عربية زيرو في حدود 50 الف ايه الاحسن ماروتي 2014 ولا شانا بيني ميني 2014 ؟

[*walaa*]

ههههههههه و الله انا نفسي خايفه علي الناس و عربياتهم من سواقتي بس ربنا يستر ان شاء الله

انا كدا كدا هجيب مانيوال عشان فرق السعر زي ما حضرتك قولت .. بس فكرة التقسيط مش هتنفع .. بس افهم من كلام حضرتك ان شانا وحشة و الماروتي هي اللي كويسة بخلاف طبعا انها صغيرة ؟؟ و لا حضرتك لسه مش مجمع معلومات عن شانا .. و يا ريت تقولي فكرتك ايه عن الصيني عامة .. انا بصراحه مبقتش فهماه ناس بتشكر في الصيني و ناس لا و تخوفك منه في حين ان اسبيرانزا ما شاء الله منتشرة
و يا ريت تفيدني في حكاية تعليم السواقه مع مدرب و لا مدرسة و لا مدرسة المرور .. و كمان الرخصة
و شكرا علي ردك اوي و معلش هتعبك معايا

[frnko95]

الصينى على حسب يعنى مثلا العربيه بريليانس جالينا او جيلى شانا الاتنين صينى بس فرق السما من الارض بينهم الجالينا موتور ميتسوبيشى وعفشه بورشه ولو هاختار بينهم بنفس السعر هاركب جالينا مثلا 2009 فخامه وواسعه وليها احترامها فى الطريق الماروتى تعتبر ملطشه اى عربيه بس متفقين على ان الاتنين فيهم بعض العيوب فى الصيانه واسعار قطع الغيار وتوافرها انما العربيات تجميع محلى بالنسبالك افضل مثال الهيونداى بتشتريها وتمشى بيها ولمما بتبيعيها بتكسبى فيها عشان خبرتك ضعيفه بلعربيات هى هاتكون افضلهم لاقدر الله وانتى بتتعلمى طلعتى على الرصيف وده وارد وعادى كلنا ركبنا عالرصيف بس بالهيونداى ممكن تصلحى ب 200 جنيه انما بغيرها الله اعلم عشان كده برشحلك المحلى بقوه الماروتى حلوه بس بالنسبالى لو معايا 50000 جنيه هاركب هيونداى او عربيه صالون مضمونه بصراحه رغم انى مهندس وفاهم العربيات كويس وركبت موديلات مختلفه ممكن تشوفى حاجه فى الهيونداى وموجود كتير حالات هاتبقى بالخمسين وافضل من الماروتى زيرو وتعيش معاكى وموديلات من 2011 وانتى طالعه مايعتبرش مستعمل فى حاجات كسرزيروه تسوى 100 الف جنيه وبتتباع ب50000 وصاحب القرش صياد فا ماتستعجليش على الشراء
وبالنسبه للسواقه انا عالنفسى اتعلمت بنفسى وانا بتفرج على والدى وهو بيسوق عليه رحمه الله واهم حاجه انك اى حد بتركبى معاه انتى تراقبيه بيعمل ايه واساليه ودى طريقه سهله السواقه حاجه عبيطه جدا وممكن تتعلميها فى يومين تلاته بعدين هاتتعودى وتتعلمى الباقى من نفسك عشان ماحدش يفتيلك كتير وياخد منك تمن حصص عالفاضى خليكى فى حد معرفه يعلمك بطريقه بلدى هاتستوعبى اسرع المهم تشيللى الرهبه من جواكى عشان ماتكسريش العربيه

واى استفسار تحت امرك واى حد من الاعضاء
01011147247 م يوسف

[zing0]

مش عارف ليه بأميل للماروتى
يمكن علشان يابانى و تقفيل هندى (أحسن من الصينى و التقفيل المصرى إللى بقى مالى التوكيلات دلوقتى)
يمكن علشان صيانتها سهله
يمكن علشان قطع غيارها متوفرة و رخيصة
يمكن علشان ماسكه سعر (المستعمل سعرة بيزيد مش بيقل) ده لأنها أثبتت وجودها رغم كل التريقه إللى المصريين بيقولوها عليها (علبة كبريت - ميدالية - لعبه ...)
يمكن علشان توكيلها ليه إسم (سوزوكى)
يمكن علشان سحب و تسارع العربية ممتاز
معرفش ليه بأميل ليها بجد

[نبيل عبدالرحمن]

أولاً مرحباً بيكى فى منتدانا الكبير وزى ما لاحظتى حضرتك إن الكل عاوز يقدم لك النصيحة وياريت لو تاخدى بنصائح إخوانك
العربيه الصينيه شانا بينى شكلها حلو لكن الماروتى أفضل منها من ناحية الصيانه وقطع الغيار وسعر إعادة البيع أفضل من السيارة الصينى
لكن يلاحظ أنها سيارة ضعيفة وأبسط خبطة فيها بتعجنها
عشان كده اللى بيقول لك إشترى عربيه هيونداى مستعمله فقد أعطاك نصيحة مناسبة لك بالفعل أولاً حضرتك بتتعلمى سواقة جديد وحرام تسوقى عربيه ع الزيرو وكلنا عملنا كده لما إشترينا أول سيارة
السيارات الهيونداى سيارات كوريه المستعمل منها رخيص لكن قوة تحمله أكبر وقطع غياره رخيصة وكل الميكانيكية حافظينها وما تخافيش تقدرى تاخدى معاكى واحد متخصص يفحص لك السيارة اللى ها تشتريها
فأنا مع اللى بيقولك خدى سيارة مستعمله أحسن
بالنسبة لموضوع تعلم السواقه فالأفضل تقدمى الأول فى مدرسة تعليم السواقه الموجودة بجوار كوبرى الإبرهيمية بسموحه وهمه هايساعدوكى فى إستخراج الرخصة ، بس ده مش كفايه لازم حد يعلمك حتى تتقنى القيادة
وتمنيات مصر موتورز كلها وخصوصاً فرع الإسكندرية لك بكل توفيق

[frnko95]

طبعا انا ليا الشرف ان المهندس نبيل شخصيا يؤيد نفس الراى ولو كنت شاكك لحظه فى نصيحتى ليكى فلا يفتى ومالك فى المدينه الباش مهندس نبيل بنفسه بيقولك هيونداى مستعمله والفيرنا بالتحديد افضل سياره شعبيه تمشى معاكى لغايه ما تبداى تغيرى فى المستقبل

وبالتوفيق ان شاء الله