السياره مركونه عامين من غير ماتدور اعمل ايه

[W800I]

السياره مركونه عامين من غير ماتدور هى فيات 125 اتركنت فتره طويله فى الشارع هل احط بطاريه وادور ولا اعمل ايه مع العلم المحرك عليه تراب اد كده انفخ بالهواء ولا الى بيتعمل بلظبط وشكرا لكم

[محمد حسن عبد الرحمن]

واللهى يا باشا أنا معنديش خلفية كبيرة عن موضوع زى ده بس الأكيد أن حضرتك الموتور بحاجة إلى غسيل وبعد كده تحل التانك بتاع البنزين وتغسلة كويس جدا وتنظفة لأن أكيد بقى فيه صدأ وتخلعة برة العربية وتحط زجاجتين خل وتقفل التانك وتحطه فى الشمس ساعتين تلاتة و ممكن تكرر العملية مرة كمان للتأكد من نظافتة وبعدين تأخد العربية زق لغاية الميكانيكى بس يكون واحد أعلا للثقة ومحترم ويتاقى الله وشوف هيقولك أية وأكيد طبعا هتغير كل الزيوت والفلاتر والسيور والبويجاهات وأحتمال أسلاك البويجهات بس شوف الميكانيكى هيقولك أية وطبعا أكيد هتعدى على بتاع الردراتير بعد أنتهاء الميكانيكى من السيارة علشان ينظف دورة المياة ويغسلها كويس لأنها أكيد أتملت بالصدأ والرواسب وطبعا هاتمم على كل سلك وخرطوم ومسمار سوء أن كان بالمحرك أو العفشة أو الكهرباء وبعد ما تكون شيكت على الميكانيكا والكهرباء والعفشة حتى لو تربيطة وكل تمام أطلع على المغسلة فى بنزينة كويسة وظبط الدنيا غسيل وتشحيم وده اللى كنت أكيد هاعملة وأنا فى الموقف ده وأرجو أنى أكون قدرت أفيد حضرتك ولو بالقليل وأن شاء الله بقية الأخوة الأعضاء يفيدوك أكثر منى.

أخوك محمد

[borio1704]

الأستاذ محمد حسن عبد الرحمن قالك على معظم الحاجات، وانا يمكن مش هزود عنه حاجات كتير


تشغيل العربية في الحالة دي هيبقى على 3 مراحل

المرحلة الأولى... قبل تدوير العربية، وخطواتها كالتالي:

* لازم تشحن البطارية أو تجيب بطارية مشحونة، وتعمل حساب إن البطارية المشحونة ممكن تنام هي كمان.
* حط بنزين مش أقل من 5 لتر، لإن البنزين أكيد اتبخر كله
* غير الزيت لإنه اكيد اتحلل والرطوبة عملت عمايلها فيه، ويفضل تغير الفلتر كمان
* افتح العمة وحاول تنظف فلتر الهوا ولو فيه أي اتربه جوه شيلها
* شيك على أسلاك البوجيهات والموبينة وانها واصلة مش واقعة من اماكنها
* شيك على الهوا في الكاوتش... غالبا هتلاقي الكاوتش نايم

المرحلة التانية... تدوير العربية

* حط شوية بنزين في الكاربيراتير - أكيد مافيهوش بنزين
* دوس دبرياج
* كارك بنزين - 4-5 مرات عشان تحضر ، وماتزودهاش عشان العربية ما تشرقش
* دور - العربية ممكن تتأخر على ما تدور عشان البنزين لسه ما ملاش الخراطيم ما بين التانك والكاربيراتير
* بمجرد إن العربية اشتغلت دوس بنزين... بس ما تعليش الموتور عشان الزيت لسه ما اشتغلش في الموتور... غالبا هتلاقي العربية طلعت دخان اسود من الشكمان فما تتخضش
* بعد ما الموتور ينتظم في الدوران شيل رجلك من على الدبرياج بالراحة

المرحلة التالتة... بعد التدوير

* استنى لحد ما العربية تسخن وبعدين اتحرك
* أول حركة للعربية (أول كيلو متر) لازم تبقى بالراحة، عشان كل زيت الفتيس والكورونا راقد
* أول مشوار ليك هيبقى على المغسلة، وتديها تنضيفة حلوة
* تاني مشوار على الميكانيكي.. وتشيك على كل الخراطيم، لإن غالبا ممكن تكون اتشققت من الركنة، وتشيك كمان على العربية بشكل عام
* تالت مشوار على بتاع الرادياتير، عشان تغسل الدورة وتشيل الصدا
* يفضل مشوار لتغيير زيوت الفتيس والكورونا
* يفضل تغير فلاتر الهوا والبنزين

كده اعتقد العربية تبقى جاهزة



...