انا و الكوبلن الأنتقام الكبير - للكبار فقط +18

[ramy safwt]

سلام عليكم

قصتى مع الكوبلن اللى مطلع عينى كالتالى طلعت سفرية فى شهر مايو طويلة حبتين لحد مرسى مطروح رجعت لقيت الكوبلن بيطقطق

قولت اشوف الميكانيكى " كنت بثق فيه و كده للأسف " قالى اجيبلك كوبلن استيراد قولت لا قالي يبقى انزل هاته من الحرفين نزلت اشوف كوبلن - العربية فولكس جول مايلى - رحت اشتريت كوبلن بكوتشه و شحم و غوياش ربط حديد ب 225 رحت للميكانيكى ركب الكوبلن الجديد و طلع الكوبلن القديم رماه فى الارض و فرط البلى بتاعه و قالى ضاعو


بعد اسبوع بالظبط الكاوتشه اتقطعت و الكوبلن طقطق

رحتله تانى قالى اشترى كاوتشه ب 20 ج رحت جبت كاوتشه و ركبها و بعد يومين فكت لأنه ربطها بأفيز و بعد ما فكت الكوبلن طقطق تانى

قولت مفيش فايده رحت رايح لميكانيكى غيره و جبت الكاوتشه القديمة كانت سليمة اصلا و خليته ركبها لكن الكوبلن كان ضاع لأن معدنه سئ و بعد ما سئلت فى السوق اكتشفت ان الكوبلن اللى اشتريته مضروب

الميكانيكى كان عاوز يلبسنى فى طقم كبالن يمين و شمال داخلى و خارجى بالاكسات ب 970 ج لاحظو انى دفعت 225 تمن كوبلن و 60 تمن تركيبه و 20 تمن كاوتشه و 40 تمن تركيبها و 50 تمن تركيب الكاوتشه القديمة و كمان عاوزين يلبسونى فى 970 ج


هنا قول استوب لن اكون ضحية مرة اخرى



جبت الكوبلن القديم اللى الراجل رماهولى على الارض - فاكر الفلوس دية بتطلع على الشجرة -

قولت اتبع اسلوب علمى بحت

احدد سبب الخلل
احدد الحل المناسب بعد دراسة ابعاده
اطبق ده
اختبر النتائج الاولية
اختبر النتائج النهائية


المهم عشان احدد سبب الخلل عملت التالى

1- غسلت الكوبلن بالاوكتان لحد ما بقى يبرق و فكيته من بعضه بالشكل ده



" اللى عاوز يعرف اتفكت ازاى ده قصة و ليها عادلة معينة بتتفك بيها "

2-حطيت اجزاء الكوبلن تحت ميكروسكوب كمبيوتر سوبر اى 200 اكس تكبير بالشكل ده



" لو كان ينفع يدخل جوه ميكروسكوب المسح الذرى كنت دخلته لكن حجم العينة ضخم جدا فأكتفيت بنتائج الميكروسكوب العادى "

3- دية كانت الفضايح اللى طلعت

استراكشر السبيكة كله من ناحية الحروف متفرتك



اخاديد طولية و فى طريقها للتشعب و بوادر صداء عالية جدا




تشوه للكريستال استراكشر و هبوط اجزاء من المعدن



تهتك فى نقط متفرقة لسطح المعدن






احدد الحل المناسب بعد دراسة ابعاده

بالمنظر اللى انا شوفته ده لقيت انه مستحيل اى عملية لحام تجدى فى الكوبلن ده

ده غير ان اللحام و التسخين هيغير الخواص الفيزيائية كلها للسبيكة " بدون نقاش هنا "

كان الخيار الوحيد انى اشيل الطبقات الخربانة دية كلها و اعوض اللى شيلته ده ببلى اعلى فى العيار فيقوم الكوبلن بوظيفته صح

قولت خير تعال نقيس على الميكروسكوب ليقت انى محتاج اشيل 431 جزء من الالف ملى يعنى لما نقربهم لأقرب عيار بلى صحيح لازم اشيل 500 جزء من الالف ملى الرقم ده لازم يضرب فى 2 عشان انا هشيل من الناحيه دية و الناحية دية 500 يعنى هزود عيار البلى بمقدار واحد ملى صحيح يعنى من 14 و نص ملى ل 15 و نص ملى على حسب قياس الكوبلن اللى عندى

قولت يا رب و بداء ارسم الكوبلن على الاوتوديسك تمهيدا لأعداد ملف السى ان سى على مكانتى المتواضعة

و جيت ارفع بقى مقاسات الكوبلن بالديجيتال كالبر " البكولويز - الأدمة " طبعا لقيت ان القياست اللى برفعها فيها اريور يخلى كل شغلى ده ملهوش معنى ده غير انى مش هعرف امسح الجسم كله بالميكروسكوب ده هياخد وقت مرعب


