خاص لملاك ابيزا 94

[ahmedibeza]

السلام عليكم

انا عضو جديد ابيزاوى فى المنتدى ولاحظت ان عدد المشاهدين لمنتدى السيات فى مصر موتورز اعلى من اى منتدى تانى انا دلوقتى وانا بكتب الموضوع شايف 40 مشاهد وده رقم كبير جدا بالنسبه لمنتدى تانى مشهور جدا وكان عدد المشاهدين 2 بس المهم اتفتحت نفسى لمنتدى السيات بس اتصدمت لما لقيت ان المشاركات قليله قوى والردود تكاد تكون معدومه ازاى العدد ده كله من المشاهدات والصفحه الاولى فيها مواضيع اخر رد فيها كان الشهر اللى فات فاتمنى نحرك الموضوع شويه ولو حتى بالاسئله والاجابات وانا هبدأ بنفسى

انا لسه شارى عربيه ابيزا 94 وكانت من غير موتور ومرفوعه 4 سنين بس حاله شاذه من حيث الدواخل والاستخدام بس كانت محتاجه فرش للكراسى والكونصول اللى فى نص التابلوه ودهان خارجى المهم بدات رحله البحث عن مكنه وانا خبرتى بالابيزا 0% المهم ان ربانى هدانى انى اسقط مكنه انجيكشن 1.4 بدل الكربراتير اللى كانت فيها وانا الفتيس كان موجود عندى من غير مجموعه الدبرياج
-وكانت التكلفه كالاتى:
1- مكنه 1.4 انجيكشن كامل متشال منها الباور والتكييف 3500
2- طقم بوجيهات يابانى ngk عشان نقدر نحكم على المكنه 70
3- فلتر زيت المانى بس مش حلو قوى يعنى عشان هيتغير كده كده 45
4- مجموعه دبرياج كامله هو بيتكلم فى 300 بس انا هدفع 150 حلو قوى
5- زيت موبيل عادى عشان هيتغير برده 75
6- غيرت اخر الشكمان اللى بيركب فى المانفولد وعملت مسامير جديده 50
المصاريف دى طبعا شامله التركيب بس طبعا كان ملوش دعوه باى مشكله تانيه فى العربيه وبوز الشكمان اللى غيرته اخدته مع المكنه كادوه
الاتفاق على اسبوع واحد بس العربيه اخدت اكتر من كده ب5 ايام تقريبا
-التقرير المبدئى عن المكنه الجديده :
1- الموتور ناعم ما شاء الله بشكل غريب يمكن عشان انا مش متعود على الانجيكشن
2- اتفقنا انا وصاحب الورشه انى مقرصشى اكتر من 3 ار بى ام عشان الموتور برده بقاله فتره مركون
3- صاحب الورشه كان ايده على قلبه لما دور اول مره وده معناه انها بطيخه وهو وحظه لانه كان فاكك الكبالن لانه عامل حسابه ان المكنه ممكن تتشال
4- الشكمان كان بيخبط وده لان اللى اشتغل فى الشكمان اشتغل والموتور مش داير عشان كده مقدرشى يحكم عليه
5- العربيه كانت بتبرجل فى اول الدواره وممكن تبطل كمان استشرت واحد ميكانيكى صاحبى قاللى وديهالو يظبطهالك
6- العربيه سخنت منى والمروحه مشتغلتشى واضطريت اقف كذا مره وانا رايحله عشان العربيه تبرد مع ان المشوار كان تقريبا 2 كيلومتر
-نتيجه اول مره اروحلو بيها:
1- كان فى ترموستات فى الكوعه اللى بتودى الميه للردياتير بايظه وكانت مبتفتحشى فكانت الميه بتفضل جوه الموتور بتغلى ولما شيلناها الدنيا اتظبطت وقاللى دى بتنفعك فى الدواره فى البرد بتخلى العربيه تسخن بسرعه
2- البرجله اللى كانت فى اول الدواره زادت وبقت على طول وبوظت السحب خالص راح الصنايعى ظبط الكلام من الاسبراتير والبرجله اختفت تماما
3- لما طلعت اجرب لقيت انى لما بكبس قوى على المكنه بتتخنق بس لو سايستها باخد منها جرى حلو وطبعا انا بدات اقرص لانها معايا من اسبوع او اكتر
4- الصنايعى قاللى دى محتاجه الكهربائى اللى بيفهم فى الكنترول عشان يحطها على الجهاز
التقرير الثانى بعد زياره الورشه:
1- السحب فرق تماما ولولا السرعه مش شغاله عندى كنت قلت هى بتجرى بسرعه كام
2- الموتور هدى اكتر من الاول وريحه العادم مظبوطه وبتسخن فى وقت قصير مع انى شلت الترموستات اللى بيقفل الدوره
3- الموتور متناسب تماما مع العربيه بكامل حمولتها ومفيش اى اجهاد عليه
-ان شاء الله انا رايح تانى قريب عشان احط العربيه على الجهاز واطمن ان المكنه تمام وادى الراجل باقى فلوسه واخد الورق بقى

