جين 2 جديدة ولا اوبل استرا مستعملة ؟؟

[yoyo.yasso]

السلام عليكم
معلش انا مغلباكم بس مازلت محتارة ما بين انى اركب عربية زيرو او اجيب حاجة مستعملة
انا اول مرة اسوق يعنى لسه بجرب وانا وجوزى معندناش عربية قبل كده ومعانا من 50 ل 60 الف
بنفكر نجيب جين تو جديدة بنحب شكلها جدا بس طبعا هانجيبها قسط هاندفع 50% واقسط الباقى بس خايفة جدا حاسة ان الفرق كبير بين المبلغ الكاش والقسط وكمان حتة التقسيط الاسلامى دى مش لقياها كما اُنزل بحس ان فى لعب من تحت الترابيزة وهى مسميات بس وفى نفس الوقت عايزة حاجة تكون نضيفة متغلبنيش باه وتعطل كل شوية ف علشان كده فكرت فى الزيرو

ومن ناحية تانية ناس كتير تقولى مدام لسه مش متكمنة فى السواقة هاتى حاجة مستعملة احسن اتعلمى فيها بس جوزى له مواصفات فى العربية المستعملة خصوصا وفى الجديد عموما احنا متفقين على حاجة ان العربية تبقى اوتوماتيك وهاتش باك وده مش لقيناه فى الجديد بسعر كويس غير فى الجين تو
اما لو مستعمل ف اقيت دلوقتى اوبل استرا 2007 ب 62 الف سعرها عجبنى جدا واحنا اصلا معجبين جدا بالاسترا الجديدة 2013 بس طبعا سعرها بالنسبالنا كان كبير ف لما شفت ال 2007 احترت بينها وبين الجين 2
مع العلم اننا عايزين عربية اسرية لان معانا طفلين
هى اغلب الوقت هاتبقى معايا لان زوجى بيسافر كتير

عايزة اسفيد من خبراتكم فى الموضوع ده
جين تو جديدة تقسيط ؟ ولا اوبل 2007 مستعملة كاش وابقى اغيرها كمان كام سنة يكون اتكون معانا مبلغ نجيب بيه حاجة كاش جديدة ونخلص ؟

منتظرة ارائكم وياريت بردو تفيدونى بخصوص قطع الغيار والتوكيل بالنسبة للاتنين

[goudai]

انا افضل انك تبعدى عن الجديد حاليا خاصة انه تقسيط ، وبالنسبة لللاوبل فهى عربيات المانى وركوبتها جميلة بس اعتقد ان قطع غيارها غالية شوية
اذا سمحتيلى هاضيف ثلاثة خيارات كمان يمكن يلقى احداها قبولك واللى هى فيرنا او بيكانتو او هيونداى i 10
تحياتى وان شاء الله حد من الاعضاء يفيدك اكثر منى

[yoyo.yasso]

المشاركة الأصلية كتبت بواسطة goudai انا افضل انك تبعدى عن الجديد حاليا خاصة انه تقسيط ، وبالنسبة لللاوبل فهى عربيات المانى وركوبتها جميلة بس اعتقد ان قطع غيارها غالية شوية اذا سمحتيلى هاضيف ثلاثة خيارات كمان يمكن يلقى احداها قبولك واللى هى فيرنا او بيكانتو او هيونداى i 10 تحياتى وان شاء الله حد من الاعضاء يفيدك اكثر منى

والله اختيارات حضرتك كويسة اووى ان كان البيكانتوا وانا شخصيا نفسى فيها او الاى 10 كويسة اوى بردو
بس انا عملت تعديل للموضوع ووضحت انى عايزة عربية اسرية بس هاتش باك يعنى مش صغيرة اووى لاننا مش عندنا عربية اصلا يعنى اللى هاتيجى بأمر الله هاتبقى بتاعتى انا وزوجى بس اغلب الوقت معايا ف عايزة حاجة تريحنا احنا الاتنين
هو رافض فكرة البيكانتوا نهائيا وهى بصراحة صغيرة شوية على انها تكون اسرية
هوكان نفسه فى حاجة جولف 4 او 5 بس انا بردو استصعبت ده وانا لسه بتعلم الجولف عربية جميلة جدا بس قلقت من انى اخبطها او حاجة وقلقانة بردو من الاوبل بس فى ناس قالتالى ان انى بما انى بتعلم يبقى الجديد او المستعمل اكيد على الاقل هايتخدش وباالتالى الافضل انى اجيب حاجة جديدة تبقى بتاعتى وزيرو من غير مشاكل
وعلشان اطلع من الحيرة دى قلت اسألكم اكيد انتوا خبرة اكتر مننا
جزاك الله خيرا على الافادة ربنا يكرمك
ان شاء الله هاستخير وربنا ييسر

[goudai]

برده انا مش بفضل الجديد وخاصة لو كان تقسيط لانك هتشترى العربية ب 70 الف مثلا زودى عليهم حوالى 25 الف فائدة قابلة للزيادة او النقصان يبقى العربية وقفت ب حوالى 95 الف هتركبيها من ثلاثة الى خمس سنوات وهتبيعها علشان هتكون اتبهدلت نزلى بقى من تمنها من 15 الى 25 الف + ال 25 الف الفايدة يبقى انتى فى 5 سنين خسرتى من 35 الف الى 50 الف جنيه ، يبقى دلوقتى الافضل طالما ان العربية هتتبهدل معاكى فى الاول تجيبى حاجة استعمال كويسة وفى النهاية القرار الاخير ليكى طبعا
:TH E_PR~18:

[eng/walaaeldeen]

السلام عليكم
اكيد مادام لسه بتتعلم السواقه خليك في المستعمل وبلاش الزيرو حاليا لو عايزين عربيه اوتو وهاتش باك وواسعه وعائليه في الكيا شوما بس يعيبها ان اعادة بيعها ضعيف لكن في المقابل ثمنها رخيص
والله المستعان