قعدت محتار اعمل ايه لحد اما ربنا الهمنى بفكرة كنت فاكرها فى الاول مريحة

اطبق ده


1- جبت صنفرة اكسيد المونيوم " صنفرة حدادى ناعمة " و مشيت بيها على كل اجزاء الكوبلن رايح جى 7 ساعات من المجهود و تعذيب الصوابع و كل شوية امسح بالميكروسكوب اشوف وصلت لحد فين

2- لحد اما خلصت و شطفت الكوبلن كله ما عدا "الغويشة " دية ليها شغل مختلف تانى لأن طبيعة معدنها مختلفة تماما عشان يكون واضح انا استهلك صنفرة قد ايه انا كنت شارى 3 متر صنفرة استهلكت حوالى نصه




" الغويشة " كان لازم تتجلخ جبت حجر جلخ من طقم المكنة السى ان سى و جبت اقرب مقاس للزوايا بتاعة الغويشة و ركبته على "دريل عادى " و جلخت و انا بدعى ربنا انه ميطلعش " شرزه " واحدة لأنه لو طلع شرزة كده خربت



3- و بعد كده جبت حجر جلخ تانى عشان المشوار نفسه بتاع الغويشة




4- بعد ما اطمئنيت على كل حاجه رحت غاسل الكوبلن كله فى زيت تروس بدون ما اسخن ولا ابرد ولا اعمل اى شغل هندى بس غشلة نضيفة


5- نزلت " السبتية " اشترى عيار بلى جديد جبت 6 بليات كل واحده ب 5 جنيه و ركبتهم
" ملحوظة فى طريقة لتركيب البلى بدون اى عنف و بدون اى كبس "

و بقى الكوبلن جاهز للمراحل الاخيرة




6- مليت الكوبلن كله بزيت التروس تانى نفس اللى غسلت بيه و بعد كده بداءت عملية تكوين طبقة رقيقة من الزيت حولين كل اجزاء الكوبلن عشان احافظ عليها من التأكل و ده ملهوش علاقة بالشحم انا بتكلم فى الاجزاء الاساسية انت بتشترى الكوبلن بتلاقيه متغلف بالطبقة دية

المهم عملت الاتى مليت الكوبلن و بعدين جيت على الكوباية بكاوية الهوت اير "SMD " و "دفيت" الزيت و قلبته بالهواء حولين كل اجزاء الكوبلن لا سخنت ولا بردت و لا حطيت زيت مغلى بس هواء دافى و خلاص



7- صفيت الكوبلن من الزيت و قولت اختبره اختبار اولى


الاختبار الاولى

قلبته على وشه و بدون المسه من جوه لقيت الغويشة بتتحرك مع الهز بتاعى بالاجزاء كلها و بتدى زوايا على حسب الهز و التميلات اللى بعملها هنا اطمئنيت ان الدنيا تمام


الاختبار النهائى

كلمت الميكانيكى قولت اعمل الاختبار النهائى و اركبه بقى نفسي اعيش حرام العذاب ده لقيت الميكانيكى بيقولى انا مش شغال انهارده و بكره اجازة يا بيه تعال يوم الاثنين

الى ان يتم اختبار هذا عملى يوم الاثنين او حسب مزاج فخامة البيه الميكانيكى يعد كل ما سبق لا قيمة له



تحياتى لمن اهتم بالقراءة و الاطلاع

[sayed2077]

بجد موضوع تحفه فعلا وللاسف اغلب مشاكل قطع الغيار اللى بتنزل السوق مش فى انها الفينش بتاعها مش نضييف اووى على اد ما ان سبيكة المعدن اللى بيصنعوا منها مبتكونش مطابقه للمواصفات والاحمال والاجهادات اللى هتقع عليها وده طبعا علشان يسترخصوا وبتكون سبيكه المعدن مليانه شوائب مهببه ومثلا علشان اشرح بطريقه ابسط مثلا سلاح الكلاشنكوف الروسى المصنوع منذ عام 1948 ممكن تلاقى كلاشنكوف شغال بقاله 70 سنه لغاية النهارده بكفائه عاليه جداااا ودخل حرووب عديده وفى الاخر راحوا بايعين الاسلحه ديه لحركات التمرد ولحركة طالبان والسلاح شغال مبيقولش لا فى حين مثلا لما تيجى تشوف كلاشنكوف زى التصنيع الصينى لو ضربت اكتر من خمس طلقات ضرب مستمر هتلاقى الماسوره سخنت جداااااا ولو فكرت تكمل لنصف الخزن يبقى بتضحى بحياتك لان يأما الماسوره تنفجر وربنا يسترها والطلقه متجيش فيك ياما الماسوره تنفجر بس ساعتها الطلقه هترد فيك طيب ايه الفرق ما بين الكلاشنكوف الروسى اللى عايش 70 سنه شغل متواصل وما بين الصينى وانواع اخرى مصنوعه فى بلاد اخرى رغم ان التصميم موحد فى كل البلاد اللى بتصنع السلاح ونفس طريقة العمل وكل حاجه الفرق هنا هو سبيكة المعدن اللى بيتصنع منها السلاح الروس عاملين سبيكة معدن خاصه بيهم فقط حاجه كده خرافيه ومكونات السبيكه ديه سرية درجه اولى وحتى لو بلد جت تشترى حقوق تصنيع السلاح فالروس بيديلهم مخطط التصنيع ولكنهم مش بيديلهم مكونات سبيكة المعدن الاصلية وبجد احييك على الموضوع الاكثر من رائع وشغل علمى درجه اولى فعلا واعتقد انه افضل من اننا نملى الكوبلن معدن ونخرط لان نسبة الفشل هتبقى كبيرة اكبر من النجاح بسبب اختلاف المعدنين وبجد جزاك الله خيرا على انك نشرت حاجه زى كدا بس عندى سؤال هل زاويه تحرك الكوبلن هتقل عن الاول ولا هتبقى حركته طبيعية

