استلام الافيو

[ابو تسبيح]

ان شاء الله ايام واستلم الافيو الاتوماتيك .. ياريت يوضح ازاى استلم العربية وايه الادوات اللى استلمها معاها .. وايه اللى اخد بالى منه اثناء الاستلام .

[Injection]

شيك يا باشا على العربية من بره, شوف لو حتة فيها مجروحة أو لونها مخالف للون العربية علشان معظم العربيات بتتجرح أثناء النقل من مكان لمكان والتوكيل عديم الضمير بيبعها بعد التصليح وفيه عربيات بتتخبط وبتترد كمان.
وشوف الكماليات اللى أنت طالبها موجودة ولا لأ, جرب التكييف وشوفه شغال كويس ولا لأ وجرب الكاسيت وكل الكماليات وشوف كل حاجة شغالة صح ولا لأ وشوف عداد الكيلومتر ماشى كتير ولا لأ.
وأفتح الشنطة شوف الكوريك والأستبن موجودين ولا لأ ومتنساش تاخد المانيوال بتاع العربية والكاسيت وأنت بتستلم.
وألف مبروك على العربية ومتنساش تقرا فيها المعوذتين علشان الناس أصحاب العيون.
وفيه موضوعات عن تليين الموتور فى العربيات الجديدة فى قسم الصيانة , وربنا يباركلك فى العربية.

[ابو تسبيح]

شكرا .. ربنا يبارك فيك .. بس كنت بسأل حضرتك ايه المانيوال اللى استلمه .

[خالد دبي]

حيلك ياعم حيلك هو بيشتري عربيه من سوق البل خبط ايه ورد ايه دي توكيل بجد بيصل كده ف التوكيل ينهار ده نصب مش توكيل في حد يشيك على عربيه توكيل زيرو بجد ولا بتهزر طمني ياعم

[Injection]

ياباشا لابهزر ولا حاجة, العمال بينقلوا العربيات وأحيانا بيسوقوها قدام المعرض بسرعات جنونية,وأنا شوفت الكلام ده بعينى بعربيات سيراتو, والمعرض بيصفر العداد قبل مايبيع
, وكان فيه موضوع فى المنتدى مخصص لكده, وعضو قال أنه شافهم فى التوكيل بيداروا حكة بقلم بوية فى عربية زيرو.

المانيوال ياباشا هو دليل التشغيل بتاع العربية والكاسيت, وبيبقى مكتوب فيه كل حاجة عن العربية وأحتياجتها وأستخدامتها.