|
#1
22-11-2010, 06:43 PM
|
|||
|
|||
عايز رأيكم فى الاقتراح ده
سلام عليكم و رحمه الله و بركاته
انا عربيتى هيونداى جيتز و عايز اجبلها طقم صوت حلو . قلت اجيب صب او ٢ مع سماعتين بس طبعا الشنطه زى منتو عارفين لو حطيتهم فيها تقريبا هياخدو المساحه كلها فقلت اخد رأيكم فى الاقتراح ده.. طبعا سماعات العربيه اللى بتيجى فيها بتبقا ولا ليها لازمه و انا عندى ٤ سماعات فى الابواب و بجيب اخر الكاسيت و لسا الصوت واطى و بيزن ففكرت اشيل السماعات اللى فى الابواب الاصليه و اركب مكانهم سماعات كويسه بيونير او كينوود و اجيب صبين حجمهم صغير على أد الرف بتاع العربيه علشان هو صغير و جى ام ..ايه رأيكم هل لو عملت كده الصوت هيبقى حلو ولا ملهاش لازمه ؟ 
|
|
#2
22-11-2010, 08:08 PM
|
||||
|
||||
|
رد: عايز رأيكم فى الاقتراح ده
بص ياباشا, النظام عندك ضعيف جدا, وعايز أقلك أنك لوجبت سماعات نضيفة بس, هتحس بفرق بين السماء والأرض.
الصب ياباشا مابيركبش فى أى حتة, الصب لازمله صندوق علشان يطلع الصوت, لو جربت تسمع صب 1000 وات من غير صندوق هتلاقيه ولا سماعة من اللى ب 15 جنيه, لكن فى صندوق أو بازوكا الوضع هيتقلب تماما. لكن فى حاجة جت فى بالى, الرف هيبقى مقفول على الصندوق بتاع العربية, يعنى الصب هيركب على الرف كأنه فى صندوق, لكن صندوق العربية مش مقفول تماما, فبالتالى لو ركبتهم على الرف مع كل خبطة بيز هتسمع زن وقرف من الهواء اللى عمال يخرج ويدخل صندوق العربية. لكن فى فئة من الصبات أسمها فرى أير, دى ينفع تتركب بدون صندوق, وهى دى اللى ينفع تركبها على الرف وتسمع منها بيز, لكن صب عادية على الرف مش هتسمع البيز بتاعها غير وأنت واقف بره العربية, علشان العربية هتتحول لصندوق للصب بس زى الفقرة اللى فوق.......... عايز رأيى, هات سماعتين بايونيير بيضاوى للرف اللى ورا فى حدود 400 وات ماكس (ممكن أقل سنة), وسماعتين مدورين فى نفس الحدود, وسماعتين تانيين مدورين فى حدود 200 الى 300 وات ماكس, وجى أم 4 قنوات 400 وات كينوود, هتركب عليه السماعتين البيضاوى والسماعتين المدورين الأقوياء  , والسماعتين الفاضلين يركبوت على الكاسيت على طول.كده تبقى عملت نظام أحسن من الصب, النظام اللى حضرتك كنت عايز تعمله حتى لو عملته بصب free air البيز هيغطى على صوت السماعات, ومش هتقدر تستخدم الصبات بقدرتهم الا لو حطيت تويترات أو سماعات بيضاوى كومبوننت علشان تعادل البيز. أما نظام محطوط فيه سماعات كومبوننت (يعنى بتطلع بيز وتريبل وميد رينج) صوته بيطلع متناسق ومفيش حاجة اعلى من التانية.
__________________
|
|
#3
22-11-2010, 08:58 PM
|
|||
|
|||
|
رد: عايز رأيكم فى الاقتراح ده
بصراحه يا باشا انت مقنع و اللهى و بشوف ردودك فى مواضيع المنتدى كلها رائعه
يعنى اجيب سماعتين بيضاوى ٤٠٠ وات و ٢ اقل بس انا ليا استفسار معلش ايه الفرق بين جى ام ٢ تشانل و ٤ تشانل و هيكون بكام؟ و النضيف نوعه ايه؟ و سؤال كمان معلش انا اسمع ان الجى ام لازم يكون مع صب علشان لو ركب مع سماعات بس هيضربو . هل الكلام ده صحيح؟
|
|
#4
22-11-2010, 11:40 PM
|
||||
|
||||
|
رد: عايز رأيكم فى الاقتراح ده
ألف شكر على ذوقك وكلامك الجميل ياباشا.
