اسئلة تهم المبتدئين فى عالم السيارات

[حسام البورسعيدى]

المشاركة الأصلية كتبت بواسطة blackcode_80 بجد اجمد موضوع شوفته فى المنتدى عشان فيه تفاعل من كل الاعضاء ... وربنا يوفقنا للى فيه الخير لينا كلنا ... انا عندى مشكلة حاسسس انها عبارة عن شوية مشاكل صغيرة فى بعضها بس رخمة ومخليانى متضايق عالعربية اوى مع انها ما شاء الله عربية كويسة... المشكلة كالتالى (هحاول اقسمها):: 1- كاسيت العربية بيهيس ... يشتغل كويس وبعد كده وانا ماشى اول ما اخد مطب او اعدى على ارض مش مستوية والعربية تترج بيفصل ومينطقش تانى كانى طفيته والاقى مع الهزات الشاشة بترعش يعنى تنور وتطفى وممكن بعد شوية لو حاولت اشغله تانى يشتغل لحد مايتكرر نفس الموقف . 2- العربية لما تبقى واقفة وهى دايرة بحس برجرجة تبان فى عصاية الفتيس او باب العربية وهو مفتوح 3- وانا ماشى بالعربية واول ما الغيار يجيب اخره وصوت الماتور بيتدى يعلى وهبتدى انقل الغيار الاعلى بسمع صوت تصفير مع صوت الماتور وبعد كده يروح لحد مالغيار اللى بعده يجيب اخره وهكذا ( المشكلة بتبقى واضحة اوى بالاخص مع الغيار الاول والتانى) 4- ودى احدث مشكلة ان العربية مش بتدور غير لما حد يزقها وصحابى قالولى دى مشكلة مارش مش بطاريو لان نور العربية بيولع عادى والعربية واقفة والزجاج كهربا بيشتغل عادى فدى علاجها ايه عشان الكهربائى ميشتغلنيش.. اسف جدااا للاطالة ومستنى ردودكم ملحوظة رفيعة:: عربيتى دايو لانوس2 موديل 2005 شاريها مستعملة من حوالى شهر ونص - الكاسيت ماركة اسمها wolf - سماعات sony و جى إم sony فى انتظار الافادة من خبراء المنتدى الكرام ... محدش يطنش انا مستنى ومش هاتحرك وانتو حرين بقى .... هههههههههههه

اولا موضوع الكاسيت : اكيد فى حاجة مهزوزة (الفيوز او السلك) وهى اكيد مشكلة بسيطة جدا واى واحد بتاع كاسيتات تروحله هيعملهولك وخليه برضه يثبتلك الكاسيت كويس مكانه ...

بالنسبة للاهتزاز : راجع على قاعدة الفتيس وقواعد الموتور ممكن تكون متاكله ومحتاجة تتغير ..

اما موضوع الصفارة ده غالبا سير الدينامو او سير الباور مرخى ومحتاج يتشد او يتغير (سعره حوالى 15 جنيه) ..

بالنسبة لاخر مشكلة دى فعلا غالبا هتكون مشكلة مارش ويستحسن تروح لواحد متخصص مارش ودينامو (مش اى كهربائى) يصلحهولك وباذن الله بسيطة ..


اتمنى اكون افدتك يا باشا واى سؤال تانى تحت امرك ..

[حسام البورسعيدى]

المشاركة الأصلية كتبت بواسطة sayed_7439 والله جزاكم الله خيرااااااا ويجعله فى ميزان حسناتكم. ولى طلب وهو ياريت صور لاجزاء الموتور ووظائفها .عشان الواحد بيسمع عن الشىء ومش عارف ايه ده وشكلة ولا وظيفتة ....وانا عارف انه طلب محتاج يأخد وقت من اللى هيكتبة لكن ربنا يجازيه عنا خيرااااااا وشكراااااااااا

موجود يا باشا ..

