عربية على شاسيه ولا على علب؟؟؟ اتعرف على طرق بناء السيارات

[salahzee]

ياريت الإدارة تثبت الموضوع الرائع دا .
الشكر الجزيل للمهندس borio1704 جزاك الله خير

[borio1704]

الطرق الأخرى لبناء السيارات

في الحقيقة.. الطرق التانية لبناء السيارات عبارة عن تعديلات أو دمج للطريقتين اللي اتكلمنا عليهم قبل كده (الشاسيه والعلب).. عشان كده مش هنتكلم عليهم بشكل موسع



طريقة العمود الفقري (Backbone)


الفكرة الأساسية هي استعمال شاسيه (زي فكرة العربيات على شاسيه) .. بس بدل ما هو شكل السلم الخشبي.. بقى عبارة عن ماسورة رئيسية متفرع منها أجزاء نقل الحركة والموتور، وهي بكده "العمود الفقري" اللي شايل كل حمل العربية.

الطريقة اخترعها كولن تشابمان مؤسس شركة "لوتس" وبنى عليها سياراته المشهورة زي "إيلان" و"إيسبيريت"، واستخدمتها عدة شركات سيارات بعد كده،


وكانت بعض شركات السيارات في أوروبا الشرقية بتستخدمها (زي تاترا وسكودا) في عربيات الركوب وبعض سيارات النقل كمان، وإن كانت الطريقة دي فعالة أكتر في العربيات الصغيرة،



بس من أشهر العربيات اللي استخدمتها على الإطلاق (مع بعض التعديل) كانت الفولكسفاجن بيتل القديمة.



حاليا الطريقة دي ما بقتش منتشرة إلا في بعض العربيات الاسبور (زي المازدا مياتا)، مع بعض التعديل على الماسورة فبقت بشكل شبكة من المواسير الملحومة وبتشكل مع بعض شكل ماسورة كبيرة.


أهم مميزاته

• مناسب للمصانع الصغيرة لإنه بسيط في التصميم

• سهل التصنيع في الورش والمصانع الصغيرة

• الماسورة الوسطية بتحمي أجزاء نقل الحركة الحساسة

• أكتر تصميم بيوفر في المساحة

• قوي بما فيه الكفاية للعربيات الصغيرة



أهم عيوبه

• تكلفة التصنيع كبيرة وغير مناسبة للإنتاج بكميات الكبيرة

• التصميم ده ما بيديش حماية ضد الصدمات الجانبية، ولازم يبقى الجسم نفسه قوي ضدها وده بيزود الوزن

• لما نقارن التصميم ده من ناحية مقاومة الالتواء.. التصميم ده حيبقى أتقل من تصميم العلب اللي عنده نفس كمية المقاومة.




طريقة الهيكل الأنبوبي الفضائي (Tubular Space Frame)


ودي عبارة عن عمل قفص من مواسير حديدية شبه الطريقة المستخدمة في بناء الأسقف في المباني العملاقة زي اللي في الاستادات أو المولات وغيرها،




وغالبا بنشوفه في سيارات السباق أو السوبر رياضية، وكمان بنشوفه في الورش المتخصصة وفرق سيارات السباق الخاصة.





في حالة تصميم بالشكل ده.. الهيكل هو كل حاجة.. بمعنى إنه هو اللي شايل كل الحمل ومتركب عليه كل أجزاء العربية، وجسم العربية ما بيعملش حاجة في قوة الجسم غير مجرد الشكل الخارجي بالإضافة لتحسين مقاومة الهواء.





الطريقة دي ميزتها

• خفيفة جدا وقوية جدا في نفس الوقت وفي جميع الاتجاهات

• مناسبة للتصنيع في الورش الصغيرة جدا.. يعني أي واحد ممكن يعمله لو عنده مكنة لحام وشوية خبرة


أهم عيوبها

• التصنيع المناسب في الورش صعب جدا في المصانع الكبيرة، وشبه مستحيل على الروبوت.. على الأقل في الوقت الحالي

• التصميم ده مكلف برضو.. لإنه بيتصنع يدوي

• التصميم ده بيستهلك مساحة عالية جدا جوه العربية، وغالبا بنضطر نرفع الباب لفوق ، وده بيسبب صعوبة في الدخول والخروج، عشان كده بيستخدم في الاستخدامات الخاصة زي عربيات السباق.



فيه طرق تانية بس بتستخدم مواد مختلفة في صناعة الجسم زي ألياف الكربون أو الألومنيوم بس كلهم ما بيخرجوش عن الطرق الأربعة اللي قولناهم قبل كده.


ألياف الكربون





الألومنيوم





...

[akerima]

ممتاز ممتاز بجد الموضوع دا لازم يتثبت يا جماعة والله - معلومات قيمة جدا تسلم ايدك ودماغك

[تامر ديزل]

الجزء التالت خطييييييير
تسلم ايدك

[borio1704]

الموضوع على 3 أجزاء


العربيات على شاسيه: مشاركة رقم 1

العربيات على علب: مشاركة رقم 28

بقية الأنواع: مشاركة رقم 47


...