كل اللى فات ده كلام جميل وحبه معلومات مفيده قشطه انا بقى عايز مصلحتى وهى ان ليا بعض الاسئله الرخمه
1- مفتاح الكونتاكت فيه مشكله وانا مشغلها بزراير مؤقتا سعر الكونتاكت كام ومن عند مين وهل ينفع احاول فيه واصلحه
2- العربيه عندى ارتفاعها مظبوط عن الارض بس بتوطا قوى من ورا لما بشيل فيها اى حموله هل ده طبيعى ولا عندى حاجه غلط فى العفشه ورا
3- لو فكرت اشترى كرسيين قدام بدل اللى عندى يطلعوا بكام ومنين
4- جوز المساعدين بتوع الشنطه اجيبهم جداد احسن ولا استيراد
5- الشبكه اللى قدام عندى مكسوره فى منها جديد ولا ادور لى استيراد

على فكره انا اخترت الاسم ده مخصوص ahmedibeza مع ان كلمه ابيزا غلط بس عشان فى واحد فى المنتدى هنا اسمه mohamedibiza شخص محترم جدا وبيحب يساعد الناس جدا و نفسى ابقى زيه حتى فى الاسم بس بدل محمد اكتب احمد بس لقيته محجوز
اى حد عنده معلومه او نصيحه او حتى كلمه تشجيع يكتبها لان المنتدى بجد محتاج مواضيع اكتر من كده وردود متواصله داحنا اربعين مشاهد وفى بكره شغل امال لو يوم اجازه

تحياتى للجميع واسف على الاطاله

[abb]

طيب انا من ملاك الابيزا 98 ينفع اشارك ولا لا

[ahmedibeza]

المشاركة الأصلية كتبت بواسطة abb طيب انا من ملاك الابيزا 98 ينفع اشارك ولا لا

هو 94 و 98 ايه ما هم واحد وكمان لو حتى معاك بولونيز وعايز تشارك على عينى وعلى راسى بجد انت نورت الموضوع

[abb]

هو بلنسبه لمسعدين الشنطه انا جبتهم جداد من حوالى سنتين وشغلين كويس جدا من عند الشيخ حسن فى الحرفيين وكانوه ب 120 ج صناعه تركيا

[ahmedibeza]

المشاركة الأصلية كتبت بواسطة ايكون سنتر السلام عليكم 1- مفتاح الكونتاكت فيه مشكله وانا مشغلها بزراير مؤقتا سعر الكونتاكت كام ومن عند مين وهل ينفع احاول فيه واصلحه صلح احسن لانة غالي وكمان هتكود وشغلانة في واحد اسمة سعيد في شارع السودان بالمهندسين لو انت من القاهرة 2- العربيه عندى ارتفاعها مظبوط عن الارض بس بتوطا قوى من ورا لما بشيل فيها اى حموله هل ده طبيعى ولا عندى حاجه غلط فى العفشه ورا هتحتاج تغير المساعدين اللي ورا 3- لو فكرت اشترى كرسيين قدام بدل اللى عندى يطلعوا بكام ومنين نجدهم احسن عند السروجي كويس وكمان ممكن يقلبهم طيارة ( ريكارو ) 4- جوز المساعدين بتوع الشنطه اجيبهم جداد احسن ولا استيراد هاتهم استيراد احسن طبعا بس يكونوا نظاف 5- الشبكه اللى قدام عندى مكسوره فى منها جديد ولا ادور لى استيراد الجديدة ب 80 جنية من عند سامح ناشد في شامبليون وسط البلد وهترشها بحوالي 50 ج واي استفسار انا تحت امرك

اكتر من كده ابقى طماع بصراحه انا مش عارف اقول ايه رد وافى اكتر من اللى كنت منتظره بالنسبه لمفتاح الكونتكت فى واحد قاللى هيعمل 200 كنت عايز اعرف كتير ولا قليل بالنسبه للمساعدين سعرهم هيكون كام تقريبا
شكرا للاهتمام والرد