|
#6
10-11-2011, 09:17 PM
|
||||
|
||||
رد: مناقشه منع سواقه االسيدات
السلام عليكم ورحمة الله وبركاته
هحاول ارد على كلام الاخ اللى كتب المقالة دى , وان كنت لا استغرب بعض الكلام اللى قاله , قوليلى ليه؟ , اقولك لان الرجل ببساطة سعودى الجنسية , يعنى ايه الكلام ده؟ , يعنى فكرالكاتب ونشئته وتربيته وحياته كلها كانت فى مجتمع بيحاول جاهدا انه يصد اى تغيير يطرأ على نظام الحياة فى بلده , دى اول حاجة استشفتها من بداية المقال .. ندخل بعد كده للمقدمة اللى بيقول فيها ان الغرب بيشن حملات شرسة لتغيير التفكير المتعلق بالمرأة وحياتها ومساواتها بالرجل , فى دى الراجل معاه حق , فعلا الغرب بيعمل كل ما فى وسعه عشان يغير مفاهيم كتير بشأن المرأة وطبعا بيغيرها للأسوأ , فى دى انا متفقة معاه .. نيجى بعد كده للمبرر الفقهى اللى ذكره الاخ إياه , بيقول فيه ان دفع المضار اولى من جلب المنافع .. تماااااااااااااام , انا معاك ودى قاعدة فقهية صحيحة , لكن فين المضار اللى حضرتك عايز تدفعها واللى هى اولى من جلب المنافع , تعالى نطبق الكلام ده على مصر .. البلد منفتحة والكل تقريبا فى الشارع والنساء والرجال راس براس فى الاتوبيس والمينى باص , قل لى برأيك لو المرأة بتركب مواصلة والرجالة حواليها من اربع جهات ولا حتى من جهة واحدة وكل واحد بيلزق فيها بشكل او بآخر ده افضل ولا تسوق بنفسها عربية ترحمها من ذل المواصلات وما فيها من قلة الأدب والمهانة؟ , اعتقد كده الفكرة وصلت .. حاجة كمان : الاخ بيقول ان ( ما افضى الى حرام فهو حرام ) , ومين قال لحضرتك ان السواقة اللى هى فى الاصل من المباحات ممكن تفضى الى حرام فى كل الاحوال؟!!! , لما واحدة تستخدمها غلط يعنى مثلا تركب معاها شباب والذى منه وتعمل بيها او فيها محرمات , حتى دى ماقدرش اقولها سواقتك حرام انما اقول لها ان الافعال اللى استخدمتى فيها العربية هى اللى حرام .. كمان : وكلامى للاخ كاتب المقال , هل تتوقع ان كل رجل هايتحمل مسؤلية توصيل نسائه فى كل مكان , هل تتوقع انه هايكون فاضى لهم , طب والنساء اللى معاهمش راجل يعملو ايه , يولعو فى نفسهم مثلا؟!!! وبعدين فى حاجة تانية , على كلام الاخ اللى بيقول ( حتى لو اضطر لجلب رجل اجنبى لتولى هذه المهمة ) , لو اعتبرنا ان ده فيه مفسدة فحضرتك شايف ان المفسدة الخاصة نضحى باننا نكتر منها عشان نمنع مفسدة اعم , فى حين ان السواقة ليست مفسدة من الاساس؟!! طب ادينى عقلك بقى .. حكاية الخلوة بالرجل الاجنبى فى السيارة يمكن تكون مبلوعة شوية فى السعودية لانها بلد فاضية , عدد سكانها قليل جدا بالمقارنة بمساحتها , يعنى فى مناطق فاضية كتير ممكن تتعرض فيها المرأة للأذى , لكن الوضع مختلف فى مصر خالص , هنا البلد مليانة ناس .. معنى كده ان المرأة لما تكون مع الرجل لوحدها فى العربية دى مش خلوة لان الناس حواليهم فى كل مكان وممكن اى حد يشوفهم ببساطة وبالتالى انتفت شروط الخلوة , يمكن فى السعودية الامر يكون مختلف لكن فى مصر هو ده الوضع القائم , وبالتالى العربية افضل للمرأة من عدم وجودها , انا باتكلم عن مصر يا جماعة عشان ماحدش ياخد كلامى بوجه عام .. حكاية ان المرأة تقر فى بيتها ده امر صحيح , لكن واقع الحياة بيفرض على المرأة غير كده .. اعتقد ان المرأة اللى مش محتاجة تنزل الشارع دى واحدة غنية تقدر تجيب كل حاجة وهى قاعدة فى البيت او عندها اللى يجيب لها وهى معززة مكرمة فى البيت , انما اللى ماعندهاش حد يجيب لها تعمل ايه .. اللى عايزة اقوله فى الفقرة دى بالذات , ان العصر بيتغير والفتوى بتتغير بتغير الزمن ومقتضيات الحياة , وبالتالى لابد ان الواحد يكون عنده فقه الواقع قبل ما يتكلم فى اى مسألة فقهية , وهذا ما لا اجده فى كلام الأخ , اللهم الا اذا كان بيتكلم على حال بلده وهو ادرى بها .. ده ردى على اول مبرر من 6 مبررات , اعذرونى على التطويل فى الوقت , لان ايدى بتوجعنى من الكتابة الكتيرة , وهاكمل الرد على بقية المبررات تباعا .. 
