برجاء مساعدتي في مازدا 97 عاوز اشتريها

[lotfyonline]

امبارح شوفت مازدا 323 موديل 97 اتوماتيك كاملة وأخدت معايا صنايعي من عند عم بلبل مازدا يشوفها وقالي بصراحة العربية لقطة مشدودة بالكامل , دواخل فبريكة , عفشة سليمة جدا و متسقطلها موتور 2002 استيراد بحالة ممتازة
لحد كده حلو قوي ولكن عم بلبل حذرني من قطع غيار الموتور ده لأنه مش موجدو وغالي خاصة اني لسة في بداية حياتي والدنيا مستورة
يا جماعة العربية طالعة من عيني خاصة انها في رنج 35 الف وممكن تنزل شوية
عاوز حد يكون عنده تفس الموتور يقولي بأمانة الموتور مشاكله ايه وقطع غيارة اسعارها كام

أرجو الافادة بسرعة قبل العربية ما تروح مني

[hazem_khidr]

لو كان فيه الخير ما كان رماه الطير
عربيه بالمواصفات اللي حضرتك بتقول عليها لو ليها سوق و قطع غيار مكنش تمنها بقي قليل
نصيحه بالمبلغ اللي معاك هات اكسيل 98 او اكسنت او اي عربيه ليها قطع غيار علشان ما تبقاش قرفان من عربيه
و انت بتدور علي اويل سيه مثلا و مش لاقيه لمجرد ان العربيه نادره!!!
لو عاجباك اوي انزل اي محل قطع غيار ياباني قريب منك و اساله لو حاجتها موجوده و اسعارها كام
و علي حسب كلامه يا تشتريها يا ما تشتريهاش

[khaledelian]

وأخدت معايا صنايعي من عند عم بلبل مازدا يشوفها وقالي بصراحة العربية لقطة مشدودة بالكامل , دواخل فبريكة , عفشة سليمة جدا و متسقطلها موتور 2002 استيراد بحالة ممتازة
لحد كده حلو قوي ولكن وأخدت معايا صنايعي من عند عم بلبل مازدا يشوفها وقالي بصراحة العربية لقطة مشدودة بالكامل , دواخل فبريكة , عفشة سليمة جدا و متسقطلها موتور 2002 استيراد بحالة ممتازة
لحد كده حلو قوي ولكن عم بلبل حذرني من قطع غيار الموتور //// عم بلبل دا طرشجى...وبتاع 323 - 1982 بالعافية. اتوكل على الله/ مش حتعوضها.

[teefa2010]

انا برده بدور على العربيه دي زيك يا ريت ابقى قول عملت إيه؟ انا برجح انك تسأل محل قطع غيار ياباني عنها علشان قطع الغيار في ناس كتييير قالوا نادرة بس انا لسه ما نزلتش اسال عنها
وربنا معاك يا باشا

[jas_x]

سلام عليكم
واحد جارى معاه مازدا 323 موديل 97 دى مانوال كامله وجنوط سبور وعارضها على 27 الف (قابل للتفاوض)، عارضها من 3 شهور ولسه مش عارف يبيعها، اعتقد زى ماالاخ حازم قال: لو كان فيه الخير ماكان رماه الطير