مناقشه منع سواقه االسيدات

[nawwara]

رابعا : المبرر الفطرى :
بصراحة المبرر ده بالذات مش عارفة الاخ جاب الكلام العجيب ده منين ..
المرأة فعلا رقيقة والرجل قلبه اجمد منها , انما ده لا يعنى ان كل النساء هايرتبكو اثناء القيادة لأتهف الاسباب , ومين قال لحضرتك ان المرأة بتخاف من المسافات الطويلة , وبالمناسبة ايه رهاب(الساح) ده , والله اللى اعرفه اسمه (أوكلوفوبيا-Oclophobia) وده رهاب الأماكن المزدحمة , ورهاب (أجورافوبيا-Agoraphobia) وهو الخوف من الاماكن المفتوحة , ايه رهاب الساح ده بقى الله اعلم ..
وبعدين ايه اللى يخلى المرأة أقل فهما من الرجل ؟!!!! كلام غير منطقى بالمرة , هى مش عندها عقل زيه ولا دماغها دى فيها بالوظة ..
قد يكون التأثير السلبي لنـزيف الدماء الطبيعية على حاستي السمع والبصر عند النساء امر صحيح طبيا , مش عايزة افتى فى الموضوع ده , لكن اللى عايزة اوضحه , هى المرأة هاتقعد تسوق العربية عمال على بطال وخلاص؟ وبعدين هى لازم تسوقها وهى تعبانة , بصراحة الكلام فى النقطة دى مش مقتنعة به خالص بدليل الواقع المشاهد .

[nawwara]

خامسا : المبرر الاقتصادى :
من اول خامسا لحد 69 فى المقالة ده خلاف بين الفقهاء والاخ بيقول انه فيه اجحاف بحق الرجل لما هو يدفع دية القتل الخطأ والمرأة لأ .. طب قوللى يا استاذ , هل قال النساء ليه ربنا يعطى الرجل اكثر من المرأة فى الميراث؟ , هاتقولى ده شرع ربنا , هاقولك وده بردو شرع ربنا , مسألة فقهية اختلف فيها الفقهاء , احنا مالنا بقى , هاتقولى ماهم قالو كده عشان المرأة عقلها اضعف من كده , هاقولك لو ده رأيهم فهذا شأنهم , انا لى الواقع ..
ياريت يا جماعة تقرءو الفقرة دى فى المقالة لحد 69 فيها كلام عجيب عن تقصير المرأة في كفِّ المستهترين والطائشين المنتمين إليها من العبث بأمن المجتمع مما يدفعها ـ بصورة تضامنية جماعية ـ لحفظ سفهائها، ومن يُتوقع منهم الخطأ الذي يُكلفها الغرامات المالية , كلام يضايق مش كده؟ ..
بقية الكلام من 69 الى 71 بصراحة مش فاهماها , حد يفهمهالى ..
ما بعد 71 الى اخر الفقرة دى حاجة تخص السعودية , ناس معاها فلوس مش عارفة توديها فين , احنا هنا فى مصر عارفين ان السواقة مسؤلية ومابنفكرش فى اى امر فيه مسؤلية الا لو كنا محتاجين له , مش معانا فلوس عمالين نبعزءها يمين وشمال .
وبعدين مسألة المباهاه والمفاخرة دى فى النساء فقط يعنى؟؟!!!!!
وبعدين اغلبية كلام الاخ على النساء والشباب المتهور , خلاص امنع الشباب دول كمان , وماتفضلش آفش فى المرأة وبس كأن هى سبب الخراب كله فى حين انها جزء بسيط من الكل -الرجال- اللى بيسوقوا ..
الاخ بيقول ان امتلاك المرأة للسيارة ليس دائما للحاجة , طب ياترى كل الرجال بيشتروا عربيات للحاجة؟!!!
طب تتوقع الراجل اللى بيجيب عربية لزوجته وهو اصلا معاه عربية , هايجيب لها ليه ؟ جوبنى انت , اعتقد ان حضرتك نفسك مش فاضى تودى زوجتك هنا وهنا ولا فاضى حتى للاولاد .

