اشتريت أوبل فيكترا بي 1999 حكايتي معها و محتاجة مساعدتكم فيها

[MaiFarid]

السلام عليكم ورحمة الله،

أن لسة عضوة جديدة هنا، واشتريت الحمد الله من أسبوع أول عربية في حياتي، أوبل فيكترا بي 1999.
أنا مش عايزة أقولكم أني كان بقالي أكتر من 6 شهور بدور على عربية أشتريها لدرجة أني خلاص كنت في مرحلة الزهق الشديد، وكنت كل شهر تقريباً بتبقى في عربية معينة في دماغي وأقعد أدور عليها ولو لقيت واحدة معلن عنها على أي حاجة (انترنت-جرايد-معارف،..) كنت بروح أكشف عليها مثلاً في مراكز صيانة (اللي تقريباً روحتهم كلهم).
من الآخر طلع عيني، وضيعت وقت كتير ومجهود وفلوس واجازات من الشغل.
لحد لما ربنا كرمني بالفيكترا، اللي الحمد لله حسيت أنها فعلاً أحسن من كل العربيات اللي كنت بدور فيها، مع أنها موديل قديم بس بجد تحترم جداً.
أنا سوقت عربيات كل قرايبي تقريباً، الكوري والأمريكي والياباني والألماني حتى الصيني والماليزي (ده علشان أنا بحب السواقة جدا وبحب العربيات عامة)
بس ما شاء الله ربنا كرمني آخر كرم، الحمد لله.

أنا بس كان عندي كام سؤال كده عن العربية وأطمع في كرمكم انكم متبخلوش عليا بالرد، وبما انه دي أول عربية ليا، وبما انه برضه أنا ماليش خبرة جامدة أوي بالعربيات (أنا مش صفر يعني، بس بحكم اني بنت) فأنا يهمني أوي رد خبراء زي حضراتكم عليا.
1- العربية بتاعتي كانت بتاعت دكتورة (من معارفنا القريبين) مبتمشيش بيها تقريباً، لدرجة أنه انا اشتريتها وهي عاملة 55 ألف ك بس الحمد لله، لكن من كتر الركنة اضطرت انها تعمل للموتور عمرة (بسبب أنه الزيوت تآكلت أو حاجة زي كده) أنا بسوق العربية حالياً بحرص شوية و مبزيدش عن ال 70 ك/س، لكن سؤالي هو امتى العربية تكون ليينت تمام و أقدر أزود شوية؟
2- التكييف بتاعها مش حلو، مبحسش بأنه بيسقع أصلاً، في هواء خارج فعلاً بس مش ساقع، ده سببه ايه وازاي أقدر أصلحه؟
3- أنا عايزة أسأل ايه هو اعطالها المتكررة وايه اللي أخد بالي منه بالظبط؟ يعني هو ممكن كل قد ايه اعمل لها صيانة أو اغير لها زيوت أو فلاتر أو عفشة أو ...

أنا أسفة جداً أني طولت عليكم في الكلام، وفي انتظار ردودكم إن شاء الله.

[hamaad]

اولا مليون مبروك على السيارة ولابد من العناية الشديدة بالسيارة وتانى حاجة مبروك على التسجيل فى الموقع .تانى نقطة هى عاوزة فريون لان الفريون من كتر الركنة فى الشمس والتراب فى الشارع لازم الفريون يفضى زى غاز التلاجة فى البيت بالظبط وتالت نقطة لابد من تفضية زيت الفتيس وزيت الموتور وملئهم من اول وجديد وطبعا تغيير سير (التجسمية التكييف)وتغيير فلتر(هواء وبنزين وزيت)والكشف على كهرباء السيارة جيدا وتزويد مياه الرادياتير

[m_elmasoudy]

الف مبروك السيارة الجديدة...

[Dr.Yasser2012]

الف مبروك السياره بس انا لي تجربه مع الفكترا نفس السياره اللي مع حضرتك رحت شفتها عند صاحبها عشان كنت هشتريها بقله دور قال اصل طمبه البنزين عطلانه قللته طيب مصلحتهاش ليه قالي اصل لازم اروح الحرفيين ادور عليها مستعمله لان مفيش جديد شكرته و صرفت نظر عن السياره صحيح سياره قويه المانيه بس ذبحوها بقطع الغيار عالعموم انا مش بخوفك بس حبيت اقلللك تجربتي و ربنا يديك خيرها و يكفيكي شرها

[MaiFarid]

أنا متشكرة جداً على الردود السريعة دي، بصراحة أنا مكنتش متوقعة السرعة دي.

أستاذ hamaad: الله يبارك في حضرتك على أولاً و ثانياً
أنا الأسبوع اللي جاي إن شاء الله هعمل check على كل الحاجات اللي حضرتك قولت عليها، و ساعنها إن شاء الله هشحن الفريون، ميرسي على المعلومة.

أستاذ m_elmasoudy: الله يبارك في حضرتك.

أستاذ Dr.Yasser2012: أنا فعلاً عارفة انه قطع غيارها غالية، أنا عارفة انه الأوبل عامة كده لأني من العربيات اللي كنت بكشف عليها أوبل كورسا السيدان المانيوال والأوبل أسترا الأتوماتيك (اللي فيها حاجة له دعوة بكمبيوتر الموتور لو باظ الواحد يدبس في كذا ألف جنيه)، بس ربنا يستر إن شاء الله، في واحد صاحب والدي بيفهم في العربيات قاللي أنه هيساعدني لو احتجت حاجة لا قدر الله، و ميرسي جداً على إهتمام حضرتك.

بالنسبة لموضوع العمرة بتاع الموتور، الحقيقة أنا عارفة انه مش لازم ازيد عن 70 ك/س بس المشكلة انه انا طريقي سريع (دائري-أتوستراد-كورنيش) ف ساعات غصب عني السرعة بتزيد، وبما اني أصلاً سواقتي مش نونو يعني (للأسف) ف الموضوع ده مع اني ملتزمة به لكن مضايقني قوي فالسواقة، ف كنت عايزة بعد إذنكم أسألكم امتى بالظبط العربية هتبقى جاهزة اني امشي على سرعة عادية، وازاي هعرف انها جاهزة لكده؟
ميرسي مقدماً