بص ياباشا, الجى أم أسمه الحقيقى أمبليفاير, يعنى مضخم, وظيفته أنه ياخد الأشارة الضعيفة من التسجيل ويحولها لطاقة عالية تقدر تقوم السماعات. دلوقتى الجى أم بيطلع الطاقة دى منين, من حاجة أسمها قناة channel القناة دى بتبقى سالب وموجب وبتتوصل مباشرة بالسالب والموجب بتاع السماعة. جى أم 2 قناة يعنى يركب على كل قناة سماعة, أو تقدر تعمل بريدج (جسر, بتوصل موجب القناة الأولى على طول بسالب القناة التانية وتسيب السالب والموجب من كل الباقى من كل قناة فاضيين), والبريدج بيطلع تقريبا ضعف الوات اللى بتطلعه القناة الواحدة لذلك تلاقى معظم اللى معاهم صب بيشغلوها على جى أم 2 قناه على القناتين مع بعض. جى أم 4 قناة, وده نفس الحكاية, كل قناة بيركب عليها سماعة, وتقدر تعمل بريدج بين كل قناتين, ويبقى عندك قناتين أقوى من القنوات الأصلية. جى أم واحد قناة أو monoblock, وده من أسمه جى أم قناة واحدة فقط, بيطلع وات عالى بداية من 1000 وبيستخدم للصبات. ال 2 تشانل بيتسعر حسب الوات, بس سعره بيبقى مماثل للوات بتاعه, يعنى جى أم 400 وات قناتين ب 450 فيما فوق, جى أم 4 قنوات حوالى 500 جنيه, لو حضرتك تعرف روكيت اللى فى روكسى هات العدة من عنده أحسن, أسعاره رخيصة وعنده موديلات من كل حاجة, وهيجاوبوا على أستفسارات حضرتك. الناس فى السماعات بالذات بتفضل الجى أم الكينوود والسونى, لأنهم بيطلعوا تفاصيل الصوت كويس, وأبعد عن السيمفونى فى السماعات. بالنسبة لأخر نقطة ياباشا, أحنا متفقين أن الجى أم هو مضخم للصوت, أنت بتشترى جى أم علشان معاك سماعات أقوى من الكاسيت الأصلى وبالتالى الكاسيت مبيقومهمش كويس, فبتروح تشترى أمبليفاير مناسب حسب عدد السماعات وقوة الأمبليفاير, علشان تشغل السماعات كويس. أنما علشان تضرب منك سماعة أنت محتاج أمبليفاير خرجه كبير, سواء ببريدج أو أيا كان, بالتالى لما توصل سماعة أقل منه فى القدرة عليه يبقى أنت بتضيعها. وزى ماقلنا لو عندى أمبليفاير مثلا 400 وات قناتين وسماعات 400, ممكن أوصل السماعتين عليه ويشتغلوا مرتاحين, أو أعمل بريدج بين القناتين و أشغل عليهم صب, لأن بعد البريدج الأمبليفاير هيبقى قناة واحدة بتطلع حوالى 800 وات أو أكثر. وعلى فكرة صوت الخروشة اللى بتسمعه من السماعات بتاعتك مع الصوت العالى, ناتج عن أن السماعات ضعيفة جدا, والكاسيت بيطلع خرج أكبر من اللى تستحمله, وممكن تبوظ سماعاتك لو عملت كده كتير (جدا). ووأنت بتشترى ياباشا أبقى أسئل البائع, السماعات دى كام وات, الجى أم ده كام وات, هيقومها ولا لأ, طب عايز سماعات تركب على الكاسيت على طول, وهكذا, علشان لو حاجة معجبتكش ترجع وتظبطه.
__________________
التعديل الأخير تم بواسطة Injection ; 22-11-2010 الساعة 11:52 PM
|
|
#5
23-11-2010, 12:06 AM
|
|||
|
|||
|
رد: عايز رأيكم فى الاقتراح ده
تسلم دماغك يا غالى انت بجد افدتنى بس معلش عايز اعرف غنوان المحل ده فى روكسى علشان اخوك من طنطا و هجيلو مخصوص علشانك . و هو اى صنايعى يعرف يعمل بريدج ولا ممكن يبوظ الدنيا ؟
|
 |
|
|
.
