عقدة دهان الفبريكة

[ايمن عبدالحميد]

عند شراء سيارة مستعملة اول ما يشغل المشترى وفريق الخبراء المصاحب لة هو فرز السيارة والتأكد من عدم وجود دهان مختلف عن دهان المصنع ، والواضح ان هذة العقدة موجودة عندنا فى مصر فقط لأن الناس فى الخارج بتلعب فى الوان عربياتها وتعدلها زى ما تحب ولا يقلل ذلك من ثمنها ابدً اما فى مصر فهى مصيبة كبر ، عربية رشة برة او رشة جنبين ولا رفرف يبقى تنقص قيمتها بالخمس والسبع الاف جنية ، صحيح ان اعادة الدهان قد يعنى وجود صدمات او حوادث لكن هذا لا يمثل اكثر من 30% من السيارات اما الاغلبية فلمجرد تجديد اللون او لإزلة اثر احتكاك بسيط مع ان بودى السيارة سليم جدً ولا يوجد بة اية مشاكل فضلاً عن ان الدهان يبلى مع مرور الزمن بفعل العوامل الجوية وعدم وجود جراجات ، فما الذى يقلل من قيمة السيارة لمجرد اعادة دهانها؟ الا يكلف اعادة الدهان ما لا يقل عن 3000ج ويعطى عمراً جديداً للسيارة ؟ تعلوا اخوانى نفتح هذا النقاش لنستفيد من خبرات اعضاء المنتدى ، ونرجو الا ينسانا ابو نورا فهذا الموضوع من ضمن خبراتة

[samirsaid1]

عندك حق يا أستاذ أيمن

دى اول حاجة بيسأل عنها اى مشترى رشة ولا مش رشه

لدرجة ان مفيش حد بيهتم بحالة العربية ولا اى حاجة فيها رغم ان فية اماكن كتييير فى العربية اهم من الصاج

ودة عشان الناس مش فاهمة اساسيات فحص السيارة لكن مايمنعش انى اطمن على الصاج الخارجى

والله نفسي اغير لون العربية بس مش عارف

لاني لو فكرت ابيعها هتنزل من تمنها نازلة سودا

[mr_astra]

اختلف معاكو
وجود دهان فى حوض السيارة يعنى انها تعرضت لحادث من الامام
ونفس الكلام من الخلف
اما القوايم والسقف دول اخطر حاجة وبيعنو فى الغالب انقلاب السيارة
طب هل يمكن ان سيارة مقلوبة ترجع على طبيعتها تانى
هل لو الحوض مرشوش الموتور والات الجر هايركبو فى مكانهم بالملى تانى
وجود خبطة فى الحوض وردها بزرجينة او على البارد او عمل مرمات لا يمكن ان يكون خواص المعدن بقت كما بالسابق
اى معدن بيسخن خواصة بتتغير للاسوا
ثانيا معالجة ما بعد الخبطة من لحام ومعجون ودهان وخلافة بيكون عرضة اكثر انة يصاب بالبارومة فضلا عن وجود نقطة ضعف فى هذة الاماكن ونسبة تلفها اكثر من اى جزء اخر
احنا ممكن نغير حاجات فى العفشة او نغير حاجات فى الموتور او الموتور كليا او العفشة كليها لكن هل يمكن تغيير جسم السيارة كليا!!!!!!!!!
ناهيك بقى عن الانصاص والارباع والكلام اللى احنا بنعملة دة
الموضوع دة خطير جدا فعلا لان ديناميكة السيارة لا يمكن ان ترجع على طبيعتها بعد تركيب نص او ربع
تقبل مرورى

[ironheart]

كلام جميل ومقنع