أرجوك يا مالك السيارة .. صلح فوانيسك وانوارك اول بأول ومتكسلش لمصلحتك

[eaglenest]

سواء كشافك الامامي او الخلفي او واحد فيهم كان عطلان لازم تجري تصلحه ده لحمايتك ومصلحتك لان بسببه ممكن تخسر حاجات كتيير وهحكيلك حكايتين واحدة حصلتلي والتانية شوفتها ...
اولا الحكاية اللي حصلتلي .. كنت ماشي ورا عربية فولجس فاجن يعني ايه اللي راكبها الله يسامحه المفروض ميستخسرش فيها حاجة .. المهم ماشيين في امانة الله طالعين كوبري ونزلة الكوبري نازلين بسرعة وهوبا هوه ضرب فرامل وهوه بيتكلم في الموبايل والباشا كان نور الفرامل مش شغال عنده وانا نازل بكل سرعتي وطبعا مش مخون لغاية ما اتفاجأت ولقيت عربيته بتقرب مني اوي وبسرعة رحت هارس الفرامل اللي عندي وقبل ما اوصله شديت الهاند بريك والعربية كانت ممكن تتقلب لا قدر الله كل ده بسبب لمبتين ب 5 جنيه ... والحمد لله

ثانيا الحكاية اللي شوفتها كانت حادثة على الطريق ولاني فضولي من ناحية الحوادث علشان نتجنبها فحبيت اعرف السبب .. المهم
النور قاطع كالعادة في مصر والطريق رايح جاي وعربية ميكروباص عاوزة تعدي من عربية كارو وفيه عربية جاية مقابل ومش مشغل الا النور اليمين لان الشمال بايظ والميكروباص افتكره موتوسيكل وقام معدي وهوبا رشقوا في بعض ....والحمد لله مفيش الا اصابات بس محدش توفى الحمد لله والعربيتين وشهم ضاع وده بسبب لمبة

أنا قولت اجي انقلكم الخبر واحذركم من حاجة بسيطة ممكن لا قدر الله تسبب مشكلة كبيرة ... ومننساش كلنا نقول كما قال سيدنا يعقوب عليه السلام .. فالله خير حافظاً وهو أرحم الراحمين ........

[sherifabden]

كلامك مضبوط والله
وفي بتوع مكروباصات الله يحرقهم بجاز يكون منور فانوس يمين والفانوس الشمال بايظ والواحد من بعيد يفتكروا موتوسيكل ويمشي عادي حصلتلي الحكاية دي بس الحمد لله المرايا خبطت في راسي راحت المرايا اتكسرت بس الحمد لله راسي تمام لقيت سواق المكروباص نازل وبيقول حاسب ياعم
طبعا انا دمي اتحرق ومسكته ونزلت فيه ضرب وشتيمة
والله لولا ولاد الحلال منعوني كان ممكن اقتله
وتشكر على المعلومات القيمة اللتي لا يتبعها احد !!!

[YahiaAshraf]

الف شكر يا باشا على النصيحه الهامه

[white cosmo]

كلامك مظبوط والله **


والله خير حافظ ***

[momen_bondok]

انا الحمد لله عندى مرض إسمة الكشف على الفوانيس كل مرة أطلع بالسيارة تقريباً لدرجة إنى بشعر إنى منبوذ من اصحاب المحلات اللى بيشفونى بعمل كدة بس فعلا الموضوع دة مهم جدا
وكما تفضلت بسبب لمبة لا تتعدى الخمسة جنية ممكن تكلفك حياتك وحيات أخرين حفظنا الله من الحوادث