أزاى تتشتم أو تتسبب فى حادثة؟ موضوع تخيلى

[Injection]

من عنوان الموضوع, أزاى تتسبب فى حادثة, هنشرح أزاى تخلى العربيات اللى حواليك عربيات حوادث, وأزاى تجلب على نفسك اللعنات والشتائم بالطريقة المصرية الصميمة.

ملحوظة : الموضوع هزار وفضفضة للحاجات الغريبة اللى الواحد بيشوفها (أو بيعملها) فى الشارع والغرض منه ليس التسبب فى حادثة بجد, أبوس أيديكم لو حد بيعمل حاجة منه بجد يحاول يبطلها أحسن الواحد خلاص هينفجر.

1- لما تبقى فى شارع فاضى, ويفضل من عدة حارات, وفيه عربية قدام, أجرى جامد قوى كأنك هتخبط فيه, وتعالى وراه وأقف على الفرامل, هو هيسمع صوت العجل من هنا وهتلاقيه حدف بالعربية ودخل فى العربية اللى جنبه.

2- وأنت ماشى فى طريق فاضى بالليل, أمشى طافى النور خالص وأمشى بكل هدوء, وأمشى وراء عربية ومتحسسوش أنك موجود, ومرة واحدة كلاكسات ونور عالى وتعلى فى صوت الموتور, مش هتسبب حادثة, بس اللى قدامك غالبا هيضطر يغسل كرسى السواق لما يروح.

3- تبقى راكن موازى للرصيف وقاعد فى عربيتك, وتطلع من الركنة مرة واحدة ولا تبص يمين أو شمال, وهتلاقى يا أما صوت دبببب, أو واحد عمال يقول فى صفات وأسامى حيوانات ولا ليك دعوة بيه وسيبه وأمشى.

4- خليك ماشى فى الطريق عادى زى أى عربية معاك, لغاية ماتلاقى فرصة لغرزة محترمة, وفجأة تقوم كاسر على الحارة اللى جنبك وواخد الغرزة ولا الهواء.

5- دى بسيطة ومشهورة قوى, لف من اليوترن من غير ماتبص على الشارع, وأول ماتلف خد الحارة اليمين على طول ومالكش دعوة برضه باللى بيحصل وراك.

6- يفضل برضه فى طريق صحرواى أو فاضى بالليل, خليك ماشى عادى خالص, وأستنى لما تبقى فيه عربية ماشية وراك, بعدين ألمس دواسة الفرامل بحيث النور بتاعها يولع بس وأحدف يمين جامد, اللى وراك قلبه هيقع فى رجليه من الخضة وبرضه هيضطر يغسل الكرسى.

7- لما تغير زيت أوعى ترمى الزيت القديم, تعالى عند صلاح سالم أو الميرغنى الفجر و أغسل الطريق بيه علشان أصحاب العربيات يتمرجحوا شوية, البقاء لل abs

8- الغرز الصامتة, دى قديمة بس لسه فى ناس بتقع فيها, وزى ماقلنا لما تاخد غرزة لازم يكون اللى حواليك جاهلين بالخياط اللى جواك, يعنى محدش متوقع اللى أنت هتعمله, أول ما تلاقى مكان فاضى وعربية صاحبها بيتدلع وماشى براحة تقوم هوب ضارب الغرزة التمام, واللى وراك يحدف الحدفة التمام.

9- لو بتشرب سجائر أستنى لما موتوسيكل ييجى جنبك وأرمى السجارة من الشباك, بعد حبة تدريب السجارة هتيجى فى الهدف وهتضحك للصبح.

10- متنساش وأنت ماشى حتى لو راكب بى أم الفئة السابعة تعبر عن الزبال اللى جواك وتقوم فاتح الزجاج بكل سلاسة وترمى شنطة زبالة, كنز (يفضل مليانة), كيس,سرير ,جهاز قياس ضغط الدم, ما ثقل وزنه وسهل رميه, 100% هتتفرج على حادثة.

11- متنساش برضه وأنت ماشى فى اليمين أول ماليمين يقف تطلع سواق التاكسى اللى جواك وتكسر على الحارة اللى جنبك, أنت أهم منهم ولازم تلحق تروح رئاسة الجمهورية علشان تحلف اليمين, وكده كده اللى جنبك هيفرمل, نو بروبلم.

12- لو ماشى على رجلك, لازم تبقى عارف أن العربيات فيها دواسة رابعة بتوقف العربية تماما فى جزء من الثانية, أستنى لما تلاقى عربية جاية وعدى من قدامها وهو شايفك ماتخافش هيقف, وياريت تعدى وأنت مدى للطريق ضهرك علشان السواق يشوف عرض كتافك.

