|
|||||||
| سفارى وطرق اماكن تستحق الزيارة - سفارى - رحلات - طرق جديده او مختصره - طرق احذر منها |
 |
|
|
أدوات الموضوع |
|
|||||||
| سفارى وطرق اماكن تستحق الزيارة - سفارى - رحلات - طرق جديده او مختصره - طرق احذر منها |
|
|
|
أدوات الموضوع |
|
#6
22-07-2009, 02:36 AM
|
||||
|
||||
رد: رأس البر
معلش هسبق أنا
أنا هكلمكو عن المصيف الشعبى رقم واحد فى مصر المصيف شعبى يعنى فيه من طبقات الشعب الغلبانه كتير لكن في كمان أغنى أغنياء دمياط و ما بينهما راس البر (مصيف البشوات و أم كلثوم سابقا) راس البر على الضفة الغربية من فرع النيل و عندها تنتهى رحلة نهر النيل العظيم عبر آلاف الكيلومترات من قلب أفريقيا أسهل طريقة للوصول لراس البر من القاهرة تركب طريق الإسماعيلية الصحراوى و منه لطريق بورسعيد و قبل بورسعيد ب 8 كيلومتر تنحرف يمين لطريق بورسعيد الدائرى إلى هو أول الطريق الساحلى الدولى و من ممكن نفضل على الطريق الساحلى لغاية ما نعدى النيل و نقرب نوصل لمدينة دمياط الجديدة و بعدين نترك الطريق الساحلى و نتجه لطريق ميناء دميااط و منه إلى رأس البر طريق سالك لكن طويل و الأقرب إننا نخرج من الطريق الساحلى عند قرية بين بورسعيد و دمياط إسمها قرية شطا و ناخد طريق بورسعيد دمياط القديم و ده بيدخلنا لمدينة دمياط نعدى النيل و ندخل على طريق دمياط المنصورة كام كيلو كده نلاقى يافطة يمين تقول إلى مصيف راس البر طريق أقصر لكن زحمه شوية معلش طولت فى وصف الطريق علشان صعب وصفة شوية عموما من القاهرة لبورسعيد ساعتين و من بورسعيد لراس البر حوالى ساعة . راس البر عبارة عن شبه جزيره من الشرق النيل و من الشمال و الغرب البحر المتوسط المهم أول ما تدخل راس البر هتلاقى على يمينك (بس من بعيد) شاطئ الجربى على نهر النيل و ده فيه كافيتريات كتير تقدر تقضى فيها النهار كله و ممكن تطلب مشاريب بس و تاخد أكلك معاك محدش هيزعل منك و كمان ممكن تطلب أكل اسعارها متوسطة و مستوها معقول و ممكن السباحة فى النيل متخفوش من البلهارسيا فى الحته دى المية بتبقى مالحة فى الجربى بتشوف مراكب الصيد واقفة فى وسط النيل و رايحة و جاية و كمان تقدر تاخد جولة باللانش فى النيل بس خليك فاكر المصيف شعبى يعنى مافيش مامى و بابى إنما فيه أهلنا البسطاء الغلابه اللى ممكن يطلع منهم حركات يمكن متعجبكش . طول ما إنت قاعد فى الجربى تلاقى البياعين رايحين جايين عليك إشى نضارات و إيشى ملابس داخلية و خارجية و بشاكير و فوط و مكياج و توك للبنات و شيبسى و سجاير و لب و أيس كريم و حلويات دمياط و مشبك و شرايط كاسيت مضروبة و ساعات صينى و ممكن تأجر عجله أو موتوسيكل و فيه ناس بتبيع سنارة و طعم و تقدر تقعد تصطاد بس هتطلع بساريات بس مفيش سمك كبير فى الجربى فيه نادى الشرطة و نادى الأطباء و كازينو خلود النيل (ليه مركب خاصة بينظم بيها رحلات فى النيل) دول طبعا مش شعبى قوى لأن الدخول للأعضاء أو بفلوس فى الكازينو لو مش عاجبك موضوع النيل ده ممكن تروح للبلاج يعنى البحر المتوسط الناحية التانية أو ناحية الشمال و إنت داخل راس البر فيه برضه الشواطئ الشعبية زى شاطئ 77 و فيه الأرقى شويه كل ما تقرب للسان. رمل البحر لونه غامق علشان الأرض عبارة عن طرح النهر يعنى طمى فى طمى فا تنسى خالص رمله مرسى مطروح و الساحل الشمالى و لون البحر برضه مدى على أخضر مش أزرق تيركواز برضه علشان مياه النيل اللى بتغير لون مياه البحر إيه بقى اللسان اللسان ده شريط طويل و ضيق فى أخر طرطوفة