غيرت 3 قواعد لموتور الماتركس وظهرت رعشة في الموتور بترج العربية

[Badr Salah]

السلام عليكم

انا استنيت لما المشكلة اتحلت علشان اكتب الرد

طبعاً بعد ما غيرت القاعدة الأمامية والخلفية مرة تانية بأتنين اصلي الرعشة برضة مرحتش

سلمت امري لله وبطلت ادور على المشكلة

وبعدين جيه ميعاد صيانة المائة الف كيلو اشتريت الحاجة ورحت عند نفس الميكانيكي صحبي وبدأ يفك العمة بتاعة فلتر الهوا علشان يفك سير الكتينة والسيور الثلاثة وبالصدفة راح فاكك القاعدة اليمين اللي تحت عمة الهوا وطلع القاعدة مقطوعة حتتين

وهي دي المشكلة ان القاعدة الرابعة اللي متغيرتش كانت مقطوعة مع العلم ان كل مرة اروحله فيها ولمدة 6 شهور يقولي القاعدة الرابعة سليمة وانا بصيت عليها سليمة

الحمد لله الموتور رجع هادئ ومفيش رعشة في العربية

وبعد ما خلصت الصيانة بيومين رحت غسلت العربية من برة بس وروحت ركنت العربية
وتاني يوم بدور لقيت العربية بتقطع مع اول دوسة بنزين والموتور بيتهز جامد كل ما ادوس بنزين
رحت للميكانيكي تاني لقينا ان في بوجية قطاع علشان دخلت له مايه

قلت له بس انا غسلت العربية من برة بس ومغسلتش الموتور مع العلم ان في مرات انا بغسل الموتور ومبيحصلش كدة

المهم لما فكينا البوجيهات لقينا ان اللي ركب طقم البوجيهات الجديد مركبش الكوتشة صح علشان الكوتشة كانت متنية ومش مقفولة كويس وده اللي خلة الميه تدخل للبوجية وتبوظة

نفخنا الميه بالهو وغيرنا البوجية والموتور رجع هادي تاني ومش بيتنفض جوة العربية

الحمد لله وربنا يهدي الصنيعية ويشتغلوا بزمة علشان كل المشاكل وراها عيب صنيعي مش بيشوف شغلة بضمير وبيستسهل.

[firstrockmaster]

معاك حق و الله معظم العيوب بتطلع عيب صنايعى ما عندوش ضمير