تجربتى الواقعية مع مرور السلام لتجديد رخصة السيارة

[abdelhameed]

السلام عليكم اعضاء المنتدى المحترمين. احب ان انقل لكم تجربتى مع مرور السلام بشكل موضوعى للاستفادة منها وهى كالتالى:
وصلت المرور حوالى الساعة السابعة صباحا وطبعا اول حاجة بتقبلها هم الناس بتوع الركنة وهم بيرموا نفسهم ادام العربية عشان تركن فى المكان اللى بيقولولك عليه لكن انا رحت على طول على الباركينج الرسمى وقطعت تذكرة ب3 جنية وسبت العربية وبعدين قولت اصور البطاقة والرخصة 3 صور واشتريت دوسيه ودفعت 4.5 جنيه ليه مش عارف. بعد كده دخلت المرور لاقيت كم من النصابين اللى بيقولك هتمل ايه يا بيه لو رخصة او مخالفات اخلصهالك ودول عددهم كبير جدا وموجودين فى كل حته جوه المرور نفسه لكن انا مسمعتش كلام حد وقولت هعمل كل حاجة بنفسى رحت رايح على شباك النيابة عشان المخالفات قالوا لازم تروح تجيب رقم اللوح القديمة اللى كانت موجودة من تلات سنين عشان نشوف عليها مخالفات ولا لا. رحت اقف فى الشباك بتاع اللوح جاه عسكرى مجند عامل فيها عميد بحرى وقعد يشخط ويقول لموا الرخص مع بعضيكوا وانا هادخلها للموظف ومش عايزين كلام كتير وتستنوا تحت التنده وهنادى عليكوا. رحت مستنى تحت التندة لمدة ساعة ونصف لما طلعت الرخصة مع العلم ان انا كنت رقم 3 فى الطابور.
اخدت الورقة اللى فيها النمر القديمة والجديدة من اللوحات ورحت على شباك النيابة طلعلى مخالفات 650 جنية طلبت منه بيان وقالى ممكن تتظلم فى الدراسة لقيت البيان مكتوب فيه 100 جنيه التحدث فى المحمول اثناء القيادة و500 جنيه وقوف فى الممنوع ادى الى تعطيل حركة المرور بتاريخ 16/4/2012 بس اللى انا مستغربله انا المخالفة مكانها وسط البلد وانا عمرى ما رحت وسط البلد لان شغلى فى مصر الجديدة وافتكر انى رحت وسط البلد يمكن من 7 سنين او اكتر. المهم دفعت عشان مش ناقص عطلة وبعدين رحت للفحص الجهة المقابلة من المرور دورت على المهندس لقيته رايح جاى قولتله انا عايز افحص قالى عربيتك فين قولتله اهه قالى طب افتحلى الكبوت رحت حاطط اللى فية النصيب فى الجيب راح ماضى كل الورق من غير حتى ما يقوم. للعلم فى برضة نصابين كتير هيقلولك نخلصلك الفحص يا باشا والكلام ده وقاعدين جنب المهندس. وصلت الساعة 11.30 رحت جبت طفاية وورق التامين وكان فى واحد على طابور الخزنة بيقول للراجل رد علينا ياعم قام الراجل بتاع الخزنة قفل الباب فى وش كل الناس وحلف ماهو شغال الا لما نتعلم الادب قعدت الناس تتحايل وتستعطفه وكانوا عايزيين يبوسوا رجله عشان يفتح وبعد كده فتح وكأنه بيقول للناس اتعلموا التربية يا كلاب. وصلت للشباك الاخير وكانت الساعة 12.5 قالت السيدة المحترمة انا خلصت شغل كده بكرة بقا الباقى ياست يهديك يرضيكى معنديش اجازة غير النهارده قالتلى وانا مالى انا خلصت شغل رحت غمزها باللى فيه النصيب قامت خدت الملف ورجعته وقالتلى استنى تحت التنده وهيندهوا عليك. رحت قعدت حوالى ساعة وبعدين ندهوا على وخرجت وانا مش مصدق انى خلصت وفى ايدى الرخصة الجديدة والحمد لله. بس اقدر اقولكم يا جماعة ان الاوضاع بقت اسوء من الاول ومفيش حاجة اتغيرت وربنا يلطف على البلد دى.

[amr_9x]

ههههههههههههههههههه
حمد لله على السلامة
لعلمك ان مرور السلام من اسواء وحدات المرور فى مصر دة ان ماكنش هو الاسواء بدون منازع

[ash_rsi]

انت حضرتك مستغرب من مخالفه فى وسط البلد
ايه رايك انا وانا بجدد طلع على مخالفه تفتكر امتى
يوم 28/1/2011 ههههههههههههههههههههههههه ههههههههههههههههههههههههه ههههه
ودفعتها وانا فطسان على روحى من الضحك

[abdelhameed]

28/1/2011 دا حضرتك كنت الوحيد اللى ماشى فى الشارع بقا ههههههههههههههههههههههههه هه
وكمان الامن كان مفتح عينه قوى وقادر على ضبط المرور هههههه
الواحد بيضحك لكن من جوه بيتألم من الحال اللى احنا فيه

[ash_rsi]

المشاركة الأصلية كتبت بواسطة abdelhameed 28/1/2011 دا حضرتك كنت الوحيد اللى ماشى فى الشارع بقا ههههههههههههههههههههههههه هه وكمان الامن كان مفتح عينه قوى وقادر على ضبط المرور هههههه الواحد بيضحك لكن من جوه بيتألم من الحال اللى احنا فيه

ههههههههههههههههههههههههه ههههههههههههههههههههههههه ه
لا المصييبه بقى انى انا اصلا كنت فى مظاهره طلعت من جسر السويس لميدان التحرير يعنى اصلا العربيه ماتحركتش