من نهر النيل و بيفصل النيل عن البحر و بيحمى مجرى النيل من نحر البحر (حد فهم حاجه) اللسان ده تمشية حلوه بس بعد العصر أو المغرب أو بالليل لإن مفيهوش ضله و شجرة لكن المنظر من هناك روعة فجأة تلاقى نفسك و الميه محاوطاك من كل ناحية و تلاقى على اللسان يافطة كبيرة مكتوب عليها "هنا ينتهى نهر النيل العظيم" منطقة اللسان محمية بيئية (مش عارف ليه) ممنوع الجلوس و ممنوع الأكل أو الشرب أو قزقزة اللب تتمشى و تتفرج و تتصور بس . بالليل بقى عندك كذا حته ممكن تقضى فيها السهرة أولا كافيتريات قبل منطقة اللسان دى و تعتبر على البحر الهوا هيخبطك و يدوخك لكن مش هتعرف تشوف البحر القاعدة حلوة و ظريفة مشروبات و فطير و كباب و كل حاجه و شيشه كمان ممكن كمان تاخد جولة فى شارع النيل بيخصصوه للماره فقط بعد المغرب ناحيه كلها محلات و ناحية كلها بتوع فطير وكازينوهات المحلات بتبيع كل حاجه صينى من أول توكه الشعر (معلش مركز على التوك علشان المدام كل ما نروح تجيب شروة توك) كمان الملابس القطنية تلاقى المأكولات و الأيس كريم تلاقى كتب تلاقى أجهزة كهربائية و لعب أطفال تلاقى الكازينوهات على النيل لكن بينك و بين النيل ممشى عام ممنوع أى كازينو يفرش فيه و بالتالى ممكن أى حد يقعد على النيل بلاش لو عايز . شارع السوق شارع مليان مطاعم على الطريقة الدمياطية يعنى مش خمس نجوم لكن نضاف و حاجتهم نضيفه أشهرهم دعدور بتاع الفطير و أبو خالد بتاع الكباب غير محلات الحلويات اللى فى كل ركن و القهاوى طبعا . ممكن كمان تلاقى سينيمات من نوع اربعة أفلام فى بروجرام واحد (هتلاقى كل أفلام الصيف بتذكرة واحده من الساعة 8 لغاية الفجر) كمان السيرك ليه خيمة هناك اللى عايز يبات مقدرش أدله كويس لكن فيه فنادق طبعا أشهراها مارين النيل ( يمكن مايكونش أحسنها دلوقتى ) لكن ممكن تأجر شقة فى عشه (ماتخافش هى إسمها عشة لكن أبعد ما تكون عن العشش - تسمية قديمة من أيام العشش الخوص) فى الواقع العشة تقريبا عبارة عن فيلا صاحبها واخدله دور و بيأجر الباقى معرفش الأسعار لأنى مجربتش عموما راس البر تاخدلها يوم أو إتنين بالكتير - شعبية لكن ليها طابع خاص - و ليها حلاوتها .... مش ضرورى كل حاجه تبقى بالشوكة و السكينة . و اللى للقاء فى رحلة أخرى 
التعديل الأخير تم بواسطة حازم شاهين ; 22-07-2009 الساعة 02:41 AM 
|
|
#7
22-07-2009, 02:43 AM
|
||||
|
||||
|
رد: رأس البر
ماشى ياعم حازم ptmnlo123per1146
اما وريتكptmnlo123per111
__________________
Romeeoo MUST die  مـــوضـــوعـــاتـــى:- ممنوع منعا باتا نقل مواضيعى الى اى منتدى سيارات اخر وشكرا لتفهمكم
|
|
#8
22-07-2009, 02:50 AM
|
||||
|
||||
|
رد: رأس البر
يا باشا إنت الأصل و ليك مطلق الحرية تزود
لكن ده مايمنعش من محب لراس البر إنه يقول كلمته بالمناسبة أنا من بورسعيد
|
|
#9
22-07-2009, 07:38 AM
|
||||
|
||||
|
رد: رأس البر
الف شكر يا روميو علي الصور
و الف شكر لحازم علي الكلام الهايل اللي يستاهل موضوع لوحده ولا انت رأيك ايه يا روميوptmnlo123per122 كان احمد انور و انا عاملين موضوع عن زيارتنا لرأس البر بدعوه من صديقنا العزيز عيشو و كنا متصورين فيها صور حلوه برضه رأس البر طول عمرها حلوه و ليها طابع مميز مش طابع بوسطهptmnlo123per145
__________________
حـازم خـضـر
|
|
#10
22-07-2009, 10:20 AM
|
||||
|
||||
|
رد: رأس البر
معلش يا روميو ! حازم شاهين خطف منك الموضوع ! ما هو شاهين بقى ( أغلى أنواع الصقور )!
