صنى الأختيار الأمثل

[dahab]

يا جماعة السلام عليكم أولا
ثانيا موضوع إستهلاك البنزين في الصني
الناس كلها بتردد الكلام ده و بس
أنا معايا صني 2010 من الزيرو وعملت قبل كدة مشاركة في المنتدي و كتبت إستهلاك البنزين من صفر حتي 10000 كم أحيانا الصفيحة كانت بتعمل 320 كم عن تجربة
أما عن السيارة نفسها فهي إعتمادية بشكل كبير جدا وعفشتها تتحمل الطرق الغير ممهدة بجانب علوها الملحوظ عن الأرض مقارنة بمثيلاتها

[dr_eslam_66]

أنا معاك جدا وموافقك في التفكير المنطقي لأني شكل حضرتك كدة قررت عن تفكير مش لأنك مرتاح لدا أو مابتحبش دا.
بالتوفيق وألف مليون مبروك مقدما.

[ahmed_rahem]

الف مبروك مقدماً، ولو انت كمان بتسافر كتير يبقى استهلاك البنزين هيقل (على الطرق الطوالى بدون شد وجرى وسرعات متوسطة من 90 وحتى 120) وممكن تعدى 220 كيلو فى الصفيحة ، وصلت معايا فى سفر لالااسكندرية 260 كيلو فى الصفيحة وكانت العربية لسة معملتش 5000 كيلو.
ويالنسبة للكلام على التقفيل المصرى، حالياً التوكيل بيغير اى حاجة تشتكى منها. لو فى الصيانة داخل القاهرة انصحك بالسبع فى المعادى، وبلاش مودرن فى ابورواش الفترة دى لانهم بيعملوا تجديدات والمكان فية هرجلة.

والسلام ختام

[ahmadkamal2]

انا معايا صني سوبر صالون 2009 عاملة 45000 كيلوا الشكل الجديد انا بحب اوضح حاجات مهمة جدا
اولا : نيسان في مصر بتصنع في مصنع نيسان المملوك بالكامل لنيسان اليابان مدير المصنع نفسة ياباني
ومعظم المهندسين يابانين يعني حجة التقفيل المصري اللي دايما يتكرر غير مبررة لان الناس دول ملتزمين وعمرهم ما هايضحوا بسمعتهم.

ثانيا: اكذوبة ان العربية غول بنزين انا باعمل 380-400 كيلو جوة البلد 30-33 لتر بنزين ولما باسافر اسكندرية رايح جاي 35 لتر من 450-480 كيلو. وعلسان توفر فى البنزين خليك على اقل من 3000 RPM.

العربية دي انا سعيد جدا بيها لها مميزات كثيرة منها انها اعتمادية جدا تستحمل السفر شنطة العربية واسعة جدا ودة اللي مخلي العربية ضيقة شوية فى الكرسى الخلفي التكييف تلاجة ولم يعطل مرة واحدة ولكن هناك بعض الاجراءات كلى تحافظ على التكييف فى فصل الشتاء لابد من تشغيل التكييف مرة واحدة علي الاقل لمدة 10 دقائق كل شهر غسل السربنتينة بالماء كل فترة كل 20000 الف راجع علي شحن الفريون فى التوكيل.

سحب العربية ممتاز لكنة بيتاثر جدا بحاجتين في الاول بالبطارية عشان كدة انا بنصح بتغيير البطارية السائلة ببطارية جافة بعد السنة الاولى. لما العربية تجي تشد وتجري بتتاثر جدا بفلتر الهوا علشان كدة انا كنت بغيرة كل15000 الف وبنضفة كل 2000 كيلو ببلور هواء علشان انتم عارفين مشكلة التراب فى مصر. وبعد كدة العربية بتبقى طلقة وبتجيب معايا 170-180 بسهولة. وحليت مشكلة الفلتر نهائيا انى جبت فلتر امريكى بيعقد مدى الحياة اسمة k&n من شركةTPS GRAGE فى الحرفيين وبتنضف كل 50000. الف كيلو وبيتزيت بمادة 120 جنية وهو تمنة 400-430 جنية.
العربية دى انا جبتها بعد دراسة كاملة فى السوق لمدة 4 شهور وفيها كل عوامل الامان. ABS,EBD,BA الخاص بالفرامل و كمان 2 air bags وكمان بارات صلب لزيادة ثبات العربية ولذلك ثبات العربية جميل جداوكمان نظام ضد السرقة nats العربية بتفصل كهربا لما تستخدم مفتاح احر مصطنع. كل دة 103000 الف جنية.
بصوا للسوق وشوفوا العربيات بالامكانت دى بكام اما البكانتو 2011 1300 cc
96000 جندى.
نصيحة علشان تحس ان العربية ناعمة والعفشة تبقى حلوة حط نيتروجين وظبطة على 30 ورا و32 قدام.
غيروالزيت واستخدموا valvoline او lquimoly انا فرق معايا جدا لما غيرت موبيل1*
وجبت فالفولين واستهلاك البنزين فرق معايا جدا.
واخيرا انا قرات معظم التعليقات عن النيسان صنى وللاسف معظمها عن طريق السمع وليس التجربة
واى استفسار انا فى الخدمة.