أستفسار بخصوص غرامات المرور ، ياريت حد يرد عليا و جزاكم الله خيرا

[حنان سعد]

السلام عليكم و رحمة الله و بركاته

دلوقتي يا جماعة أنا ببيع عربيتي لانسر 2007 ، و المشتري قالي ان هو عايز و رقة بدفع الغرامات و كده

فقولتله مش فاضية اروح غير بعد كام يوم ، فقالي انا فاضي هاتي الرخصه و انا اروح أسال بدلا منك

هو أخد الرخصه و دافعلي طبعا عربون ، المهم راح سأل النهاردة ( مرور السلام ) و لقيته بيتصل بيه الصبح بدري بيقولي عليها 950 جنيه

مع العلم ان عربيتي مبتخرجش من ساعة الثورة ، و انا اصلا مبعرفش اسوقها

و كان قبل الثورة عليها سواق امين و كنا مجددين الرخصه و دافعين كل اللي علينا

يبقا منين جت ال 950 جنيه ديه

و كمان دخلت على موقع الأنترنت الخاص بمعرفة المخالفات ، وجدت 126 جنيه بس

فأنا بسأل معقولة المشتري كان هيلعب بالموضوع ده ؟ طيب و ازاي يعني هيطلع شهادة غلط ؟ فأفيدوني و جزاكم الله خيرا

[Hisham.Elgazzar]

مخالفات مخفية من المالك القديم اللى اشتريتى منه العربية
ده مجرد تخمين لأنى سمعت الحوار ده قبل كده مع جارى

[eng/walaaeldeen]

السلام عليكم
اذهبي بنفسك وشوفي المخالفات وتاريخ صدورها لو كانت قبل امتلاكك للسياره هتعملي تسلسل ملكيه ويطالب بها المالك الى قبلك ولو كانت اثناء ملكيتك اعملي تظلم من الممكن ان تقل القيمه المطلوبه
والله المستعان

[حنان سعد]

ربنا يخليكو يلي رديتو عليه

لاه ما انا كنت مغيرة الرخصه قبل الثورة و كنت دافعه كل المخالفات و اصلا العربية انا اول حد يمتلكها

و بعد الثورة كنت ركناها على طول ، يعني مش ممكن تعمل المبلغ ده

للأسف لما قولت للمشتري أني هبعت حد من طرفي ، اتلجلج و قالي يمكن انا اتلخبطت و جبت رقم غلط

بصراحه أنا حزينه أن فيه ناس معندهاش ضمير كده

يعني أنا أمنته ، عشان مش قادرة اروح المرور و خفت الموضوع يتأخر

و أعطيته الرخصه كان عايز يعمل كده عشان يستفاد بالمبلغ ده لنفسه

و قسما بالله ناس عمالة تتصل بيه دلوقتي و عايزين يخدوها بأعلي ما هو واخدها

لكن أنا بحترم كلمتي و بتقي الله و ربنا يعطي كل أنسان على قد نيته

و بجد بجد شكرا ليكم كلكم

[svneleven]

طالما هو مش انسان أمين أعتقد من حقك مش تتعاملي معاه و تبيعي لحد تاني.