ملاحظات مشترى جديد للسيراتو SX 2010

[aaet1]

السلام عليكم،
حبيت أكمل معاكم فى الموضوع ده لغاية صيانة الألف واللى عملتها النهاردة فى فرع الوكيل بأبو رواش، بصراحة رغم انى ساكن فى صلاح سالم وروكسى على بعد خطوتين منى ... يعنى ممكن أتمشى للوكيل فى روكسى وشايل العربية فى جيبى بس من كتر ما سمعت وقريت عن الفروق فى التعامل بين الفروع الثلاثة فضلت أبو رواش

المهم أنا كنت اتصلت بيهم الاسبوع اللى فات وادونى معاد الثلاثاء الساعة 9:30 ولما سألت آجى قبل الميعاد بفترة يعنى بأسبقية الوصول قالولى لأ تعال فى الميعاد وحصل

وصلت هناك الساعة 9:15 وكنت مجهز شوية أسألة واستفسارات وبمجرد ما دخلت الساحة لقيت واحد طلب منى أفتح الكبوت وثوانى جالى مهندس اسمه Mohammed H وشه كده مريح قابلنى بابتسامة وسألنى أى صيانة قولتله الألف راح داخل جاب ورقة وفتح الشنطة وبص على الاستبن ولف حوالين العربية وهو بيبصلها من كل ناحية وراح مالى الورقة دى ومضانى عليها وعرفت انها ورقة بيسجل فيها إيه الحاجات اللى موجوده فى العربية وإيه اللى مش موجوده زى اثبات وجود الاستبن والطفاية والكوريك والاريال ... ألخ
كمان لقيت رسمه فى الورقة بيحط عليها أماكن أى خدوش أو تطبيقات شافها فى جسم العربية
طلب الرخصة وسجل بياناتها ورجعهالى فورا وبعدين سألنى عن أى استفسارات أو ملاحظات
1- سألته عن صوت الشكمان سمعه معايا وقالى عادى جدا
2- سألته عن انى مرة سمعت خبطة مش تكتكه مع دوسة جامده للفرامل فقالى هو المفترض انه ال ABS لكن برضه هنراجعلك عليها
3- سألته عن سماعى لصوت تزييقة صغيرة بمجرد ما أنتقل من وضع الوقوف للحركة قالى عادى وبتريح وبتختفى مع الوقت
4- سألته عن موضوع تركيب الانذار وانى سمعت اشاعات أنه واطى قالى هو فعلا واطى شوية بس مش قوى
5- كنت عاوز أشيل شدادة السحب الخلفية أو أتنيها علشان قرفانى فى الركنة ضحك وقالى صعب ده ملحومة مع الشاسيه
6- سألته عن ESP اللى متشال من العربية واللى نفسى اركبه فقالى هو طبعا مهم بس مستحيل يركب لأن توصيلاته مع الموتور والعجل وحاجات كتيرة، وادانى مثال على الفرامل ال ABS فى العربيات اللى مش نازلة بيها انهم مرة حسبوا التكلفة لقوها وصلت لـ 27000 جنيه

وبعدين قالى على الحاجات اللى مفروض تتعمل فى الصيانة وهى تغيير الزيت والفلتر وتربيط العفشة والتشييك على العربية وبحسب تعبيره من الاكصدام للإكصدام وكمان غسلها هى والموتور

بصراحة الراجل كان متعاون جدا وصدره رحب وابتسامته سابقة كلامه ...سبته وكانت الساعة وصلت ل 9:30 لقيت واحد ساق العربية ونزل بيها لمكان الصيانة وأنا نزلت الاستراحة

الاستراحة واسعة ونظيفة وتحس انها فى مستشفى فيها تليفزيون وبوفيه صغير وشاشة عليها أسماء مالكى العربيات اللى بيتعملها صيانة دلوقتى وقدام كل واحد مواصفات عربيته وموقف العربية إيه دلوقتى وكاتبين جنب عربيتى ان التسليم هيكون 01:00 وهم معلمين موقف العربية بأربع ألوان بيظهروا جنبها
لون معناه ان العربية دخلت الصيانة ولونين تلاتة كده م قادر افتكر معناهم والمهم فيه لونين أخيرين واحد الFinal control والأخير أخضر معناه أن العربية أصبحي Ready

