رائيكم فى غطاء العربية الوتربروف ( البلاستيك)

[Hisham.Elgazzar]

المشاركة الأصلية كتبت بواسطة samirayad الحقيقه أحسن غطيان معمره ....هى الرخيصه والمصنعه من القماش العادى غسيل ومكوه بمعنى الكلمه

:fun_36 _3_11[1]:Eng.samirayad

[miam0502788391]

حاجة كمان بتقصر من عمر الغطاء الوتر بروف , طبعا بعد ماحضرتك بتكشف السيارة لازم تلفه وتلمه داخل الشنطة , العملية دى بتزود التشققات فى الغطا ومرة بعد مرة ومع الركنة فى الشمس تلاقى الغطا اصبح كهنة
الفرق بس ان الغطا الغالى بيستحمل شوية لكنه فى كل الأحول مش معمر

[tham1010]

كدة انا اخذت مقلب محترم. انا كنت فاكر هيقعد الغطاء كام سنة. أنا جبت غطاء قماش قبل الوتر بروف والغطاء كان زى الشاش بمعنى ان الصبح تلاقى التراب نزل من الغطاء على العربية زى المنخل. الغطاء كان 60 جنية بس كان رقيق جدا وهذا كان المتاح للعربيات الماتركس. من الصعب إيجاد غطاء للماتركس نظرا لشكل العربية المختلف عن السيدان العادى. الغطاء القماش ابو 60 جنية قعد 6 شهور وبعدها بدأ يتقطع وينسر وينقر وبدأت احط اكياس بلاستك تحت الحتت المقطعة وكان مكان الكيس هو المنطقة الوحيدة اللى مش بيكون فيها تراب.

أنا جبت الوتر بروف لسبب واحد وهو انه يمنع نزول التراب تماما لانى كنت بنظف العربية بغباء لو سبت العربية متغطية بالقماش اسبوع الاقى العربية زى ما يكون غرقانة فى التراب ومستخبى فى كل حته حتى مكان المفتاح واكرة الباب .

هكون راضى لو قعد الوتر بروف سنتين. ولكى لى سؤال وهو هل التنظيف للغطاء بيطول عمرة ولا اسيبة والتراب يحمية يعنى يكون علية طبقة تمسكة شوية؟؟ كمان هل يمكن خياطة الغطاء أو ترقيعة فى حالة القطع؟

شاكر لكل من قام بالرد

[miam0502788391]

المشاركة الأصلية كتبت بواسطة tham1010 هكون راضى لو قعد الوتر بروف سنتين. ولكى لى سؤال وهو هل التنظيف للغطاء بيطول عمرة ولا اسيبة والتراب يحمية يعنى يكون علية طبقة تمسكة شوية؟؟ كمان هل يمكن خياطة الغطاء أو ترقيعة فى حالة القطع؟ شاكر لكل من قام بالرد

نصيحة بلاش موضوع غسيل غطا الوتربروف لأنه بيتقل والطبقة الداخلية بتشرب المية وفين على ما تنشف وممكن وهو منشور يتشقق بسبب تقل المية اللى هو تشربها , فقط وانت بتشيلة حاول تنفض التراب من عليه فقط او بواسطة البلاور زى ما بتعمل ولما تلمه فى الشنطة خلية ياخد اكبر مساحة ممكنة علشان ميكسرش ويتشقق
الترقيع ممكن ترقعه وممكن خياط ياخده قطان على الحواف بتاعته وتخليه يصبر فترة اكثر
النصيحة الأخيرة حاول تركن العربية فى مكان ضل بقدر الامكان

[RAYAN]

ياباشا مش عارف اقولك ايه بس يمكن اللى هقوله يفيد حد تانى غيرك ( غطاء ووتر بروف مبطن بملتون = سكة = مقلب = من ثلاثة الى اربعة اشهر بدون شقوق او تقشير ودة لو ركنت الغطا فى البيت والعربية فى الشارع ) , غطاء للسيارة يعنى حاجة تحميها من الخدوش والاتربة والامطار وخلافه , ولكن الغطاء الووتر بروف عايز حاجة تحميه وبعدين يبقى يحمى العربية , اسف على الاطالة ولكن نصيحة لاى حد ناوى على غطاء معمرررررررررررررر يعنى ممكن يوصل عمره الى اكثر من عشر سنوات وبنفس مقاس السيارة يبقى يخلى باله من الكلام اللى جاى :
غطاء تفصيل ودة بيتفصل من قماش الخيام ( قماش دك تقيل , يفضل اللون الابيض ) صحيح هو غالى حبتين لكن فعلا ثمنه فيه , ولا يشرب مياه ولا يسرب اتربة وقطن فبيحافظ على جسم السيارة ويتغسل فى الغسالة سبعين مرة ولا يكش ولا يقدر يتكلم , ويفضل اللون الابيض لانه افضل فى عزل الحرارة عن باقى الالوان يعنى تشيل الغطاء وتركب العربية تلاقيها تلاجة حتى لو راكن فى الصحراء الغربية , ملحوظة الدك درجات خفيف - وسط - تقيل , كلهم تمام لكن افضلهم الوسط لان الخفيف عمره قصير والتقيل صعب فى لمه من على العربية وفرق السعر بينهم جنيه او اتنين فى المتر .
تقبلوا تحياتى ,,,,,