اعادة امتحان المرور النظرى (الاشارات)

[amrmohamed1975]

استاذي انت اختبرت فى وحدة مرور ايه

[shaibat]

اخى الفاضل انا اختبرت فى وحدة مرور شبر الخيمه (مش عبود)

[hesham90]

الاخ الفاضل من تجربتى واصدقائى اوعى تغير محل الاقامة لعبود مثلا كل الهم واحد فى كل وحدات المرور ودوخة ملهاش حل ويقولك ايصال كهرباء باسمك مش بس عقد شقة مسجل لا ******وياريت تحكيلنا بالتفصيل خطوات الامتحان فى الاشارات بالتفصيل من اول مادخلت وحدة المرور وبالشرح والوصف للمكان والاشخاص اللى اتعاملت معاهم والامتحان كان عبارة عن ايه ومين الممتحن واتعاملت ازاى مع الكمبيوتر وهل قمت بنفسك بالامتحان على الكمبيوتر ام العسكرى هو اللى كان بيكتبلك الاجابات علشان انا رايح امتحن اشارات فى شبرا الخيمة ارجوا التفضل بالرد والتواصل ولك خالص تحياتى

[shaibat]

طبعا انا ماكنش معايا اى واسطه وانا مهندس ميكانيكا وعندى 47 سنه وباسوق كويس ولما ربنى كرمنى بقرشين وحسيت انى لازم يكون عندى عربيه حتى مستعمله قلت ابتدى فى اجراءات الحصول على رخصة ونزلت امتحان الاشارات من المنتدى وذاكرته كويس جدا وتدربت عليه وكنت باجيب 100%وقلت ابتدى فى الاجراءات ذهبت للمرور مره للاستطلاع ومعرفة الامور ماشيه ازاى وبعده بفتره قلت اتوكل على الله وخش الامتحان طبعا اول حاجه قاللو تجيب صورة البطاقه وتاخد عليها تأشيره من البيه الظابط وخدت التأشيره علشان ادخل امتحان الاشارات وقعدت منتظر اما حجرة الكمبيوتر ونده عليا البيه العسكرى واول ما دخلت عنده البيه مكنش عاجبه صورة البطاقه وقاللى صور البطاقه صوره تانيه رحت لماكينة التصوير جنبه وصورت البطاقه صوره ثانيه وبص فيها سيادته وعجبت سياده وبعدين شاور على موظفه جانبه وقاللى هات منها نموذج اختبار وذهبت للاميره الموظفه قالت مافيش نماذج اختبار لسه هانروح نجبها من المخزن قمت رايح للبيه العسكرى وقولت له قاللى استنى بره لغايه مانجيب النماذج وبعد فتره نده لى البيه العسكرى ودخلت لقيت سيادته مبتدى الامتحان على الكمبيوتر وخلانى امضى على نموذج الاختبار على بياض وعمل نفسه بيشرح لى طريقة الامتحان وكان عدى سؤالين ماجاوبتش عليهم وجاوبت على اللى لحقتهم وفى الاخر لاقيت النتيجه على الكمبيوتر 62 % وطبعا النجاح من 80% قللى خلاص تيجى بعد ثلاثة شهور ومن خلال التجربه لاقتنعت ان لازم يكون معايا واسطه تخلصى الموضوع او احاول اقدم فى وحده مروريه أخرى

[hesham90]

طب والناس التانية اللى كانت حتمتحن اشارات وكانوا فى الدور وبيندهه عليهم ماشفتش عملو ايه ماسألتهمش نجحوا وجابو كام ولا سقطهم زيك وانا عارف ان فى ناس بتخلص فى الاشارات اى عسكرى او امين شرطة او حتى الواد بتاع البوفيه اللى حاطط ثلاجة فى الصالة جوة وبعدين لو كل اللى كانو معاك سقطوا يبقى فيه تلاعب فعلا بس فيه ناس على المنتدى قالو انهما دخلوا امتحان الاشارات ونجحوا على الكمبيوتر وانت راجل مهندس وكان لابد تمتنع عن الامتحان لما لاقيت العسكرى مشغل الامتحان قبل ماتجهز انت لان انت عارف من خلال الامتحان الموجود على الموقع انه بزمن وطالما انه شغل الامتحان وحب يعطلك بالشرح كنت جاوبت بسرعة وماستانتش الشرح وكنت دوست بسرعة على الاجابة الصح او الاختيارية وياريت تتواصل معايا وتقولى الامتحان كان اسئلته ايه لو تتذكر وهل كان الاجابة بصح او خطأ او برقم اجابة 1 او2 او 3 ونصيحتى لسيادتك ياباشمهندس الاتى----------1-شوف اى واسطة فى المرور او غير المرور 2- شوف الناس اللى بتمتحن واسألهم بعد الامتحان عملو ايه وايه النظام واتصرفوا ازاى لان فيه ناس بصمجية وبينجحوا يبقى انت ياباشمهندس اللى جايب الامتحان على الكمبيوتر ومذاكره كويس وبتجيب 100% تجيب62% اكيد فيه حاجات غلط مش حاجة واحدة فلازم فيه ناس بتخلص والا ماكنش اى حد من الاخوة الغير متعلمين اصحاب مهنة السواقة البصمجية منجحش مع احترامى لهم جميعا ولمهنتهم القاسية 3-فيه ناس بتقول لاغى العسكرى بعشرين ج وهو حينجحك من غير امتحان حتى لو سقطت هو بيتصرف فى الكمبيوتر وبيعيدلك الامتحان فى الحال فأسأل الناس اللى واقفة بتمتحن .4-ممكن تشوف بتاع البوفيه وتقوله انت امتحنت وسقطت ايه الحل فى الثلاثة شهور واكيد هو عارف بيتصرفوا ازاى5-ارجوا التواصل والافادة بالرد واعادة المحاولة من خارج وحدة المرور قبل الثلاثة شهور بسؤال الناس اللى رايحة تمتحن واللى امتحنت وخارجة من الامتحان .وماقولتليش عملت ايه فى البروفة امتحنت ولا لسه واذهب لمكان البروفة هى عند المصنع اللى بعد المرور فى اخر الشارع وشوف البروفة عبارة عن ايه وايه العربية اللى بيمتحنك عليها ولا على عربيتك وقولى عربيتك ماركتها ايه وسنة الصنع وبقالك قد ايه بتسوق وهل متمكن من السواقة ولا لسه جديد6- احكى لى بالتفصيل شوية عن وصف غرفة الامتحان بتاعة الاشارات ونوع الكمبيوتر ونظام الامتحان وكيفية الاجابة والزمن المستغرق فى الاجابة وهل لاحظت ان الزمن المحدد ملعوب فيه يعنى مثلا زمن الاجابة محدد بعشر ثوانى هل العسكرى لاعب فى الكمبيوتر ومظبطه على ست ثوانى وتقبل خالص تحياتى لسيادتك بالتوفيق فى المرة القادمة بعد ماتلاقى حل قبل ماتعاود التجربة منتظر الرد5/8/2010 الساعة12.45م