فيرنا تاكسى دلوني يأهل الخبره

[سامح عباس]

الف الف الف شكر للردوود

[AbOnOrA]

المشاركة الأصلية كتبت بواسطة سامح عباس السلام عليكم ورحمه الله احب اعرفكم بنفسي الاول " انا اسمي سامح " ودخلت المنتدي بتاعكم بصراحه لاني محتاج معلومات ولقيت المنتدي ده بالظبط بيتكلم عن اللي عايز اسأل عليه .... ممكن ادخل في الموضوع .. انا عندي عربيه تاكس وقديمه وزي مانتو عارفين ان الاحلال شغال يعني " اجيب عربيه جديده اعملها تاكس " المهم انا بقي محتار جدا وعايز اجيب عربيه اولا مش غاليه ثانيا عمليه ثالثا قطع غيارها موجوده بسعر كويس فا كنت بقارن بين كذا عربيه وفي الاخر عايز اختار بين اللانوس والفيرنا والنسب يمكن اقرب الي الفيرنا المصري مش الفيفا وعايز حد يقولي عيوبها قبل مميزاتها عشان بجد محتااااااااااااااااار انا روحت كذا معرض وعند التعاقد احس اني متردد انا اينعم هجيبها قسط لكن هحط تحويشه العمر مقدم والنبي حد يدلني احسن خايف اغرق انا اصلي مكانش ليا في العربيات خالص ههههههه بالمناسبه انا خريج آداب وبشتغل سواق تاكس علي ما تفرج والنبي حد يدلني بقي وبأسرع ما يمكن لو سمحتم ولكم مني الف الف الف شكرررررر

اهلا بيك يا سامح فى مصر موتورز وربنا يوفقك فى اختيارك للعربية المناسبة ويملاهالك بركة يارب

بص يا سيدى انت قلقان طبعا ومعاك حق تقلق لان ديه عربية اكل عيش بس علشان تطمن محتاج انك تعمل مجهود شوية زيادة

هتعمل ورقة لكل عربية (يعنى الفيرنا ورقة والانوس ورقة )

وكل ورقة تحط فيها الاتى


- سعر العربية (الاجمالى)

- حساب فترة الضمان
(تكاليف الصيانات الدورية واسعار قطع الغيار فى الوكيل)
ديه تجيبها من حد معاه العربية اللى انت عايزها او مشوار لمركز من مراكز الخدمة يكون افضل وتسمع من الناس بنفسك مشاكل العربية

- اسعار قطع الغيار المستهلكة (اسعار برة الوكيل)
يعنى رفارف كبوت شبكة فوانيس بوجيهات فلاتر اسلاك سيور تيل طنابير مساعدين سوست مقصات كبالن الخ الخ
وديه تجيبها من المحلات العادية تنزل مثلا التوفيقية وشارع دمشق

- متوسط معدل استهلاك البنزين + نسبة القوة للوزن
وديه بتبقى مكتوبة فى كاتلوج العربية ونسبة القوة للوزن بنحسبها بقسمة الهورس باور على وزن العربية
ومنها هيبان لك بشكل اوضح اذا كانت العربية هتستهلك بنزين اكتر مع التحميل ولا لاء

- ملخص تجارب الناس مع العربية عيوب ومميزات
مثلا هتلاقى ان الفيرنا فيها عيوب تقفيل فى اكسسوارات الصالون الانوس هتلاقى عيوب اكتر فى من ارتفاع العربية وهبوطها مع التحميل وبمقارنة احتمالات العيوب ديه مع بعضها تقدر تحدد ايه العيوب المقبولة وايه اللى صعب تقبلها مع التشغيل الاستهلاكى زى فى التاكسى

وبس

املا الورقة ديه لكل عربية فى ميزانيتك وحطتهم قدام بعض هتلاقى القرار فى انهى عربية اقتصادية فى التشغيل اسهل بكتير

راى الشخصى الفيرنا افضل وعامة العربية اللى عفشتها انشف افضل كتاكسى وكاستخدام شاق من العربيات اللى عفشتها ناعمة
كمان العربية اللى عزمها اعلى افضل كتاكسى وكقدرة اكبر على السير باحمال من الاقل فى العزم
والسببين دول يخلونى افضل الفيرنا عن الانوس

