عاوز اعرف كيفية عمل المشط بتاع الاسبراتير

[sayed2077]

المشاركة الأصلية كتبت بواسطة Hisham.Elgazzar الاسبراتير فى العربية دى هو الموبينة والمشط كلهم زيتهم فى دقيقهم فى العربية دى تقريبا زى اللانسر 92 والله اعلم اللى اعرفه ان المشط هيبقى شغال معاك زى الفل وبالعكس قبل مايبوظ هتلاقى العربية معاك احسن من الأول زى ماتقول حلاوة روح وبعدين ونتا وحظك بقى يفصل على منزل كوبرى او فى إشارة او تحت البيت او فى اى مكان ربنا يسترها معاك ومعانا كلنا يا رب الأهم من دا كله زى ما الباشمهندس محمد قاللك لازم تشترى مشط إستيراد وتخليه معاك فى درج التبلوه إحتياطى على فكرة انا من ألتراس الأبلاتين والكوندينسر ووجهة نظرى ان الأبلاتين يتغيره عندك كل شهر ده عيب صنايعيى او ركب الكامة بتاعت الإسبراتير كانت منتهية ده غير ان الطقم ب 20 جنيه والمشط ب 100 شغال او مش شغال انت وحظك ياريت لو تقدر تجيب اسبراتير عاده أركبهولك واعدلك نظام الإشعال فى العربيةوبإذن الله ولا هتسمع سكة ولا عمرها هتقل معاك وهتحط على اى عربية إسبراتيرها إليكترونى

هههههههههههههه ينهار فل لو قطعت منى على منزل كوبرى تبقى ليله فله ههههههههه وطيب اعرف ازاى ان العربيه بقت شغالة احسن من الاول ديه ؟؟؟؟

اما بالنسبه للتحويل الى ابلاتين وكندنسر فده صعب اووى انا لو عليا عاوز اجيب الموبيه الى فيها اسبراتيرها وكل حاجه

وربنا يخليك لينا يا استاذ هشام وسؤال اخير هل المشط ده بيركب بسهولة يعنى مثالا القديم ليه فيشه وتبقى الحكاية شيل فيشة القديم وركب فيشة الجديد ؟؟؟؟

ولا برضوا فيه حوار زى تركيب الابلاتين والكوندنسر

[mr_astra]

المشاركة الأصلية كتبت بواسطة sayed2077 بجد الف شكر لحضرتك استاذ محمد على التوضويح وفعلا انا عاوز اجيب واحد واخلية احتياطى فى الدرج وربنا يستر

الشكر لله يا استاذ / سيد
بس مش عاوزك تكون قلقان من النقطة دى لو هانقلق من عطل فى العربية يبقى هانجيب عربية كاملة ونخليها قطع غيار
هو حضرتك بتشتكى من حاجة فى نظام الاشعال خصوصا مع بنزين 80 ؟
اعمل اللى عليك واللى محتاجاه العربية والباقى على الله
عربيتك جميلة صدقنى وطعمها حلو وخصوصا انها هاتش باك بعتبرها افضل من السيدان فى الاتزان والمشى ...............استمتع

[Hisham.Elgazzar]

المشاركة الأصلية كتبت بواسطة sayed2077 هههههههههههههه ينهار فل لو قطعت منى على منزل كوبرى تبقى ليله فله ههههههههه وطيب اعرف ازاى ان العربيه بقت شغالة احسن من الاول ديه ؟؟؟؟ اما بالنسبه للتحويل الى ابلاتين وكندنسر فده صعب اووى انا لو عليا عاوز اجيب الموبيه الى فيها اسبراتيرها وكل حاجه وربنا يخليك لينا يا استاذ هشام وسؤال اخير هل المشط ده بيركب بسهولة يعنى مثالا القديم ليه فيشه وتبقى الحكاية شيل فيشة القديم وركب فيشة الجديد ؟؟؟؟ ولا برضوا فيه حوار زى تركيب الابلاتين والكوندنسر

لأ ماتقلقش خالص وبإذن الله مش هيحصل الكلام ده ممكن تلاقى تقطيع فى الكهربا تعرف على طول انه المشط تقوم مغيره وعلى فكرة سهل جدا جدا جدا مش زى العادة واظبط الشاكوش وكده
أهم حاجة ونتا بتفك الإسبراتير تعلم مكان الشاكوش ومكان القاعدة بتاعت الإسبراتير لكن تركيبه سهل جدا ماتقلقش ربنا يستر طريقك وطريقنا يارب

[sayed2077]

