سؤال ضروري اوبترا 2012 ولا صني الشكل القديم 2012

[jojojojojo]

انا معايا الصني الشكل القديم ممتازه والجديد اسمع انه كويس جدا والاوبترا برضه عربيه كويسه بس اسمع ان توكيلها سيء انصحك تنزل تتفرج علي التلاته واللي يناسبك امكانياته وسعره توكل علي الله واخيرا يعيب الصني فقط الشكل القديم استهلاك البنزين

[Mr.mohamed]

كلام عن تجربه بما انى امتلك نيسان صنى سوبر صالون 2012 ( ويارتنى مجبتها ) وبرضوا اوبترا 2011 اوتو وديه مع صديقى ؛

1- العربية ضيقة جدا من جوه والموضوع ده مش هتحس بيه الا مع الوقت
2-الكراسى ناشفه وكرسى السواق بيتكتك فى النقر والمطبات فا بالتالى القاعدة غير مريحة فى المسافات الطويلة
3- الزجاج ( الخلفى ) بتاع العربية بيزيئ وبيعمل اصوات فى الطلوع والنزول وبطئ فى الطلوع والنزول
وكذا مره اقولهم فى التوكيل ( اوتو ايجبت ) وبيظبطوه وشويه ويرجع تانى
4- فتيس رخم جدا فى نقلاته وبينتش جامد
5- لو انت على سرعة 160كم وحصل اى موقف يضطر انك تزود السرعه بمعنى كيك داون العربية هتنح معاك ومش هتزود عن كده وهتلاقى الار بى ام معلق على 4 ، لكن لو طريق فاضى وكويس وطوييييييييل والهوا مساعدك ممكن توصل ل 180 كم او 190 لكن بطلوع الروح ولازم تجبهم واحده واحده ودو ودوستك على البنزين تبقى بحنية غير كده اخرك 160 لو جبتهم .. انما التسارع لحد 140 نقدر نقول جيد
6-العفشة قوية وتستحمل ولكنها غير مريحة وبتحس برزع وهبد واقل حاجة فى الطريق بتسمع عندك وانت سايق
7-الدركسيون بيتهز من اى حاجة او اى مطب وبيهبد جامد ومبيسدق يعدى على شوية رمله تلاقيه عايز يتسوح يمين او شمال ( بس حله رجلاش فى الصيانة ) وشوية ويرجع تانى
8-الموتور صوته مش عالى الا لو قرصت عليه وصوته بيديك احساس بالقوة بس عيبه الفتيس الزبالة اللى نازل معاه
9-الفرامل بقى ملهاش حل ممتازة تسعفك لو انت على اى سرعة ( ودى احسن حاجة فى العربية )
10-التكيف بردوا ممتاز بس احيانا لو ماشى بالعربية مشوار كبير او قارص على الموتور تحس ان المروحه بس هيا اللى شغالة والتكيف فاصل وتبتدى تحس بالحر لكن بردوا تكيف الصنى ممتاز
11-العربية ثباتها جيد جدا لو الدركسيون لسه معموله رجلاش فى التوكيل
12-علو العربية عن الارض مظبوط على طرق مصر بالملى مش هتحك معاك فى المطبات وكذلك الاوبترا نفس العلو وبردوا مش هتحك معاك
13-صاج العربية جيد جدا بالنسبة لعربيات اليومين دول وكذلك الاوبترا بس الصنى اقوى بس ساعة القدر مبتفرقش علشان كلها فروقات بسيطة
14-البوهية بتاعت الصنى كويسة بس الاوبترا احسن
15-الشنطة واسعة فى العربيتين
ومن الاخر وده رأى الشخصى عن تجربت العربيتين علشان الاوبترا مع صديقى ويعتبر اخويا وعلطول بسوق عربيته والعكس وهو معاه اوبترا اوتو 2011 والنتيجه من وجهة نظرى كالتالى :
--- الاوبترا اوسع من الصني وبتشد اكتر من الصني وسلاسة نقلات الفتيس في الاوبترا احسن من الصني.
--- فرامل الصني احسن من فرامل الاوبترا وطبعا كمان فيها abs اللي مش موجود في الاوبترا
--- بالنسبة للشكل فدي مسألة نسبية.
--- صوت موتور الاوبترا منخفض عن صوت الصني ودا راجع ان الصني كاتينة جنزير اما الاوبترا كاوتش.
--- بالنسبة للبنزين الاتنين زي بعض تقريبا بس مع القرص الاوبترا استهلاكها اقل حاجات بسيطة
--- بالنسبة للثبات فأنا رأيي ان الاوبترا أثبت من الصني دا من وجهة نظري الشخصية وسواقة العربيتين على نفس الطرق
--- شكل الطابلوه والخامات والفرش والراحة فى السواقة وفى العربية بوجه عام الاوبترا تتفوق

*** واخيرا ربنا يوفقق لما فيه الخير وكل سنة وانت طيب ***

[abdohtaby]

: CONGRA~238: الف شكرا يا جماعه

[sehsss]

الصني تتفوق على الأوبترا في كل شىء عدا الوسع الداخلي لصالح الأوبترا