ملاحظات مشترى جديد للسيراتو SX 2010

[aaet1]

السلام عليكم، نكمل
زى ماقلت لحضراتكم توكلت على الله وقررت أجيب ال SX وكيل بجنط 17 وحساسات
ولأنى عمرى ما سقت اتوماتيك قبل كده فضلت أجيب معايا واحد قريبى فى الاستلام
ويوم الاستلام لقيت الموزع بيقولى ان الوكيل لسه مبلغه ان ضغط العجل يكون على 26؟؟ بصراحة استغربت بس قلت طيب حاضر وهبقى أتاكد من الوكيل بعد كده
قالى برضه ان ال أر بى ام خلال ال 1000 الأولى ماتخلهاش تزيد عن 3.5 ... ماشى

من ناحية اللون كنت عاوز أجيب اللون الفيرانى اللى بيسموه titanum silver ولكن لأنى مالقتوش جبت الموكا Metal bronze وبصراحة حمدت ربنا لأن اللون ده فعلا أحسن كتير من الفيرانى لما تقارنهم حنب بعض وبشهادة كل اللى شافوه

المهم استلمتها بزيادة 1000 جنيه عن الوكيل نظير التسليم الفورى، ماعلينا، واستنيت يومين على الترخيص ويومها بالليل كانت أول تجربة ليا بيها وأول حاجة لاحظتها ان العفشة مش ناشفة بالشكل الفظيع اللى سمعته، تانى حاجة كنت مهتم آخد بالى منها متوسط استهلاك البنزين حسب ماكمبيوتر العربية بيقول، يومها نزلت لفيت بيها جوه مدينة نصر بين عباس ومكرم وكان الخميس والشوارع زحمة ولاحظت ان المعدل فعلا كان بين 12-13 لتر لكل 100 كيلو

تانى يوم كان عندى سفرية العين السخنة قلت كويس للتليين فرحت أولا محطة بنزين ونزلت ضغط العجل لـ 26 (بالمناسبة كانوا مظبوطين على 40-45) وحاولت طول السكة مازودش عن 100، بصراحة العربية سحبها حلو وبتستجيب بسرعة على عكس ما أنا متعود أسمعه عن الاتوماتيك

وأنا راجع قلت لنفسى ما أجرب موضوع الحدفة، سبت الطارة لقيت فعلا فيها ميلة خفيفة جدا ناحية الشمال ... بس بصراحة ممكن الطريق يكون مأثر وبرضه لاحظوا انى ماحستش بالحكاية دى طول ما إيدى على الطارة

المهم بعد شهر من السواقة عليها ملاحظاتى الآتى:
1- العربية ماتورها قوى وسحبها حلو وسيبوكوا من رأيى، أنا طول عمرى بسوق مانيوال لكن أنا هسترشد برأى اتنين أولهم قريبى اللى استلم العربية معايا (هو بالمناسبة معاه نيسان صنى 2008 أتوماتيك وساق قبل كده بيجو ومرسيدس) ولما سألته عن العفشة والسحبة وبدون مجاملة قالى العفشة مش ناشفة ولاحاجة (بس بصراحة احنا كنا ماشيين على طريق نظيف وبدون مطبات جامدة) والسحب برضه حلو جدا
التانى كان أخويا (كان معاه قبل كده اوبترا اتوماتيك وكان مقروف من سحبها وحاليا لانسر اتوماتيك ومبسوط من سحبها) أول ما ساق العربية ومن غير ما أسأله قالى سحبها كويس جدا

2- الكبوت تحتيه الدنيا شيك ومنظمة جدا

3- الشنطة واسعة وممكن توسعها أكتر من خلال الشدادتين الموجودين جواها كل واحدة فيهم بتتنى نص من الكنبة الخلفية

4- الجنوط ال17 عاملين شغل جامد جدا فى شكل العربية وبصراحة لاحظت ان وجودهم بيفرق بشكل واضح فى الاحساس بفخامة العربية وكبرها بالمقارنة بالجنط 16 أو 15

5- الكابينة من جوه واسعة ومريحة وعزلها رائع واول ماتقفل الشبابيك هتلاقى نفسك فى دنيا تانية من ناحية الصوت ولكن بدون مايمنع عنك الاحساس بالخارج وكمان عزلها من ناحية الهوا رائع لدرجة انك اول مابتقفلها بتحس ان الدنيا كتمت جوه ولازم تولع التكييف بس بصراحة قلت أستنى ال 1000 الأولى
كمان عاجبنى السندات اللى فى الكنبة الخلفية ابو كبايتين وجراب النظارة وأنوار الكابينة الأمامية والوسطانية وأنوار الشماسات
التابلوه جميل والأنوار فيه عاملة شغل والكاسيت صوته قوى وكنت قريت ان ال USB بيعمل مشاكل أو بيفصل ساعات مع الكلاكس جربته ميت مرة وماحصلش
عجبنى كمان مخرج الكهرباء ال 12 فولت اللى بيريحك من استعمال مخرج الولاعة
أماكن التخزين جوه الكابينة حلوة سواء الموجودة فى التابلوه أو بين الكرسيين الأماميين أو الجزء الصغير الموجود عند فتحات الولاعة والUSB وكمان الموجودين فى الأبواب
عجبنى موضوع الحساس الموجود فى إزاز الشبابيك اللى بيخلى الإزاز يرد لتحت تانى لو حاجة وقفت فى طريقة وهو بيقفل