|
|
#7
10-11-2011, 09:53 PM
|
||||
|
||||
|
رد: مناقشه منع سواقه االسيدات
2- المبرر الاخلاقى :
الاخ بيقول ان من المفاسد المترتبة على ذلك , (هجران المنزل والسفر بغير محرم، والتعرض للمضايقات، والاختلاط بالأجانب، والتوسع في مجالات عمل المرأة المتعلقة بشؤون النساء السائقات، إضافة إلى مشكلات صيانة مركباتهن ضمن أجواء لا تناسب المرأة المسلمة، مع الاضطرار لكشف الوجوه).. تعالو نرد على الكلام ده واحدة واحدة .. - هجران المنزل : يبقى البنت مش متربية بقى من البداية انما ماتجيبش الأمر فى العربية , ولا ايه يا جماعة .. -السفر بغير محرم , فى دى معاه حق المرأة فعلا المفروض لا تسافر بدون محرم , والاحاديث الصحيحة كتير فى الموضوع ده , انما ده مش مترتب على ركوبها للعربية , ما هى ممكن تسافر بالمواصلات الخاصة بالسفر , ليه ربطت الأمر بالسيارة .. -التعرض للمضايقات : المرأة بتتعرض للمضايقات بالسيارة وبدونها , ومع وجود السيارة بتضمن بنسبة اعلى ان من يضايقها لن يلمسها لوجود حاجز بينهم مش زى ما تبقى امامه مباشرة بدون اى حواجز بينهم حتى لو ازاز شباك العربية .. -الاختلاط بالاجانب : الاختلاط موجود بالفعل بعربية وبغيرها , يعنى وجود العربية لم يغير شىئ, يبقى ايه الضرر منها حتى الآن ؟ لا شئ .. -التوسع في مجالات عمل المرأة : نفس الرد بتاع الاختلاط بالاجانب .. - مشكلات صيانة مركباتهن ضمن أجواء لا تناسب المرأة المسلمة : يمكن تكون الاجواء دى موجودة فى السعودية , انما فى مصر لأ .. -الاضطرار لكشف الوجوه : مش عارفة بصراحة فين الاضطرار فى كده , نساء كتييييير فى مصر بتسوق ولابسة نقاب والعملية زى الفل ولم تضطر يوما لخلع نقابها وانا واحدة منهم , اللهم الا ان كان فى ضرورة , والضرورة تقدر بقدرها .. الاخ بيقول( والسيارة كمركبة متحركة داخل المجتمع ليست حصنًا للمرأة من أن تُنال بسوء، أو تتعرض للفتنة، أو تعرض غيرها للافتتان ) , الرد: المرأة معرضة للإساءة فى اى وقت بعربية وبدون ومعرضة للفتنة او ان تفتن غيرها برضه بالعربية وبدون , يبقى ماتحطش العربية هى المعيار لوجود اساءة وفتنة من عدمه , يبقى الافضل لها انها تكون داخل العربية كحاجز بينها وبين اى مسئ احسن من مفيش .. الاخ بيقول ( ولا سيما عندما تتعطل مركبتها في أماكن لا تأمن فيها المرأة على نفسها ) : دى حاجة ممكن تحصل لأى واحدة فعلا عشان كده الواحدة بتظبط عربيتها قبل اى مشوار عشان ماتعملش معاها حركة نص كم فى السكة .. معلش واحدة صاحبتى جاتلى هاكمل الرد على بقة المبررات الاربعة بعد ما تمشى ان شاء الله .. سلام مؤقتا
|
|
#8
10-11-2011, 11:25 PM
|
||||
|
||||
|
رد: مناقشه منع سواقه االسيدات
في الزمن دا مينفعش الست متشتغلش لازم الراجل و الست يشتغلوا عشان يأمنوا مصروف البيت و الاولاد و دي حاجة معروفة الست هتروح شغلها ازاااي؟ هتقول ماتسوقش العربية مااشي يا سيدي خليه تركب ميكروباص او توكتوك او تكس طيب دي اكبر مشكلة الواحد مش ضمنهم يكونوا صيع بلطجية مسجلين و انتم عرفيين الظروف في مصر عاملة ازاي الي عايز يعمل حاجة يعملها مفيش شرطة فلو الست ساقت العربية هتبعد عن الاشكال دي و حكاية اختلاط و ما اختلاط فده راجع لتربية البنت بإختصار مترميش بناتاك لسواقين مستغلين او او او
|
|
#10
11-11-2011, 12:05 AM
|
||||
|
||||
|
رد: مناقشه منع سواقه االسيدات
ثالثا : المبرر الصحى :