13- الرصيف زى ماكلنا عارفين معمول للمحلات والترابيزات والقهاوى والباعة الجائلين وممنوع المشاة يمشوا عليه, الأسفلت معمول علشان المشاة والعربيات, ومتنساش أن الحارة الشمال هى الحارة البطيئة اللى فى الشارع أمشى فيها براحتك.

14- لما تيجى تركن لازم تركن زى الناس فى أوروبا والدول المتقدمة, أنت مستعجل ووراك بلاوى والناس التانية فاضية, سيب العربية نصها جوه الركنة ونصها فى الطريق علشان تلحق تاكل صينية البطاطس قبل ماتبرد, ولازم تسيب حوالى متر قدامك و متر وراك علشان تعرف تطلع من الركنة بسرعة, وعلشان ميجيش واحد غشيم يحكلك عربيتك وهو بيركن.

15- ودى أهم حاجة, دائما وأبدا أمسك شمال, لو ماشى بسرعة أمسك شمال, لو ماشى بالراحة أمسك شمال, لو واقف وبتشترى حاجة من بتاع الجرايد أمسك شمال, اليمين فاضى اللى عايز يعدى يعدى, ومتنساش زى ماقلنا وأنت ماشى على رجلك تمشى فى الشمال, لازم تخلى السواقين يدوسوا على الدواسة الرابعة علشان متصديش من قلة الأستخدام.

16- لما تعدى الشارع على رجليك متنساش تعدى من قدام الأوتوبيسات والميكروباصات, متقلقش السواق عنده رادار فى العربية بيبجيب جميع المشاة والعربيات اللى حواليه, عدى براحتك السواق شايفك كويس على الرادار.

17- لو معاك أصحابك وعايزين تلعبوا من الفضاء اللى أنتم فيه, روح هات كرتونة بيض وسيبها تمشش أسبوعين تلاتة فى الشمس, وخدها وأنزل وخلى واحد يسوق والباقى يحدف, واللى يعمل هاى سكور عالى ويحدف الكرتونة كلها على أكبر عدد من العربيات, هو الكسبان ولو حد سألك بتعمل أيه قول له بعمل عجة للنقيب أدهم صبرى.

18- برضه متنساش قبل ماتنزل من البيت تاخد الحقد الطبقى بتاعك معاك, أول ماتشوف شاب صغير سايق لانسر أو عربية نضيفة تكسر عليه وتطلع دماغك من الشباك "متلاقى أمك اللى جايبهالك", التأثير مضاعف لو أنت واقف على رجليك, ومتقلقش هو مش هيعمل الحادثة قدامك للأسف, لكن كلماتك الرنانة هتخليه يفقد أعصابه ويمشى بغباء ويعمل حادثة أبقى أتفرج عليها على العاشرة مساءا وأنت بتاكل صينية البطاطس أياها فى البيت.

19- متنساش تغسل عربيتك مرتين كل يوم علشان ماتسوس, وتغسلها بميه وصابون وبرسيل فى وسط الشارع, لازم لازم لازم تغرق الشارع كله ميه بصابون, الحكومة مش عايزة لاتنضف ولاتحدد النسل أنت اللى هتحل المشاكل ديه.

20- وأخيرا, لازم تضغط على أعصاب الناس اللى فى الشارع معاك لأقصى درجة, الغضب بيسبب التهور والتهور بيسبب أيه؟, الحوادث طبعا, متنساش تقف فى الأشارة براحتك حتى لو هى خضراء وتتحرك أول مالأشارة تصفر, متنساش تقعد تركن نص ساعة, براحتك الشارع بتاعك, متنساش تقعد تاكل فى غرز وتسخن الناس اللى حواليك, وهكذا بقى.

الواحد مابيعرفش قيمة الحاجة الا بعد مايفقدها, أنت بالطرق دى هتساعد الناس تعرف قيمة عربياتها وأسرتها وأعضائها (ذراع, رجل, ألخ) أنت بتقدملهم خدمة مش هيقدروها غير بعدين, الحياة لعبة والخاسر هو اللى ميلعبش.

[بدر بسيونى]

والله تحفة تسلم ايدك ياباشا

[Injection]

الله يخليك يابدر باشا, وسام أعلقه على صدرى

[Greeni20]

هههههههه الموضوع ده بيمثل ازاى الواحد بيشوف كل يوم الشارع و اغلب اللى سايقين فيه
بس جامد يا ريس انك عرفت تلم كل المواقف دى مره واحده

[xabi]

تسلم ايديك والله...الواحد من زمان نفسه يعمل الحاجات دى بس مش لاقى اللى يشجعه...اخيرا لقيت...احمدك يارب