حد قفل ال 100 ألف كيلو باللوجان

[أشرف المصري]

المشاركة الأصلية كتبت بواسطة EgyZizo أنا عملت 53 ألف والعربية معايا من 3 سنين بالظبط.

طيب ما تكلمنا عن العربية هل هي مريحاك ولا مغلباك ؟ هل وجدت مشاكل في العثور على قطع الغيار ام لا ؟ هل اسعار قطع الغيار مناسبة ام هناك مغالاة في اسعار قطع الغيار ؟

هل تنصح من يريد الشراء بشراء اللوجان ام لا ؟

[hamaad]

ياريت تقولنا يا باشا على مميزات السيارة من فضلك

[EgyZizo]

المشاركة الأصلية كتبت بواسطة أشرف المصري طيب ما تكلمنا عن العربية هل هي مريحاك ولا مغلباك ؟ هل وجدت مشاكل في العثور على قطع الغيار ام لا ؟ هل اسعار قطع الغيار مناسبة ام هناك مغالاة في اسعار قطع الغيار ؟ هل تنصح من يريد الشراء بشراء اللوجان ام لا ؟

شوف أنا هاجاوب على كل أسئلتك، بس علشان أكون أمين معاك مش أنا الشخص المناسب اللى انتم منتظرينه علشان يطمنكم بخصوص العربية.

لأنى عملت 53 ألف فى تلات سنين إلا اسبوعين بالظبط .. يعنى مازلت حتى هذه اللحظة تحت مظلة الضمان و انتوا عارفين ان الضمان بيشيل بلاوي

الشخص اللى انتم منتظرينه واللى المفروض يتكلم مش مهم يكون عمل كام كيلو بالعربية ، المهم يكون عاش أد ايه ويا عربيته بره الضمان واتعامل مع اعطالها ازاى فى الظروف دى.

على سبيل المثال عربيتى احتاجت تغيير قطعة معينة فى وقت ما .. رحت التوكيل وغيرتها ببساطة بدون أى تكلفة، والمشكلة خلصت ، بس أنا فكرت يا ترى لو أنا بره الضمان كانت الأمور هتمشى ازاى .. هنا لقيت نفسى قلقان لأن الإجابة ماكانتش مريحة.

يتبع ..

[EgyZizo]

والآن إلى الإجابة عن تساؤلاتكم :

العربية بصفة عامة مريحانى

آدائها مقنع ليا جداً سواء على الطرق السريعة أو جوه البلد ، فى السفر الطويييييل أو المشاوير الصغيرة.

ثبات العربية وتسارعها مرضى بالنسبة لى ، وارتفاعها عن الأرض ميزة كبيرة بتخللى من الصعب انها تحك فى المطبات ، مع ان ده ممكن يحصل لما تكون محمل الحمولة كاملة، ويكون المطب من المطبات الغلسة.

الحمد لله طول التلات سنين دول ماورتنيش ولا موقف بايخ وده ادانى ثقة أكبر فى العربية.

استهلاك البنزين معقول جداً ، وبينى وبينكم أنا على طول بأمون بنزين 80 إلا قليلاً لما مش بألاقيه والدنيا ماشية معايا تمام ومش متعور خالص فى البنزين. (دى مش نصيحة انكم تمونوا 80 ولا حاجة ، المصنع بيقول 91 وانت طالع ، بس أنا باحكيلكم اللى أنا باعمله فقط لا غير).

التكييف كويس ، بس كان نفسى يكون أحسن من كده شوية ، لأن فيه أيام بتبقى حر قوى والتكييف مش بيستر فيها خصوصاً للى قاعدين على الكنبة الخلفية واللى للأسف غالباً بيكون فيها حماتى

يتبع ..

[EgyZizo]

نصيحة مخلصة : اهتموا بالصيانات الدورية فى مواعيدها ، علشان تحافظوا على العربية وعلشان تحافظوا كمان على الضمان اللى هو حاجة مهمة جداً زى ما هاوضح.

أنا استفدت من الضمان فى التالى :

• بعد 3 شهور من عمر العربية ، حسيت بخبط فى المطبات فى العربية من قدام ، وكان المساعد باظ وجاب زيت ، وغيروه فى الضمان بدون أى تكلفة ، وكان سعره ساعتها 550 جنيه.
• فيه عيب مشهور ومتكرر فى العربية ، وهو ان بعد ما تمشى بضع عشرات الآلاف من الكيلومترات بيحصل خلل فى بوابة الانجكشن Throttle body وتلاقى العربية تبطل لوحدها لما تكون على السلانسيه ، وأحيانا الـ rpm يعلى لوحده ، ودى أعراض تستلزم تغيير البوابة. وده حصل معايا لما وصلت لـ 50 ألف ، والحمد لله غيرتها برضه فى الضمان بدون تكلفة بالبوابة الجديدة. وعرفنا ان البوابة الفابريكة صناعتها مش أد كده ، وان البوابة الجديدة اللى بيتم تركيبها مافيهاش المشاكل دى
• فيه بعض العربيات برضه (خصوصاً فى الموديلات الأولى) بتحتاج تغيير طنبورة الدينامو وسير الدينامو .. لأن برضه طنبورة الفابريكة يبدو ان عمرها مش طويل وبتعمل مشاكل مع التقدم فى عمر العربية ، والحقيقة التوكيل بينصح بتغييرها حتى بدون ما العميل يشتكى من حاجة لو كانت من النوع الردئ، وده حصل مع ناس كتير من زمايلنا. لكن اللى حصل معايا مختلف ، وهو انى لما نهاية الضمان قربت وماحدش طلب منى تغيير الطنبورة ، رحت الصيانة وطلبت من المهندس يكتب فى الاوردر : طلب الكشف على الطنبورة ، وفعلاً صدق حدسى وطلعت من النوع الردئ وغيروها مع سير الدينامو بالطنبورة الجديدة اللى مش بتعمل مشاكل. على أى حال موضوع الطنبورة ده مابقاش موجود فى العربيات الجديدة اللى بقت تنزل بالطنبورة المعدلة.
• فيه برضه عيب متكرر وحصل معايا ومع زملاء كتير ، وهو انك تلاقى مؤشر الحرارة مش زى ما انت متعود ، المفروض بعد ما العربية تسخن ، يبقى على أربع شرط ، لكن انت بتلاقيه نزل لشرطتين شوية ورجع تانى لأربع شرط ، وده بيبقى عيب فى ثرموستات الكوعة ، وبيستلزم تغيير الثرموستات + الكوعة ، ودول برضه غيرتهم فى الضمان.

الحاجات دى كلها على فكرة (ماعدا عيب المساعد) حصلت معايا فى الشهرين الأخيرين فقط ، وكانت العربية يادوب عدت 50 ألف ، والحمد لله لحقتها قبل ما الضمان يشطب .. علشان كده بألفت نظركم لأهمية المحافظة على الضمان بالمحافظة على الصيانات الدورية، لأنهم قبل ما كانو يغيروا لى حاجة ، كانوا بيتأكدوا من كل الصيانات (المدفوعة بالذات اللى هى العشرات) ، وكانوا فى كل مرة بياخدوا كتيب الصيانات ويصوروها قبل ما يقرروا يعالجوا المشكلة تحت مظلة الضمان.