عندى مشكله غريبه فى اسكواد فليشيا

[ahmedscondo]

السلام عليكم ورحمة الله وبركاته

اسكواد فليشيا 96

انا حصلت معايا من عشر ايام ان العربيه كنت ماشى بيها براحه وباخد مطب على الهادى

لقتها مره وحده بطلت منى المهم ادرو العربيه القيها تدور اول ما اشيل رجلى من البنزين

تقف وبعدين جبت ميكانيكى لقيته قصادى فتح الكابوت وتحت الكاربتير فى صاموله اعد يلف فيها المهم انها اشتغلت

اعدت معايا 10 ايام وعملت نفس الحركة بالظبط وطبعا دورت على ميكانيكى فى اى شارع

فتح الكاربتير وطلع ابره كده ونفخ فيها وحطها تانى اشتغلت العربيه

ميكانيكى قالى نظف الكاربتير هل ده كلام صحيح

ولو حد يعرف بتاع كاربتير كويس يقولى

والنقطه التانيه روحت عشان اغسل الماتور حاسس انه بقاله قرن متغسلش

الراجل قالى مش هقدر اغسل الماتور عشان فى مشط فى العربيه لو جاء عليه مياه

العربيه مش هتشتغل اتصرررررررررف ازاى بقى

[zing0]

بص يا ريس
مبدئياً كده حضرتك هتنضف الكربراتير بنفسك ان شاء الله
هتروح لأى محل قطع غيار و تشترى منه (منظف كربراتير), ممكن يديك (منظف انجكشن) طبعاً ينفع بس غالى و انت معندكش انجكشن, خليك فى منظف الكربراتير, سعرة من 15-20 ج, و أفضل أنواع هى Apro - Junk

هتفك العمه (اللى جواها فلتر الهوا اللى فوق الكربراتير) الصينية الكبيرة دى
ممكن تكون بمسامير أو كلبسات (معرفش الفليشيا أيه)
و طبعاً تفك فلتر الهوا, و تحاول تنفخه بهوا مضغوط (من منفاخ أو كمبروسر) - و الأفضل لو تغيرة خالص لو مش نضيف.
المفروض كده عيون الكربراتير ظهرت قدامك (تحت العمه)
هتركب الشفاطه (مع علبه المنظف) فى المنظف و ترش رشتين حلوين
و تدور العربية, و غالباً مش هتدور من أول مرة, كارك بنزين مرتين و دور تانى
و هى شغاله, تزود بنزين و انت بترش فى العيون (زود بنزين علشان متفصلش)
* ممكن تزود من مناول الأكسراتير أو لو مش عارفه, خلى حد يزودلك من الدواسه و يثبت رجله و هو دايس (بس مش للآخر !!!)
و لو فصلت, عادى دور تانى و أستمر لحد متفضى نص العلبه بالتقريب
- لو تعرف تفك الأبرة اللى الميكانيكى فكها و تنضفها تبقى تمام أوى
هيا عبارة عن مسمار فى وش الكربراتير, جواه ابرة فيها اخرام صغيرة جداً حاول تنضفها بالمنظف
(دى اسمها بيك السلانسية)
و بعد كده سيب العربية دايرة 3 دقائق و بعدين بطلها و ركب كل حاجه تانى
حاول تطلع مشوار بالعربية, يعنى لف بيها لفه صغيرة
مش لازم الـ WD40 ده للتزييت الخارجى, ممنوع استخدامه داخل الكربراتير

*** فيه حركه (بلدى) بيعملها الميكانيكية للتنضيف السريع, اسمها (قنابل)
بيعكسوا أسلاك البوجيهات اللى فى النص (2-3) و يدور العربية و يفضل يكارك (يدوس بنزين بسرعه و يرفع رجله كذا مرة) العربية هتعمل اصوات فرقعه (و احتمال تطلع نار من الكربراتير و تحرق الفلتر) - علشان كده برضه محتاجه فك العمه و الفلتر (للأمان)- و للأسف الحركه دى ممكن تضر الموتور (لأن تقسيمة الكهرباء معكوسه) - المهم دى برضه بتنضف الكربراتير بالهواء العكسى الخارج من البساتم..... بلاش الطريقة دى.
- بص عالموضوع ده
http://www.masrmotors.com/vb/showthread.php?t=25236

=====================

بالنسبة لتنضيف حوض العربية (الموتور و ملحقاته)
المياه أكبر غلط, لو جات على أى جزء كهربى هتبقى حوسه (و اسأل مجرب)
أفضل طريقتين:
1- منظف فوم بيتباع عند بتوع قطع الغيار, يترش و ينظف لواحده و يختفى
ده بيستخدموه للعربيات الحديثة, كلها كهربا و كنترولات و أى نقطه مياه تعمل مشكله

2- زجاجه بيبسى بلاستيك و تحط فيها بنزين و تخرم الغطا و ترش بيها الحوض كله, و لو معاك فرشاه دهان نظيفه تغسل بيها (بتوصل لأى مكان ضيق جوة الحوض)
طبعاً البنزين هينزل التراب و الزيوت و خلافه
بس كده, سيب البنزين يطير براحته و حاول متدورش العربيه غير لما ينشف خالص (سيب الكبوت مفتوح

[ahmedscondo]

والله انا مش عارف اقولك ايه فعلا انت استفدت منك كتيرررر بالنسبه للرحمة اللى اللى اسمها (قنابل)

هو فعلا اول مر عمل كده بالظبط

جزاك الله كل خير

[zing0]

جزانا و اياكم
كلنا هنا تحت أمرك

[ahmedscondo]

معلش سؤال هو اصلا لو الكاربتير اتفك واتنضف كله ليه ضرر بعد كده على العربيه

وليه الصبح لما باجى ادور العربيه لازم وانا بدور ادوس بنزين لمدة مثلا 5 ثوانى عشان العربيه متبطلش
بس بعد كده لو وقفت وبطلتها ودروت تانى بتدور عادى جداا