يقول الاخ (وقيادة المرأة للسيارة يعرضها للتلف) , معلش يعنى كلمة تلف دى غايظانى حبتين , هى المرأة نفسها آلة يعنى عشان نقول تلف , ما ممكن نقول تعب او مرض او يزيد من نسبة تعرضها لبعض الامراض مثلا , انما ايه تلف دى!!! .. -السيارة آلة عنيفة لا تناسب طبيعة الإناث : والله انا عن نفسى مش شايفة فيها عنف بغض النظر عن الدراسة , حتى لو فرضنا ده فهى من باب اقل الضررين , بالنسبة لى ضرر المواصلات اكبر من ضرر العربية , دى وجهة نظرى .. -ولا تزال هذه الآلة تتصف بالعنف حتى بعد تطورها، فإن حوادثها على المستوى العالمي في غاية القسوة، وغالبًا ما يتعرض لها العُزَّاب من الشباب، والنساء المبتدئات، وينفرد الشباب بأعنف وأشد حوادثها : طب ما لاحوادث دى ممكن تتعرض لها المرأة من غير ما تسوق , بدليل كلام حضرتك ان الشباب بينهم اعنف واشد الحوادث , يعنى لما المرأة ماتسوقس يبقى مين اللى هايسوق؟ طبعا الشاب اللى بيوصلها سواء كان اتوبيس او مينى باص او تاكسى , وبالتالى هاتتعرض بردو للحوادث شائت ام أبت , يبقى لما تسوق لوحدها افضل وخاصة المبتدئة لأنها بتكون حذرة جدا فى سواقتها , طبعا الحذر لا يمنع القدر لكن الواحد بياخد بالأسباب وبيتوكل على الله , لو على كلام حضرتك يبقى الاولى منع الشباب بقى من السواقة عشان نسبة الحوادث بسببهم عالية واشد واعنف قسوة .. ويهلك في المملكة العربية السعودية وحدها ـ التي سجلت أعلى معدل لحوادث السير في العالم ـ حوالي سبعة أشخاص يوميًا : طب ما طبيعى يحصل كده , عربيات احدث موديل تجبر سواقها انه يسوق بسرعة من حلاوتها مع شباب فاضى ومستهتر وليس عنده شعور بالمسؤلية -طبعا مش كلهم-, والاهم من ده ان الشوارع شبه خالية فى السعودية , يبقى تتوقع ايه .. الحمد لله يا خويا شباب بلدى زى الفل وبيتحملوا المسؤلية ورجالة بجد , وكمان شوارعنا لو جدع تلاقى فيها شارع فاضى .. ده احنا طول الوقت بنشتكى من التبديل على الاول تانى اول تانى .. -إلى جانب ما يحدثه هذا التوسع من استنـزاف للبيئة وتلويثها : طيب شيل نسبة الستات اللى بتسوق وحط مكانها رجالة : يا ترى هاتقولهم ماتسوقوش عشان نسبة التلوث هاتزيد؟!!!!! خلاص ماحدش يسوق خالص عشان البيئة تنضف ونقضيها جمال وبعير بقى اهى على الاقل حاجة طبيعية ماتلوثش البيئة .. وعجبى .. -ولما كان غالب حوادث السيارة "تقع في الوقت الذي يجب أن يكون فيه الإنسان في أعمق فترات النوم"([50])؛ فإن مزيدًا من الحوادث المرورية سيكون من نصيب المرأة العاملة السائقة؛ لكونها أكثر فئات المجتمع على الإطلاق جهدًا، أقلهن نومًا ([51]). ثم إن متغير التعليم والزواج لا دخل لهما في التقليل من حوادث السيارات : اخى الفاضل الحوادث هاتحصل هاتحصل لو ربنا مقدر كده سواء بتعليم وزواج او من غيرهم .. انا معاك فى ان المرأة أكثر فئات المجتمع على الإطلاق جهدًا، أقلهن نومًا , لكن لا تتوقع انها لو موجودة فى البيت فى وقت النوم ده هاتكون نايمة , ابدا , هاتلاقيها بتلف فى البيت زى النحلة عشان جوزها ييجى من شغله يلاقى الدنيا متظبتة فى البيت .. الملاحظ فى مقالة الاخ الكريم ان كلامه كله قائم على دراسات كلها فى السعودية , وبالتالى كل الكلام اللى فى المقال لا ينطبق على المرأة فى مصر ولا على اغلب نساء العالم .
|
 |
|
|
![[IMG]file:///C:/DOCUME%7E1/ragy/LOCALS%7E1/Temp/moz-screenshot-4.png[/IMG]](image.php?s=548aba4ba8274635806d84f5aefea595&u=5722&type=sigpic&dateline=1317473683)
