايح مافيش بعد كدة,وانا زعلان على الراجل صاحب العربية ايلي وقع عند ميكانيكي مالوش -------ان شاء اللة يلاقي عند الاسطى حل المشكلة والاسطى على قد المسؤلية,ويتريت دائما تنصحونا باسماء اسطوات بتفهم وعندها ضمير وكذلك محلات بيع الاستيراد لقطع الغيار خاصة للسيارات مثل الهوند الموديلات القديمة وكذلك الدايو واكيا

[mohamed ibiza]

انا لسه النهاردة شايف محل بيع قطع غيار استيراد سيات و فولكس في شارع كفر طهرمس متفرع من الطالبيه فيصل و في نفس الشارع في واحد اسمه هاني اوبل عنده كورساb متقطعه و استرا 2008 و فيكترا 2008 متقطع و كله و في نفس الشارع برضه فيرنات و تيريوس و لانسرات كريستاله و شارك و كده العربيات هناك متقطعه حتت يعني و كل حته بتمن طبعا و الراجل بتاع الفولكس ده شفت عنده ربع ابيزا 2001 احمر امامي و ان شاء الله عربية الراجل ده تتظبط و تبقي زي الفل

[mazagangy64]

ممكن استفسار
هو ينفع اني اركب موتور عربية علي عربية تانيه من غير اي مشاكل في الترخيص
لاني سمعت ان لازم اركب موتور من نفس نوع العربية يعني في الابيزا لازم موتور سيات وكده وده علشان المرور بس