المشاركة الأصلية كتبت بواسطة mr_astra الشكر لله يا استاذ / سيد بس مش عاوزك تكون قلقان من النقطة دى لو هانقلق من عطل فى العربية يبقى هانجيب عربية كاملة ونخليها قطع غيار هو حضرتك بتشتكى من حاجة فى نظام الاشعال خصوصا مع بنزين 80 ؟ اعمل اللى عليك واللى محتاجاه العربية والباقى على الله عربيتك جميلة صدقنى وطعمها حلو وخصوصا انها هاتش باك بعتبرها افضل من السيدان فى الاتزان والمشى ...............استمتع

والله يا استاذ محمد حاليا حالها مش عجبنى خالص وبصراحه بقالى اكتر من شهريين ملمستش حاجه فيها نهائيا

ففيه حاجات عاوزه تتظبط الحكاية بدائت لما روحت عند الميكانيكى علشان نظبط الكربراتير سنه فللاسف غبت سوية وياريتنى ما غبت لقيته فك الكربراتير خالص وطلع فيه بك واسع فبيرمى بنزين زياده وهو اللى بيتسبب ان البوجيهات بعد فترة تهبب فروحت جبت بيك اصلى جديد ب 20 جنية بس الرقم بتاعه 150 والقديم كان 153 المهم بصراحه جينا ندور ومن ساعتها العربيه بقيت بتسكع وكدا فركنها علشان الوقت كان اتأخر بس وتانى يوم ظبطنا تاكيهات بس برضوا مش متأكد منها و جبنا طقم بوجيهات جديده بس مش 3 شمعه بوش زى القديم ده واحد شمعه NGK مصنوع خصيصا لتويوتا حسب اللى مكتوب على العلبة و وفك الكربراتير تانى طلع انه كان مركب بكين بنزين واسعين ومركب واحد ضيق والتانى واسع المهم ظبطنا الدنيا وكدا بس المشكلة مازالت قائمة كالاتى
1: مثالا العربيه على السلانسية لو مره واحده دوست بنزين للاخر هتلاقى العربيه سكعت فى الاول وبعدين الاربى ام على طبيعى

غير الاول لو كنت دوست والعربيه على السلانسيه ووقفه فى مكانها بنزين للاخر مثالا تلاقى مره واحده العربية الاربى ام بتاعها على بدون التسكيعه اللى فى الاول واعتقد التسكيعه ديه من
اننا غيرنا البيك الجديد ل 150 بدل من 153 (هل 3 درجات يعملوا كدا ) ؟؟؟

2:الشكمان الاول كان تيجى تحس الهوا اللى طالع منه بأيدك تلاقى ايدك عرقت مايه وعمرك ما تلاقى هباب بيطلع على ايدك

دلوقت الهوا اللى طالع من الشكمان على طول ناشف ومبيخليش ايدك تعرق وبيطلع فى هباب بسييط اوووى

3: الجرى بتاعها على الطريق طبيعى بس مش عارف احسب معدل استهلاك البنزين بصراحه نهائا خصوصا حاليا

4: مشاكل تانية بس مالهاش دعوه بالى عملناه

1:التيل الامامى خلاص قرب ينتهى والفرامل عاوزه تتظبط علشان اثناء الفرملة العربيه بتحدف من ساعت ما جبت طنبورة جديده استيراد مع الجنب اليمين اللى كان ركب

و كمان فرامل اليد عاوزه تتظبط علشان مهما تشد فيها مبتفرملش خالص من اول ما جبنا العربيه واشك ان الواير بتاعها مقطوع او سبب تانى الله اعلم

وحاجات تانية بسيطه بقى زى مثالا كوتشتين كبوت ودول اول ما الواحد يفتح الكبوت من جوه دول بيرفعوا الكبوت سنه بسيطه علشان تفتحه انت من قفل الامان

ف أن شاء الله ناوى اعمل الاتى

1: اروح اظبط تاكيهات عند محمد حماصة اللى فى فم الخليج
2:اروح مركز الصفا لتحليل العادم و ظبط الكربراتير علشان اخلص بقى من الكربراتير ده واظبطه ان شاء الله
3: اروح بقى عند الميكانيكى اللى تبعى نشوف بقى حكاية الفرامل ايه واكيد هيبقى فيها تيل امامى و من الممكن يبقى فيها مسح طنابير فى المخرطه و ظبط الدنيا كلها بقى ان شاء الله بتاعت الفرامل

4:ظبط بعض الاشياء البسيطه
مثل
1:تظبيط الشكمان علشان فيه قعده مقطوعه
2:تركيب الكوتشتين
3:تغير بوجيهات اذا تطلب الامر ذلك
4:تغير سلوك بوجيهات اذا تطلب الامر ذلك


وربنا يسهل ان شاء الله


وبارك الله فى حضرتك وفى استاذ هشام الجزار

تحياتى لحضراتكم

[Hisham.Elgazzar]

ربنا يوفقك ويعينك عليها
العربية دى أخدت منك مصاريف كتيرة اوى زى عربيتى