[nawwara]

سادسا : المبرر التاريخى :
ههههههههههه مش فاهمة ايه علاقة الفروسية اللى كانت فى عهود مضت بسواقة حتة صاجة بشوية عجلات بدوسة قدم فى العصر الحاضر .. هيييييييييه ما علينا .. المهم ..
-فقد نُقل عن بعض نساء السلف ركوبها وهنَّ مستورات بستور أو في بواطن الهوادج : يا بختهم والله ..
-تفسير رؤية الهودج في المنام بالمرأة عند مفسري الأحلام : طب تصدق وتؤمن بالله : تفسير السيارة فى الحلم بامرأة الرجل , تصدق دى بقى ههههههههه , بجد والله ..
- ومن المعلوم أن سائق إبل النساء يتلطف في سيره، ولا يشتد عليهن خوفًا من سقوطهن لقلة ثباتهن على الدواب : طب يا ترى قلة ثباتهن دى علشان عيب فيهم مثلا!!! ولا عشان عدم ثبات الهودج نفسه على الابل بالشكل الكافى يا راجل ..
عايزة اشير الى حاجة مهمة , حديث النبى صلى الله عليه وسلم (رفقا بالقوارير) الحديث صحيح وفعلا عشان المرأة رقيقة شبهها النبى بالزجاج لرقته الذى اذا انكسر فلا يمكن اصلاحه , عايزة اوضح حاجة الاخ صاحب المقالة لم يوضحها , وهى الواقعة التى قيل بسببها هذا الحديث , احد الصحابة تقريبا كان اسمه انجشة كان يسوق الابل بالنساء وكان يحدو بالابل , يعنى بيقول شعر بشكل فيه نغمة وكان صوته عالى , فنهاه النبى ان يحدو بالابل لان الابل اذا سمعته يحدو بهذا الشكل هاتسرع فى مشيتها وبالتالى هايتهز الهودج وتكون من بداخله عرضة للسقوط . اذن السبب ليس فى عدم قدرتها على قيادة الابل , انا ماباقولش ان المرأة تسوق قبل انما حبيت اوضح معنى الحديث , لانكو لو قرأته المقالة فى الجزئية دى هاتفهمو كلام تانى , الاخ بيستدل بالكلام ده على ان المرأة لا تصلح للقيادة , طب ماهى يا استاذى قاعدة جوه الهودج عايزها تسوقالابل ازاى , اضف ان فى بنى آدم سايق لها الابل يبقى ايه اللى هايضطرها لسواقتها .. سبحان الله , الكلام فى المقالة دى مش راكب على بعضه بصراحة واغلب استدلالاته خاطئة ..
-وهذا كلُّه يُشير ـ في الجملة ـ إلى أن مهارة القيادة للآليات أو للدواب مرتبطة بالذكور ارتباطًا وثيقًا : الدواب آه انما السيارة لأ , الدواب فعلا حركتها عنيفة انما السيارة لا , وماينفعش تقارب حيوانات الركوب بجهاز بيعمل حسب اوامر محددة ..
-المرأة المعاصرة لم تقد السيارة في أوروبا إلا قبل زمن يسير؛ فإلى الثلاثينات من القرن العشرين الميلادي كانت السيارة حكرًا على الرجل : ده لانهم كانوا بيحتقروا المرأة سيادتك , العصور دى وما قبلها المرأة فيها كانت مهانة , ويمكن من اسباب ده الفهم الخاطئ لشريعة عيسى عليه السلام .

[احمد على 1999]

المشاركة الأصلية كتبت بواسطة nawwara طب تتوقع الراجل اللى بيجيب عربية لزوجته وهو اصلا معاه عربية , هايجيب لها ليه ؟ جوبنى انت , اعتقد ان حضرتك نفسك مش فاضى تودى زوجتك هنا وهنا ولا فاضى حتى للاولاد .

فعلا
ده غير انها قبل العربية كانت بتتهان فى التكاسى ( ده ان وقفولها اساسا ) و معاها 3 عيال و انا ظروف شغلى مستحيل ابقى معاهم فى معظم المشاوير

[abdo_2828]

المشاركة الأصلية كتبت بواسطة alymonir أنا وجهة نظري الشخصية قيادة المرأة للضرورة فقط