[ramy safwt]

المشاركة الأصلية كتبت بواسطة sayed2077 بجد موضوع تحفه فعلا وللاسف اغلب مشاكل قطع الغيار اللى بتنزل السوق مش فى انها الفينش بتاعها مش نضييف اووى على اد ما ان سبيكة المعدن اللى بيصنعوا منها مبتكونش مطابقه للمواصفات والاحمال والاجهادات اللى هتقع عليها وده طبعا علشان يسترخصوا وبتكون سبيكه المعدن مليانه شوائب مهببه ومثلا علشان اشرح بطريقه ابسط مثلا سلاح الكلاشنكوف الروسى المصنوع منذ عام 1948 ممكن تلاقى كلاشنكوف شغال بقاله 70 سنه لغاية النهارده بكفائه عاليه جداااا ودخل حرووب عديده وفى الاخر راحوا بايعين الاسلحه ديه لحركات التمرد ولحركة طالبان والسلاح شغال مبيقولش لا فى حين مثلا لما تيجى تشوف كلاشنكوف زى التصنيع الصينى لو ضربت اكتر من خمس طلقات ضرب مستمر هتلاقى الماسوره سخنت جداااااا ولو فكرت تكمل لنصف الخزن يبقى بتضحى بحياتك لان يأما الماسوره تنفجر وربنا يسترها والطلقه متجيش فيك ياما الماسوره تنفجر بس ساعتها الطلقه هترد فيك طيب ايه الفرق ما بين الكلاشنكوف الروسى اللى عايش 70 سنه شغل متواصل وما بين الصينى وانواع اخرى مصنوعه فى بلاد اخرى رغم ان التصميم موحد فى كل البلاد اللى بتصنع السلاح ونفس طريقة العمل وكل حاجه الفرق هنا هو سبيكة المعدن اللى بيتصنع منها السلاح الروس عاملين سبيكة معدن خاصه بيهم فقط حاجه كده خرافيه ومكونات السبيكه ديه سرية درجه اولى وحتى لو بلد جت تشترى حقوق تصنيع السلاح فالروس بيديلهم مخطط التصنيع ولكنهم مش بيديلهم مكونات سبيكة المعدن الاصلية وبجد احييك على الموضوع الاكثر من رائع وشغل علمى درجه اولى فعلا واعتقد انه افضل من اننا نملى الكوبلن معدن ونخرط لان نسبة الفشل هتبقى كبيرة اكبر من النجاح بسبب اختلاف المعدنين وبجد جزاك الله خيرا على انك نشرت حاجه زى كدا بس عندى سؤال هل زاويه تحرك الكوبلن هتقل عن الاول ولا هتبقى حركته طبيعية

اى مخترع بيأمن نفسه بسر السبيكة و البرمجة و طرق التصنيع و المعلومات دية مش شرط تتحط فى طلبات براءة الاختراع

دية كلاشات عبط الصين دية عاوزة تتمسح من على الخريطة

لا مش هتقل لأن التفتيح هيكون فى الكوباية لحد الاخر و ببساطة كده اللى حطيناه بلى كنا شايلينه من المجرى فهيفضل زى ما هو على زاويته ده وضح عندى فى الاختبار الاولى

انا منتظر فخامة البيه الميكانيكى عشان اختبر بشكل نهائى على الطريق

[wael890610]

: THUMBS~220:

[Hisham.Elgazzar]

موضوع رائع فى واحد صاحبى بيصلح كبالن بيملا النجمة والغويشة بلحام استانلس ويقلب الغويشة والكوبلن بترجع كفائتة 60%
اما الصنفرة أخدت وقت كتير اوى بس هيفضل البوش برضو
البلى الجديد هيحكم شوية مع ضرورة كبس الكوبلن بشحم جرافيتى او شحم مطاط