اريد حلا لمشكلتي مع توكيل كيا

[um alshohadaa]

السلام عليكم
معلش يا جماعة انا معرفش كتيير في العربيات لكن السيراتو ماشيه كويس معايا لحد دلوقتي
لكن مشكلتي الحقيقية مع التوكيل وبالخصوص مع قسم السمكرة
انا امنت على العربية شامل تبع الشركة نفسها
ولما ودتها عشان تتصلح من خبطة حصلت ليها فضلت يوم كامل لحد لما عاينها مندوب شركة الامين في فرع ابو رواش
رغم انهم بيطلبوا العربية من الصبح بدري (8.30 لحد 10.30 )والمندوب بيجي بعد الساعة 2 ظهرا تخيلوا طول الوقت ده في الإنتظار!!!!!!
وبعد كده لازم 10 ايام بعد ما تسلم العربية ويبتدوا تصليح فيها!!!!وقلت لأن في ضغط عليهم يمكن؟؟؟؟؟؟؟
وبعد كده لما جيت استلم العربية كانت المفاجاة اني فضلت يوم كامل مستنية العربية تيجي عشان استلمها وكل لما اسال يقولوا مرة بتتلمع ومرة بتتغسل ومرة في الطريق
وبعد لما جت الساعة 2 الظهر لقيتها لسة ما خلصتش (لسة الفانوس هايتركب وبعدين تتنضف من جوه)ولما قلت طيب ليه قولتولي آجي اليوم استلمها؟؟؟
قالولي انهم بيسلموا بعد الساعة 3 طيب ما انا اتصلت الصبحالساعة 8.3 ما قولتوش ليه؟؟؟؟؟؟؟؟؟؟؟
تخيلوا يعني الواحد يقطع المسافة دي كلها ويفضل متعطل هو والناس طبعا اللي موصلينوه عشان طبعا هم مشغوليين يقولوا للعملاء تعالوا الساعة 2 أو 3
وتخيلوا لو في مشكلة كمان يبقى مجبر يروح ويرجع يوم تاني لأن الفرع بيقفل الساعة 4 بعد الظهر
المهم
المشكلة اني اتسرقت في التوكيل كنت سايبة المفتاح في الميدالية الفضة وبعدين بسال فين الميدالية يا جماعة؟؟
انتخيلوا قالولي ايه أنتي ماضية انك اخدت كل متعلقاتك من العربية؟؟؟؟
طيب لكن الميدالية مش في العربية وبعدين حتى لو نسيت اشيلها هو ده معناه اني اتسرق ؟؟؟؟؟
وكمان ايه لقيت البنزين ناقص من العربية لكن هاقول ايه حسبنا الله
المهم لما وديت العربية بعديها باسبوعين (وكنت ما خرجتش بيها لأني كنت مريضة وما بنزلش من البيت) واتخبطت تحت البيت
تخيلوا وانا بسلمها لقيت العدة مش موجودة في العربية ازاي يا باشمهندس انا مش فاهمة هي مركونة من يوم ما استلمتها؟
اتسرقت هي كمان؟؟
قالي غلطتك انك ما راجعتيش ورا المهندس اليي سلمك العربية ؟
واحنا اللي بيشتغلوا عندنا ناس محترمة (بدليل سرقة الميدالية)
يعني انا اللي بسرق حاجتي وباتهمهم فيها تخيلوا!!!؟؟؟
بصيت تاني في محضر الاستلام لقيت انهم معلمين في اماكن انها مخبوطة وهي مش كده؟
بقول للمهندس قالي: لأ هي مخبوطة بس انتي ما اخدتيش بالك؟؟؟؟
ولما كلمت الشكاوى قالولي نص ساعة وهانرد عليكي
بعد ساعة ونص اضطريت اروح للقسم واسال قالولي المدير في اجتماع
- طيب انا عايزة ايصال الاستلام تشوفوه لأنه غلط
طيب هانبعت نجيب العربية (وخد معاك كمان ساعة وشوية عقبال ما يجيبوها)
وبعد ما جت عايزين يصلحوا الوصل اللي معايا بس طيب ليه انا عايزة معاينة من تاني لأن الاولى غلط واكون موجودة مع المهندس اللي بيعاين
المهندس زعل ومدير الشكاوى قالي هابعت معاك مهندس تاني قلت طيب

المفاجأة

العربية عاملة حادثة ومخبوطة والرفرف اليمين مطبق

وكل ده ومن غير ما يبلغوا العميل ولا يحققوا مين السبب؟ ولا ازاي عربية بقالها ساعة ونص بس مسلماها للتوكيل تعمل حادثة زي كده ؟
ومش عايزة اتكلم على طريقة المعاملة سواء بعد كدة ولا وقت ما كنت باحاول اكلم قسم السمكرة ومهندسين الإستقبال والتليفون اللي ما حدش بيرد عليه والعطلة

وانا دلوقتي مش عارفة اتصرف مع التوكيل اللي المفروض يحافظ على العربيات مش يخبطها ويحافظ على متعلقات العربية مش يسرقها وانا لله وانا اليه راجعون

افيدوني افادكم الله

* معلش انا حاولت اختصر في اللي حصل قدر الامكان عشان ما اطولش عليكم وما كتبتش غير الخطوط العريضة للمشكلة بس.
والسلام ختام

[zaraki]

ربنا ينتقم من اصحاب الضمائر الميتة
وربنا يعينيك وتعرفى تخدى حققك ان شاء الله

[اشرف عبدالهادي]

أعتقد أن الرد الطبيعي على كل اللي قلتيه هو أنك تخاطبي شركة كيا.. لأن هي الشركة المصنعة وهي الاسم اللي لازم تحافظ عليه.. والتوكيل هو وسيط فقط بين الشركة المصنعة والعميل اللي هو حضرتك.. ومسئولية التوكيل انه يحافظ على اسم الشركة.
ممكن حضرتك تدخلي على موقع كيا على الويب وفي الأسفل contact us واكتبي شكواك وأكيد مش هيتهاونوا لأن دي سمعتهم

[um alshohadaa]

جزاكم الله خيرا أستاذ أشرف و zaraki