سانديرو / كنت مكتئبة وأنا بختارها دلوقتى الحمد لله مزقططة

[myson medo]

بسم الله

أولا بصراحة أنا كنت مكسلة أعمل تقرير
يعنى نقول شوية كسل على شوية إن فى حاجات مش هعرف أتكلم فيها
المهم أخيرا قلت هعمل على قد ما أعرف وأهو أكيد برده هفيد ناس كتير لأن انا نفسى بحثت كتير عن أى موضوع عن السانديرو لكن مكنش فيه مواضيع كتير

بصوا بقى أنا طبعا كنت راكبة نيسان صنى 2011 وبصراحة كنت بحبها قوى لثباتها وعلوها وشوية حاجات كده . المهم
انا بقالى شهووووووووووووور بشترى وكنت حجزت الصنى الجديدة ولغيت الحجز لانها معجبتنيش ولا من بره ولا من جوه وبصراحة كنت كل اما ارو اشوفها أتضايق منها واستخسر فيها الفلوس

المهم شلتها من دماغى وقلت هجيب صنى القديمة تانى بس لقيتها غليت قوى برده
قلت خلالالالالالالالالالالالا لالالالاص عليا وعلى اللوجان والسانديرو
بصراحة كنت كل اما اقرا الاقى شوية شكاوى من اللوجان بس مش من كل الناس وتقريبا كان فى الموديلات القديمة واعتقد اتصلحت حاليا لان مفيش شكاوى حاليا .

بس مكنتش بلاقى مواضيع كتير عن السانديرو المهم كنت محتارة جدا جدا
اجيب لوجان ولا سانديرو - انا عارفة ان الاتنين من جوه واحد بس من بره اختلاف فى الشكل

طبعا كنت كارهة شكل اللوجان بس كنت مترددة علشان الشنطة
وطبعا كنت حابة شكل السانديرو بس مترددة لصغر حجم الشنطة
قعدت فى الحيرة دى شهور تانية وأخيرا رحت تانى اشوف اللوجان ومش ارتحتلها وقررت اشترى السانديرو مع انى مش شفتها غير على النت وتوكلت على الله

والحمد لله هى معايا بس لسه مش رخصت
هقول عى شوية حاجات فيها لمستها
1- العربية شكلها الحمد لله عاجبنى ولذيذة وشبابية
2- العربية ثابتة بجد وماسكة نفسها كده مش تحس انها ملخلخة
3- المطبات انسى بقى عالية وأحسن من الصنى كمان
4- البنزين بجد الحمد لله حاسة انها فعلا موفرة مع انى لسه فى الاول يا دوب عملت 500 كيلو او ازيد شوية
5 - مكان الكلاكس مش مضايقنى خالص زى ما كنت معتقدة
6- امكان ازرار الزجاج الامامى والخلفى برده مبسوطة بيهم قوى وحاسة انهم كده هيعمروا أكتر بعيد عن التراب والمطر وخصوصاً لو كان مطر على تراب
7- فرش العربية جميل شكلا واعتقد بيستحمل كمان
8- كاسيت حلو طبعا غيروه عن القديم وفى بلوتوث وكمان يو اس بى
9- فتحات التكييف حلوة قوة علشان التراب
10- الدرج مساحته حلوة وأكبر من بتاع الصنى الجديدة
11 - المفاجئة بقى ان الشنطة مطلعتش صغيرة زى ما أنا كنت معتقدة بجد فرحت بيها قوى
12- فى كمان زرار بيعمل لوك للازاز اللى وراء علشان لو فيه أطفال

ده اللى أنا فاكراه دلوقتى وكل أما أتذكر حاجة أو أكتشف حاجة هدخل وأقولها ان شاء الله
وقفلة الباب حلوة على فكرة حستها أحسن من الصنى بصراحة
وطبعا العربية فيها ايموبليزر
وعلى فكرة كمان انا لقيت ورقة فى العربية مكتوب عليها بالانجش صنع فى فرنسا
واعتقد فعلا زى ما كنت بسمع انها فرنساوى على عكس اللوجان متجمعة فى المغرب
والله اعلم

يارب اكون أفدتكم ولو بالقليل
معلش انا مركبتش أنواع كتير علشان اقيم قوى بس هى عجبانى الحمد لله وحاسة انها على قد اللى دفعته وعلى الاقل انا راضية عن اللى دفعته فيها

وبقييييييييييييييييييت مزقططة : 10FEE3~144:

أشوفكم على خيـــــــــــــــــــــــ ــــــــر

[ezzat2002mo]

الف مبروك وشكرا على التقرير المتميز بس ياريت لو كان فيه صور علشان بصراحة الصور بتنعش الموضوع وعموما الف مبروك وعقبال لما تعملى بيها ال 300 الف

[zamanan2000]

الف الف مبروك ربنا يباركلك فيها ويكفيكى شرها
بس هى سعرها عامل كام واستلمتي بعد اد ايه
وياريت لو صورتين تلاتة بقى علشان نتفرج عليها ونباركلك بجد وتلاقى الهداية عمالة ترف
: 12A96E~160:

[myson medo]

المشاركة الأصلية كتبت بواسطة ezzat2002mo الف مبروك وشكرا على التقرير المتميز بس ياريت لو كان فيه صور علشان بصراحة الصور بتنعش الموضوع وعموما الف مبروك وعقبال لما تعملى بيها ال 300 الف

الله يبارك فيك
معلش بقى على موضوع الصور بس ان شاء الله احاول اصورها وانزلها فى موضوع تانى
والله المستعان
وشكرا لييييييييييك

[myson medo]

المشاركة الأصلية كتبت بواسطة zamanan2000 الف الف مبروك ربنا يباركلك فيها ويكفيكى شرها بس هى سعرها عامل كام واستلمتي بعد اد ايه وياريت لو صورتين تلاتة بقى علشان نتفرج عليها ونباركلك بجد وتلاقى الهداية عمالة ترف : 12A96E~160:

الله يبارك فيك
انا استلمتها بعد يومين لانى جبتها فورى للاسف يمكن لو كنت حجزتها كان احسن لكن المشكلة انى قعدت شهور على ما اخدت قرار السانديرو
الحمد لله

سعرها 86 ونص بس هى عند القصراوى ب86
وان شاء الله احاول اصورها واعمل موضوع بالصور
وشكرا ليييييييييييييك