|
#26
02-08-2012, 06:36 PM
|
||||
|
||||
رد: اول يوم ممارسه عامه فى الزحمه ...
شوفوا يا جماعه اهم حاجة قلبك يكون جامد وارادة حديد وثقة بالنفس ومتنساش البروووووود التام ...هههههههههههههه تصوروا انا كنت خايف من حاجة واحدة هى اذاى امشى بالصندوق الحديد الكبير ده اللى هى السيارةوسط الشوارع والناس والعربيات من حواليا.
 ..انا بقيت متحير اجيب عربية قديمة اتعلم عليها الاول واخبط بيها والا اجيب عربية جديدة البعض نصح بالقديمة لزوم الخبط والذى منه والاخر قال لى هات الجديدة لانك اول مرة تسوق ولو اتعلمت على عربية قديمة رجلك وايديك راح تبقى تقيلة ومش راح تظبط معاك بعد ان تركب الجديدة لان حساسييتها اعلى وكمان البور بيساعد معاك الخ...وبصراحة انا كنت ميال للجديد لعدم وجود خبرة وكثرة اعطال القديم وبالتالى ممكن اكون جبت لنفسى مشاكل انا فى غنى عنها... وعليها قررت اجيب سيارة جديدة بعدالتدبير والذى منه والحمد لله...اشتريت العربية.....ههههههههه الاهم من كده ان العربية قعدت تحت البيت مركونة اكثر من شهر من غير ماركبها...والحمد لله كنت رخصتها قبل الثورة بايام....لانه من بعدها البلطجية حرقوا ادارة المرور بالكامل...ولم اتمكن من استخراج رخصة القيادة وقلت اشوف حد يعلمنى...لم اجد اى مكتب تعليم قيادة بالسويس....ومعارفى كانوا خايفين يعلمونى على عربياتهم..لانى خااااااااام فى السواقة.. يعنى ملا قيتش حد يعلمنى...ماعدا زميل محترم بالعمل معاه فيات قديمة وحالتها عدمانة خالص. بس ربنا يبارك له فيها ويوسع فى رزقه.قلت يعلمنى عليها واهو اولى بفلوس مكتب التعليم ولانه محترم رفض فكرة الفلوس وقال اركب العربية وعرفنى طريقة نقل الغيارات ونزل من العربية وقال اركب مكانى ركبت ولاقيته بيقفل باب السيارة ويقول لى دور واطلع....طبعا زهلت وقلت له اركب معايا قال لا سوق لوحدك وتشجع وعليها رحت مدور العربية وطلعت بيها بثبات ومشيت بها لاخر الشونة بداخل العمل ومساحتها كبيرة جدا ومسفلتة ورحت لافف بالعربية ورجعت تانى لنقطة البداية....ووقفت,لكن العربية طفت منى لانى لم امور قبل ماشيل رجلى من الدبرياش...بصراحة الراجل قال لى انت هايل فى السواقة ولاول مرة.... وموش راح تصدقوا ...تانى يوم جبت كتالوج فيفى اقصد فيرنتى ونزلت اقرا داخل السيارة تفاصيل التابلوه  واتعرف على الاجزاء والمفاتيح. على الطبيعة..لاقيت ابنى سامح دخل جنبى..بيقولى هو انت يابابا بتعرف تسوق..قلت له اه هى يعنى شغلانة..ورحت رابط الحزام و مدور العربية ومشيت بيها حول المربع السكنى للحى وهوبا.... رحت طالع للشارع العمومى... وداخل وسط العربيات..ابنى زهل من المفاجأة...قاللى يابابا طب شغل نور الانتظار عشان الناس اللى ورانا تعرف انك لسه جديد فى السواقة ..رحت مشغله..ولفيت المربع ورجعت بالسلامة لنقطة الانطلاق اى تحت بيتنا هههههههههههه ومن ساعتها انكسر حاجز الخوف بينى وبين السيارة ..وبقيت كل يوم اخد السيارة لوحدى بعد الشغل والف حول المربع السكنى وكل يوم اضيف مساحة وشوارع جديدة... وطوا مانا ماشى اعمل غيارات عشان رجلى وايدى تاخد عليها.. وكمان اشغل الاشارات...قعدت حوالى اسبوعين وكانت احيانا تطفى منى او اخد غيار غلط واتعلم اذاى اهدى عند المطبات واخد الغيار الصح واذى افرمل وانا متخيل انه امامى عربية ام واحد ماشى فى الشارع يعنى بقيت اعمل سيناريوهات لكل احتمالات الواقف اللى ممكن تمر بيها وانت ماشى بالعربية حتى اذاى اجيب مارش دير لو عايز اركن جنب الرصيف واللى ساعدنى ان الشوارع واسعة ولاتوجد زحمة للعربيات... وفى مرة حضر عندنا الشيخ محمد حسان..مع الشيخ حافظ سلامة ..لعمل مصالحة بين شعب السويس والامن بعد تعيين مدير امن جديد بعد الثورة  وكان اللقاء فى استاد السويس ليلا.. وعليها يااخوانى رحت رابط الحزام وطاااالع على الاستاد..والاقى يااخوانى رجال الجيش يستقبلوا السيارات وانا معاهم طبعاههههههه... بتنظيم رائع وتوجهيها لاماكن الانتظار...ولاقيت نفسى باعمل زى المحترفين اللى سياقيين العربيات من حولى..واركن ولا احسنها سواق ههههه....المهم بعد اللقاء كانت المفاجاة الكبرى..الاف الناس خرجت من الاستاد فى وقت واحد.... لامؤاخذة كنت مزنوق فى الميه وموش لاقى مكان افك فيه..قلت موش حاقدر استنى لما الشوارع تفضى..وعليها يااخوانا رحت راكب العربية وشادد الحزام(من اول مرة قدت السيارة وحتى تاريخه لااسوق الا والحزام مشدود)ورحت ماشى بالعربية وسط طوفان من السيارات والناس من حولى ملتصقين بالسيارة من جميع الجهات,يا سلااااااااااااام كانى سواق طول عمرى ومشيت حوالى كيلو وسط هذا الطوفان لم اخبط فى سيارة او احد من البشر بفضل اللهرغم الضغط العصبى من زنقة الميه.. معلهش طولت عليكم المستفاد يااخوانى علشان تتعلم السواقة لازم الجراة والثقة فى النفس والانتباه لحركاتك ولحركات من حولك والبرووود التام من تعليقات من حولك المهم انك تاخد وقتك وبطريقة صح عند قيادتك وغصب عن الكل راح ينتظرك لانك تتصرف بحكمة وربنا يكفينا شر الطريق وشر ولاد الحرام واحذر خطأ الغير وكل عام وانتم بخير 
|
 |
|
|
رد: اول يوم ممارسه عامه فى الزحمه ...
