اكيد كان قصده حساسات الماتور و هما عامة فى اى عربية
- حساس وضع الثروتل TPS ( وضع بوابة الهواء ) راكب على الاكس بتاع باب زور الهواء و بيعرف الكومبيوتر مقدار فتح البوابة بناءا عليه الكومبيوتر يحدد كمية البنزين عن طريق تزويد زمن فتح الرشاش
- حساس عامود الكرنك + فى بعض العربيات معاه حساس الكامة بتاع الكرنك غالبا بيبقى مستخبى تحت راكب امام عجلة مسننة بتدور مع الكرنك او الكامة ( فى حالة وجود حساس كامة ) و بيبقى لاقط مغناطيسى بيعرف الكومبيوتر وضع البساتم و الصمامات و بناءا عليه الكومبيوتر يقدر يظبط توقيت عمل الرشاشات و البوجيهات
- حساس الضغط المطلق للمانيفولد MAP بيحس بقيمة الضغط الاستاتيكى الى بيعدى فى جسم الثروتل و بناءا عليه الكومبيوتر بيعرف مدى التحميل على الماتور + اثناء السلانسيه الكومبيوتر يقدر يعرف ارتفاع العربية عن سطح البحر من خلال قيمة الضغط الجوى و يعدل التوقيتات بناءا على قيمة الضغط الجوى لهذا الارتفاع
- حساس درجة حرارة الهواء الى داخل للمانيفولد MAT و بناءا عليه الكومبيوتر يتحكم فى كمية الوقود
- حساس الاوكسوجين راكب فى الفرن بتاع الشاكمان و ده الكومبيوتر ميستخدموش الا بعد ما العربية تسخن علشان يظبط نسبة خليط البنزين للهواء انها تبقى تقريبا 1 الى 14.7 لكن و العربية باردة الكومبيوتر بيظبط النسب دى بناءا البرنامج بتاعة اثناء التسخين و بيعتدمتش على الحساس ده علشان كده بيسموا مرحلة التسخين OPEN LOOP على اساس ان الكومبيوتر معتمدعلى نفسه فى تظبيط النسب ( مش عارف بالظبط بس بيبقى البنزين كتير بالنسبة للهواء ) علشان يقدر يحصل احتراق اثناء برودة غرف الاحتراق ( و ده يفسر ريحة البنزين الى من الشاكمان و العربية باردة لان الاحتراق مش كامل ) و بعدين لما العربية تسخن و الحساس بيسخن و يقدر يحس بنسبة الاكسوجين ساعتها الكومبيوتر بينتقل لوضع ال CLOSED LOOP الى فيه بيعتمد على الحساس الى بيعرفه نسبة الاكسوجين فى العادم ( طبعا لما نسبة الاكسوجين تقل معناه ان الاحتراق بيتحسن لان الاحتراق المثالى - الكامل - بيبقى ناتجة مفيهوش اكسوجين) فيقوم الكومبيوتر يتحكم فى نسب البنزين علشان يقدر يظبط النسبة المثلى ما بين البنزين و الهواء للوصول للاحتراق المثالى
معلش انا اكتشفت ان الموضوع طويل ( لسة فى حساسات تانية بس دول كانوا مهمين ) لو حد عنده استفسار ان تحت امره
03-05-2010, 09:34 AM
رد: سؤال عن الحساسات فى الفيرنا