6- ظهر العربية مش واطى ومش عالى قوى واللى مضايقنى فيه شدادة السحب الموجودة تحت الشنطة واللى بتمنعك وانت بتركن عمودى على الرصيف وفى ظل الأرصفة العليا فى بلدنا من انك تريح ظهر العربية فوق الرصيف .... نفسى أشيلها ولا أتنيها لفوق

7- أول مرة أحاول أركن بين عربيتين موازى للرصيف كانت فضيحة بسبب ارتفاع ظهر العربية وحسيت انى لسه بتعلم سواقة واتضحلى بعد كده ان الاعتماد على الحساسات والمرايات الجانبية هما أفضل حاجة وهتخليك تركن كويس وبراحتك بدون مشاكل لكن اللى ضايقنى على الرغم من وجود 4 حساسات ان آخر مستوى فيهم بعيد يعنى مع الصفارة الطويلة بيبقى لسه وراك بتاع 40 سم ... لكن مع الوقت هتتعود

8- نسيت اقول لحضراتكم على استهلاك البنزين واللى لغاية دلوقتى بقيسه من واقع كمبيوتر العربية ... لما كنت على طريق العين السخنة وأول ما وصلت لاحظت ان متوسط الاستهلاك واللى كان جوه البلد من 12-13 نزل مع الطريق الطوالى لحد 6.2 ... طبعا رائع وبالمناسبة حايلا جوه البلد بيتراوح مابين 10-12 وأعتقد ان بعد صيانة ال1000 وقدام شوية لما الماتور يلين هيتحسن

9- الوكيل: ليه عندى ملاحظتين
الأولى انى بعد مارجعت من سفر العين السخنة بعت إيميل بسألهم فيه على ضغط العجل المناسب وعلى اشاعة المقصات الضعيفة وفوجئت باتصال من عندهم واحد صوته كبير وبيعرفنى بنفسه بأنه مدير الصيانة بالشركة وأولا قالى على المقصات ماتسمعش الاشاعات انت راكب عربية محترمة مش توك توك وثانيا بالنسبة لضغط العجل قالى يكون على 32 ولما سألته على الحدفه قالى ظبطه على 32 وبعدين اختار طريق معدول ونظيف وخلى السرعة على 60 وعد من 1-10 وبدون فرامل وقيس الحدفة تانى
وبرضه من نفسه كده قالى معلش هتلاقى العفشة ناشفة شوية ولكن بعد ال 5000 هتفرق معاك كتير وهتلين ولما سألته عن استعمال النيتروجين فى العجل قال لى استنى عليه لغاية 2000 او 3000 علشان تحس بتأثيره بس طبعا هو أحسن
برضه قالى استعمل التكييف لو تحب بس أنا من نفسى كده برضه قررت ما استعملوش إلا بعد الألف وخصوصا الجو لسه مش محتاج.

الملاحظة التانية على الوكيل: ان أى مرة بعد كده بحاول أتصل بيهم وأطلب حد من الصيانة أسأله على حاجة بطلطع على التليفون لغاية ما يفصل أو يتقالى معلش ماحدش فاضى .... طبعا قلة زوق متزوقة وهشوف بقى اللى هيحصل فى صيانة ال 1000

وللحديث بقية

الف مبروك يا باشا ربنا يديك خيرها ويكفيك شرها

[soloforever77]

1000 mabrouk

[Dr. Bolbolan]

مبروك السياره الجديده ! نحن السابقون وأنتم اللاحقون !

1- ازاى يا راجل جنط 17 و كاوتش عريض و تخليه ضغطه 26 ؟؟ ده ح يقلل السحب ويزيد جدآ

من استهلاك البنزين ! السياره معى داخله على 8000 كم والعجل على مقاس 32 زى الكتاب ما بيقول !

2- فعلآ مع الوقت العفشه بتتحسن وانت بتاخد على العربيه !

3- ما تشغلش بالك بموضوع الحدفه الخفيفه دى ! ودى بالتجربه سببها عدم ضبط هواء فرد الكاوتش زى

بعض بالضبط ! لآن طبعآ كل المحلات هنا فيها الآسطى بليه و معدات قياس و نفخ متهالكه ! دور على مكان

نفخ اطارات محترم !

4- استهلاك البنزين داخل البلد حسب الكومبيوتر عندى عمره ماعدى 11 لتر/ 100كم وفعلا على الطريق وصل

الى 7 لتر/100 كم ! بس أعتقد ده استهلاك تراكمى ! يعنى مش لحظى ! يعنى بيحسب لك التغير مع طول التريب !

5- ماتسمعش كلام محبط كتير و نفض للمشككين زى أنا ما عملت فى عز الهجوم على السيراتو واستمتع بسيارتك !