طبعآ رأس البر تطورت كثيرآ جدآ عن الآول ! و لآنى من المنصوره فيعنى ساعة زمن بسرعات زمان كنا بنبقى فى رأس البر ! و طبعآ أنا حافظها شبر شبر ! و كنا زمان الصيف كله بنعيش هناك و لدرجة ان والدى ( رحمة الله عليه توفى هناك ) ! و أنا أول لما اتعلمت السواقه كان فى رأس البر و اقتحمت عامود نور بسياره شيفورليه 1952 فى أول شارع 75 و ده كان شارع الصفوه أيامها ! زمان قوى قبل ما أوعى عليها ! لم يكن هناك طريق أسفلت الى رأس البر و كانوا بيروحوا لها من دمياط بالمراكب الشراعيه أو بمركب بموتور كبير بتشيل 200 راكب على الآقل و دى رأيتها ! و كان فى عزبة البرج مقابل اللسان فنار حديدى جميل فشر برج ايفل ( هدوه ) و كانت فتحة النيل على البحر أعرض من كده كثيرآ ( قبل السد العالى ) و كذلك مية النيل كانت حلوه موش مالحه ! و اللسان نفسه كان يخوف و خطير و ليس به فناره مثل اليومين دول ! و كانت العشش معظمها بالبوص و الباعه الجائلين يمرون عليك وانت فى مكانك يعنى موش محتاج تروح السوق ! أحلى لبن زبادى و أحلى عيش شامى ممكن تاكله فى حياتك و بتاع الفول وبتاع السمك و الكابوريا الواحده كبيره و مبطرخه بقرش صاغ ( لسه شاريها الآسبوع الماضى صغيره جدآ ب 50 جنيه الكيلو) ! و بتوع غزل البنات و اللب و التسالى و الآيس كريم ( جرانيطه ) بتاعة محمد عيد و أولاده ! و ده كان معه عربة أيس كريم على شكل مركب صيادين و معه 12 راجل و كان ريسهم له شنب كبير و مفتول ! و كان يمشى وينادى ( محمد عيد أبو شنب حديد ) يقوم ال12 واحد كورس وراه عاملين ضجه كبيره بس محببه ! و ركوب العجل اللى على هيئة أحصنه و حيوانات ! حتى بتاع الحبال كان ينادى و يقول اللى عايز يشنق حماته ! ياه كانت دنيا تانيه ! و حلاوتها فى شعبيتها ! و على فكره لوكاندة مارين كان اسمها ( مارين فؤاد ) ! و بالليل التمشيه على الكورنيش من أمتع ما يمكن و تمشى تخبط فى الناس و نتوه من بعض و نشترى ساندوتش ( اتش ) فول و طعميه جنب السينما على الكورنيش و نروح نلعب ( باتيناج ) دا غير صيد السمك من النيل ! ذكريات كثيره و لا أستطيع أن أحكيها كلها لكن حاليا لا أذهب الا خطف ! يعنى فى الصيف أكون فى زيارة العائله بالمنصوره و بعد الغذاء و نوم الظهر أذهب الى رأس البر الساعه 5 و ننزل الميه برده و نشرب مشاريب و بعدين نتمشى على الكورنيش و بعدين نختمها بفطير من عند الفطاطرى أو أبو طبل أو دعدور و نروح نوصل المنصوره 11 أو 12 مساء ! و كفايه كده علشان روميو ما يعملهاش معانا ! ( اتفضل كمل بأه يا سى روميوووووو ) ! Dr. Bolbolan
__________________
ليت الشباب يعود يوما  فأخبره بما فعل المشيب بى ! ptmnlo123per1127التعديل الأخير تم بواسطة Dr. Bolbolan ; 22-07-2009 الساعة 10:41 AM
|
|
|
|