المحرك بانواعة
http://www.masrmotors.com/vb/showthread.php?t=35617

الفتيس المانيوال والاتوماتيك
http://www.masrmotors.com/vb/showthread.php?t=36421

[حسام البورسعيدى]

المشاركة الأصلية كتبت بواسطة black_cres لو سمحتوا انا سؤالي مش عبارة عن مشكلة لأ هي كلمة على طول بنسمعها هي 1600 cc أو 1500 أو 1300 cc ايه المقصود بالجملة دي

الـ CC مقصود به Centimeter Cube يعنى سنتيمتر مكعب .. وهى وحده قياس لحجم الموتور (حجم غرف الاحتراق) ..

يعنى لو عندنا مثلا موتور 1600 CC اربعة سلندر يبقى كل كل غرفة احتراق حجمها 400 CC ..

وطبعا كل ما الـ CC يزيد كل ما الموتور يكون اقوى ويستهلك بنزين اكتر ...

[حسام البورسعيدى]

المشاركة الأصلية كتبت بواسطة drmagola موضوع جميل جدا بشكر كل اللي سأل او جاوب انا بقه عندي مشكله في نقل الغيار مثلا ابقي ماشي على التالت و عاوز اهدي و انقل على التاني ادوس دبرياج و فرامل و انقل على التاني و لما اجاي ارف رجلي من على الدبرياج العربية تعمل كأني دوست فرامل جامد و صوت عالي و ساعات تانيه تنقل كويس من غير مشكله انا مش عارف ايه الطريق الصح للنقل مثلا افرمل الاول و بعدين انقل على مهلي لما العربية تهدي و لا ايه حاجه تانيه انا بشد فرامل اليد في المطالع لو واقف و لما اتحرك اجيب الاول و امشي عادي و لما احس ان العربية قربت تمشي انزل فرامل اليد ده يضر العربيه في ايه يعني لو جت على تيل الفرامل مش مشكله لكن انا خايف ابوظ حاجه في الماتور نفسه شكرا مقدما

طبعا واضح يا باشا انك لسه مبتدئ فى السواقة ..

وموضوع الفرملة ده طبيعى جدا فى اى عربية مانيوال ودى معروفه باسم فرمله الموتور engain break وسبب الموضوع ده ببساطه ان سرعة الموتور بتكون غير مناسبة لسرعة العجل (اقل منها) لانك بتجيب التانى على سرعة غير مناسبة (عاليه) ..
علشان كدة لازم نختار الغيار المناسب لسرعة العربية ..



ودى متوسط السرعات التقريبية لكل غيار (تختلف من عربية للتانية)

الغيار الاول : من 0 الى 25 كم/س
الغيار الثانى : من 25 الى 40 كم/س
الغيار الثالث : من 40الى 60 كم/س
الغيار الرابع : من 60 الى 85 كم/س
الغيار الخامس : اكثر من 85 كم/س

وبالنسبة لموضوع فرامل اليد انت كده صح ومش هياثر على تيل الفرامل ولا اى حاجة باذن الله ...

[بانوراما*]

اقتباس:
المشاركة الأصلية كتبت بواسطة EgyZizo
طيب أنا من ساعة ما سقت عربيات من كام سنة ، ولازم رجلى الشمال تبقى مريحة على الدبرياش وقريت قريب ان ده غلط على مجموعة الدبرياش ، بس لقيت ان صعب جدا أخلى رجلى بعيد واشيلها واحطها على الدبرياش لما احتاجه بس ، خصوصاً فى الحتت الزحمة .. فشكلى هارجع زى ما اتعلمت .. انتوا بتعملوا ايه؟


نفس السؤال مع الفارق انى مبتدئة

خصوصا فى الزحمة بتعملوا ايه انا بفضل دايسة على الدبرياج و عند التحرك ببطئ برفع رجلى عنه لنقطة الاحتكاك علشان امشى وارجع اضغط علية عند الوقوف

كدة صح ولا غلط وايه الصح

الرجاء الافادة من الاساتذة الكبار وجزاكم الله خيرا