Dr. Bolbolan ptmnlo123per122

[على توفيق]

السلام عليكم ورحمة اللة وبركاتة
انا عضو جديد وقد لفت نظرى تقريرك الرائع جدا وعاوز اذكر بعض الملاحظات لانى من مستخدمى السيراتو منذ عامين لانى كان معايا سيراتو ex موديل 2008فتحة سقف وفى الحقيقة كانت مريحانى لكن كانت مشكلتى معاها فى حاجتين
1 الفرامل كانت لما بكون على سرعة متوسطة وادوس فرامل كانت العربية بتزحف ولما كلمت التوكيل سئلت قالو انها علشان مش abs بس الرد دة مكنش مريحنى لانى مكنتش بجرى بيها قوى علشان تعمل كدة وللاسف دة كان السبب فى حادثة حصلتلى من اسبوعين على الطريق الدائرى اتسببت فى تقريبا ضياع العربية لانها دمرت الجزء اليمين الامامى لدرجة انها جابت شاسية يمين وللشهادة لولا انها عربية عضمها قوى مكنتش ابقى موجود فى الدنيا لان كل اللى يشوف العربية يستعجب انى لسة عايش ومعنديش خدش واحد وللة الحمد المهم ان الحادثة حصلت لنفس السبب وهوا انى كنت على سرعة 100ك بس كان فى مسافة كبيرة بينى وبين المكروباص اللى دخلت فية بس لان العربية زحفت يجى 30متر بعد ما دوست على الفرامل ودخلت فى الميكروباص
2 المشكلة التانية اللى كانت بتقابلنى مع العربية انها مع مرور الوقت تقريبا بعد 10000الى 12000 الف كيلو ابتدى سحب العربية يقل وخصوصا لما كنت بشغل التكييف ولما سئلتهم فى التوكيل قالولى ان دة عادى جدا
اللى قالقنى حاليا انى بعد الحادثة معايا سيراتو 2010 بتاعة اخويا لغاية ما اجيب حاجة جديدة وشايف فيها نفس العيب فى الفرامل لانها كاتيجورى بدون abs وبردو بحس ان الفرامل فيها مش اد كدة وبعدين مش مريحة زى الشكل القديم فكنت عاوز استفسر عن اذا كانت الكاتيجوى الاعلى اللى فية abs حضرتك شايفة كويس ولا فية مشاكل وبعدين اذا كان فى حد معاة سيراتو الشكل الجديد وبقالة فترة بيستعملها يقولى هل السحب بتعها زى ماهى جديدة ولا بيتغيير مع الوقت وعاوز راى حد فى ايهما أفضل أجيب كيا سيراتو الشكل الجديد ولا اجيب كيا كارينز وبعدين عاوز لو حد عندة معلومة عن اذا كانت سيراتو 2011 هتكون مختلفة عن الموجودة دلوقتى ولا هى هى لانى ليا تجربة سابقة انى اشتريت كيا سيراتو 2008فى شهر 11/2008 وبعدها بكام شهر نزل الشكل الجديد وطبعا انتو عارفين ان لما ينزل شكل جديد بياثر على سعر القديم خصوصا فى البيع
عموما انا اسف على الاطالة وخصوصا ان دى أول مشاركة لى وأرجو من اى عضو اذا كان عندة معلومة ما يبخلش بيها
وشكرا جزيلا
ملحوظة مهمة
2008 كنت بروح للتوكيل فى ابو رواش بحس انى التوكيل كلة مستنينى وبيحاول يساعدنى
وطبعا بعد الحادثة الاخيرة لما روحت علشان اعمل مقايسة اصلاح للعربية واجراءات شركة التامين وخلافة حسيت انى فى سوق الجمعة
محدش عاوز يرد عليك
واذا كنت بتدور على مهندس المسئول عن سيارتك تدخل للورش تدور علية وتنزل تحت وتطلع فوق وناهيك عن التليفون لدرجة انى فضلت اتصل من الساعة 12.30لغاية 2.30 من غير ما السيد المهندس ما يرد لدرجة انى من غيظى روحت التوكيل ودخلت الورشة ولقيتة قاعد على مكتب فى الورشة وقدامة طبور من العملاء ولما قلتلة على انى بكلمة اكثر من ساعتين سواء على الموبايل او على الارضى قالى انة لوحدة النهاردة وعلية ضغط كتير
تخيلو المفروض توكيل كبير والعملاء بتوعة فى ازدياد والعاملين فية فى تناقص هى دى مصر طبعا المهم انى لغاية النهاردة ما اخدتش المقايسة لكن مهندس التوكيل بيقولى انها حادثة جسيمة والعربية لازم تتهلك لان تكاليف الاصلاح تتعدى الحد المتاح للاصلاح
علشان كدة انا قلت لغاية ما تتم الاجراءات اكون استقريت على اللى انا هجيبة وخصوصا انى حاليا بستعمل عربية اخويا السيراتو 2010اللى انا قلت عليها
اسف مرة اخرى على الاطالة