نصيحة لاخ
حاول تدبق فلوس باى طريقة زى الجمعيات مثلا وتجيب حاجة من الاتنين دول كسر زيرو او استعمال خفيف وتوفر 5- 10 الاف جنية من تمنها وتبعد عن البنوك والفوائد وقرفها

اسف للاطالة واتمنالك كل التوفيق فى اختيارك

[سامح عباس]

والله العظيم ده فعلا اللي ابتديت افكر فيه فعلا وبدور علي جمعيه وانا اقتنعت بالفرينا اقتناع نهائي من يومين بس وكلامك ده فعلا عين العقل انا حاليا ماشي في اوراق التاكس القديم وبعمل بطاقه جديده عشان بتاعتي مكسوره وزي مانت عارف الموضوع ده هياخد تقريبا من 10 - 15 يوم وفي الفتره ديه اذا ما لقيتش حل في موضوع السلف او الجمعيه هيبقي خلاص اجيب بقي زيرو وامري لله وللعلم الوفره مش في 5 - 10 الاف حضرتك ناسي الفايده بتاعت القسط نفسه انا النهرده لسه جاي من معرض علي المريوطيه اسمه دانا جروب تقريبا وكنت بتفق علي المقدم ونظام التقسيط وكل ما بقرب والله بلاقي الموضوع كبير عليا ..... معلش انا طولت عليك وعلي اخواتي في المنتدي لكن ما خاب من استشار وانا قليل الخبره في الحاجات ديه ومشكوررررررررررررررررررين فوق الحدود علي ردكم وشكر خاص لأخويا ابو نورا

[AHMEDCAR]

ياباشا هالا و سهلا بيك معانا هنا فى المنتدى بص ياباشا انا معايا فيرنا 1600 موديل 2008 و عامله دلوقتى 17000 كيلو العربيه و الحمد لله زى الفل مافيهاش اى حاجه غير العيب الوحيد و المعروف عنها انها لازم لازم تغير الكاوتش بتعها او لو هاتستحمل قرفه و القرف بتاعه هو انه بينعم بسرعه و بالتالى بتسمع صوت صفاره زى صفاره الزوايا كده غير كده العربيه ممتاز ممتاز و لعلمك انا ماغيرتش الكاوتش لحد دلوقتى و مش ناوى اغير بس هو كل 5000 كيلو شيك على الزوايا لو عايز اى حاجه ممكن تكلمنى و كمان متوسط استهلاك البنزين حوالى 190 كيلو فى الصفيحه داخل البلد


اخوك احمد 0121425929

[AbOnOrA]

المشاركة الأصلية كتبت بواسطة سامح عباس والله العظيم ده فعلا اللي ابتديت افكر فيه فعلا وبدور علي جمعيه وانا اقتنعت بالفرينا اقتناع نهائي من يومين بس وكلامك ده فعلا عين العقل انا حاليا ماشي في اوراق التاكس القديم وبعمل بطاقه جديده عشان بتاعتي مكسوره وزي مانت عارف الموضوع ده هياخد تقريبا من 10 - 15 يوم وفي الفتره ديه اذا ما لقيتش حل في موضوع السلف او الجمعيه هيبقي خلاص اجيب بقي زيرو وامري لله وللعلم الوفره مش في 5 - 10 الاف حضرتك ناسي الفايده بتاعت القسط نفسه انا النهرده لسه جاي من معرض علي المريوطيه اسمه دانا جروب تقريبا وكنت بتفق علي المقدم ونظام التقسيط وكل ما بقرب والله بلاقي الموضوع كبير عليا ..... معلش انا طولت عليك وعلي اخواتي في المنتدي لكن ما خاب من استشار وانا قليل الخبره في الحاجات ديه ومشكوررررررررررررررررررين فوق الحدود علي ردكم وشكر خاص لأخويا ابو نورا

والله يا سامح انا شايف انك متيأسش من تجميع تمنها من غير اقساط ولو اتزنقت فى القسط حاول تخلية قريب سنة ولا سنتين بالكتير علشان تحس بدخل العربية وتريح بالك من هم الاقساط ونكد الفوائد واستخير ربنا قبل ما تاخد ايه خطوة فعلية وباذن الله ربنا هيلهمك الصواب