بعد حوالى ساعة وربع لقيت لون Final control ظهر جنب عربيتى ومافيش ربع ساعة لقيت عربيتى اختفت أصلا من على الشاشة .... خير اللهم ما جعله خير .... العربية راحت فين ..... طلعت الاستقبال لقيت المهندس ده برضه سألته قالى ان ده معناه ان العربية خلصت وبتتغسل دلوقتى وانى ممكن أروح ادفع الحساب عقبال ما تخلص ... رحت فعلا دفعت التكاليف وكانت بالظبط 295 جنيه

طلعت وقفت فوق بعديها بربع ساعة لقيت العربية فعلا طلعت واللى سايقها راح راكنها وحط المفتاح فى الباب وسابها
المفترض انك لما تدفع الحساب هيدوك إيصال لازم تسلمه عند البوابة وانت خارج علشان يسمحولك بالخروج

المهم بصيت على العربية بصراحة غسلوها كويس من بره وكمان بدرجة معقولة جدا من جوه ... كانت بتنقط
بصيت برضه على الموتور ... بسم الله ماشاء الله بيلمع من الغسيل

سقت العربية ولسه بقول ياهادى هخرج افتكرت حاجة .... بصيت على كتالوج الصيانة مالقتش أى امضاءات ولا ختم انهم عملوا صيانة الألف .... خدوا بالكم من الحاجات دى لأنهم بينسوا المهم رجعت وسألت المهندس محمد لقيته بيقولى آه طبعا لازم يكون فيه امضاء وختم وبالفعل حصل

خلاص كده .... أخدتها وطلعت بره ولسه بقول ياهادى رميت عين على ترمومتر حرارة الجو الخارجى لقيته بيقول 20 درجة .... 20 مين ياعم دى الحرارة ماتقلش عن 30 .... لفيت ورجعت تانى وعلى أخونا المهندس محمد رحت وسألت ضحك وقالى طبيعى لأن العربية مغسولة واستنى شوية وهو هيجيب معاك قراءة صح ..... وحصل فعلا بعد كده

ملاحظاتى على العربية بعد كده طوال السكة فى الرجوع لغاية صلاح سالم تانى وميدان لبنان ورمسيس واقف تقريبا وما بيمشيش ... العربية أعتقد سحبها بقى افضل شوية ولو انى ماكنش ليا ملاحظات على سحبها قبل كده .... معدل استهلاك البنزين لغاية ماوصلت كان جايب بالتكييف طول السكة على درجة 20-21 معدل الاستهلاك كان جايب 12 ... أعتقد كويس مع طول الوقفات اللى وقفتها بدءا من ميدان لبنان لغاية صلاح سالم لدرجة انى اخدت مسافة من ضمن السكة بتاع 6 كيلو بس فى حوالى ساعة ونص

المهم ملخص الموقف كالآتى
1- حسيت ان الناس محترمين فى التعامل رغم ان ردودهم مش القاطعة الماحقة بس بيريحك ويمكن أن ماحستش ان فيه مشكلة قوى علشان حدود استفساراتى ماكانش عالى أو كنت بسأل لا قدر الله عن مشاكل جامدة
2- الوقت اللى خدته العربية من ساعة مانزلت لغاية ماطلعت تانى حوالى ساعتين إلا ربع واستلامها كان قبل الوقت المحدد لها بساعة ونص
3- الاحساس بوجود اختلاف فى العربية ماكنش واضح قوى ليا

ملاحظة أنا فتحت موضوع تانى باسم "عملت صيانة الألف" هتلاقوا حضراتكم فيه نفس الكلام بس أنا حبيبت أقفل الموضوع الحالى واختمه بصيانة الألف

تحياتى للجميع

[Dr. Bolbolan]

السلام عليكم يا أخى

معظم اللى حصل معاك حصل معى بالحرف واقرأ موضوعى برده عن صيانة الآلف !

بس فيه نقطه ! أنا جربت ابو رواش و بعدين جربت روكسى ولم أجد هناك فرق يذكر !

بل أنا نفسى ارتاحت لروكسى أكثر ! و كفايه لما اضطريت أسيب السياره ليله عندهم فى

روكسى ! روحت البيت ب 5 جنيه ! أما فى أبورواش ! كان زمان الديابه والتعالب عملوا

على شخصى الضعيف وليمه !

Dr. Bolbolan ptmnlo123per1106