تشخيص أغلب اعطال سيارة الشعب 128 المفاجئة موضوع مميز جدااااا

[sayed2077]

السلام عليكم ورحمة الله وبركاته

كتير مننا بتصدفه مشاكل مع السيارة اللى مجننا الشعب المصرى
:sycho2 6:
وبيبقى مش عارف المشاكل ديه من ايه
ولما بيروح عند ميكانيكى بيقعد الميكانيكى يخترع ويخليه يغير نص العربيه مع ان المشكله ممكن تكون من حاجه بسيطه مش هتتكلف 20 جنية

وفى الموضوع ده هحاول اوضع بعض المشاكل اللى ممكن تقابلك وحلولها

نبداء
بسم الله الرحمن الرحيم

(1)
تبقى ماشى بالعربيه فى الزحمه وكل شوية تبطل منك بس لو دوست بنزين زياده تفضل دايره بس اول ما تشيل رجلك من البنزين تبطل .
(حلها)
المشكله ديه بتكون من الابلاتين والكوندنسر هما السبب وده من الاسباب الشائعة فى ال 128 ويفضل انك علشان تحصن نفسك ان العيب ده ميجيلكش كل شوية انك تغير ابلاتين وكوندنسر كل شهر لازم كل شهر لان ده متوسط عمرهم الافتراضى للاسف وسعرهم بالتركيب حوالى 50 جنية وتجيب النوع الانجليزى لان الفرنسى كله اتضرب وراحت عليه خلاص.

(2)
تبقى ماشى فى طريق غير ممهد او مثالا كل مطب او فى كل طلعه وفرملة بالعربيه تسمع صوت طقطقه (طق طق )
(الحل )
ده بيبقى كده فيه عندك شرخ فى جسم وشاسيه العربيه ولازم تروح عند اقرب سمكرى كويس يلحملك الشروخ اللى بتظهر ولو لزم الامر يعملك زرجينه وبعدين يلحم الشروخ اللى عندك وخليك فاكر ان اى شرخ هيظهر وبتسمع صوته ومش هتعالجه هيفضل يكبر يكبر يكبر لغاية لما يجيب العربيه نصين وتقدر تقول على الشروخ فى ال 128 انها (عمالنا الرزى ) وعبارة عن تكفير سيئات ليك

(3)
انك تبقى سايق فى امان الله ومره واحده تيجى تدوس دبرياج تلاقى الدبرياج نزل على الارض من غير ما يطلع تانى ابدا

(الحل)
فى الحاله ديه سلك الدبرياج اتقطع منك وعموما ساعات سلك الدبرياج بيديك انذار قبل ما يتقطع وبيكون قبل ما السلك يتقطع بمده بسيطه جدا تقدر تقول مثالا بيبقى قدامك بتاع 20-50 ضغطه دبرياج وبعدها السلك هيتقطع خلاص والانذار ده بيكون عبارة عن انك كل ما بتيجى تدوس دبرياج بتسمع صوت طقطقه بسيطه جدا منه وبتحسها فى رجلك وبتسمعها بودنك ساعتها بس تعرف ان الدبرياج بتاعك سلكه هيودع فى اقرب وقت وساعتها لازم تتوجه لاقرب ميكانيكى يغيرلك سلك الدبرياج وعموما نصيحتى للجميع تشيل معاك سلك دبرياج وكمان طقم صواميل بتاع سلك الدبرياج لان طقم الصواميل القديم بيقع فى الطريق ومبتلقيهوش تانى فللاسف لو معاك سلك دبرياج بس من غير طقم الصواميل بتاعته يبقى ولا كانك عملت حاجه نهائيا

وطبعا اول ما تلاقى الدبرياج وقع على الارض يبقى حضرتك تتصل بالميكانيكى بتاعك يجيلك بسلك دبرياج وطقم صواميله ويجيلك يركبهولك او لو معاك السلك وطقم صواميله تحاول تركبه لو بتعرف او تشاور لسواق تاكس يركبهولك او لو مفيش كل ده يبقى تجيب على التانى وتشغل العربيه هتلاقى العربيه بتنط معاك وسايسها لغاية ما تمشى وامشى بالراحه على التانى لغاية ما توصل وتغيره عند اقرب ميكانيكى

(4)
علو درجة الحرارة عن الطبيعى
(الحل)
المشكلة ديه بيبقى ليها كذا سبب بس هنحاول نقولهم واحد واحد
السبب الاول :ان المروحه مبتشتغلش وفى الحالة ديه يبقى تشوف فى علبة الفيوزات عندك لو فيه فيوز محروق تغيرة او لو عندك مفتاح يشغل المروحه فى حالة مثالا ان حتى لو الفيوز اتحرق ومعاكش فيوزات تقدر تفتح المفتاح ويشغل المروحه دايركت لغاية ما توصل بالسلامه لاقرب كهربائى
السبب التانى:هو ان ممكن ترموستات الماية يكون باظ خلاص ومبقاش يشغل المروحه فى مواعيدها المظبوطه او مبيشغلهاش خالص وحالها انك تجيب ترموستات اسبانى اصلى سعره لا يقل عن 30-35 جنية وتركبه ومفيش اسبانى اصله 80-90 لا بيكون 79 - 88 درجه حرارة تعتبر مثالية ولا تفرق شىء عن ال 80-90 واوعى تجيب ايطالى او صينى لانهم مضروبين ومبيشتغلوش نهائيا ولو اشتغلوا عمرهما لافتراضى مبيعديش شهرين تلاته بالكتير وبعدين يخرافوا

السبب الثالث : هو ان المروحه خلاص كده جه اجلها وفى الحالة ديه انصحك بدل ما تجيب مروحة 128 تركب مروحة شاهين بالقميص بتاعها وفعلا مبتشتغلش كتير مقارنة بمروحة ال 128 اللى بتشتغل سنتين مروحة الشاهين مش بتشتغل اكتر من دقيقة فى اكثر الايام حرارة وبتخلى الماتور تلاجه بمعنى الكلمه

السبب الرابع :ان الماية بتنقص وممكن يكون سببها تسريب فى اى جزء من اجزاء دورة التبريد خراطيم او ردايتير او حتى غطا الردايتير ردىء الصنع ففى الحالو ديه تحاول تفحص اجزاء دورة التبريد وبعدين تشوف فين مكان التسريب وتعالجه او تغيره

(5)
العربيه بتلت و الماتور نغمة حريقه مش مظبوطه
(الحل)
علشان نعرف المشكله منين لو العربيه متلته مثالا
هنشيل سلوك البوجيهات الواحد تلو الاخر
مثالا هتشيل اول سلك لو لقيت الماتور اتأثر اول ما تشيله مثالا الماتور بطل او اترج جامد اول ما تشيل السلك يبقى تعرف ان البوجيه ده والسلك الدنيا فيهم سليمه وشغالين بكفائة وتركب السلك تانى مكانه

وتفضل كدا على نفس الحال لغاية ما تيجى عند سلك بوجيه تيجى تشيله متلاقيش اى حاجه فى نغمة حريق الماتور اتاثرت يعنى تشيل وتحط السلك وكل ده الماتور شغال طبعا ميحصلش اى حاجه يبقى تعرف ان البوجيه ده مش سليم يبقى اول حاجه وقبل ما تفك البوجيه من مكانه تقرب سلك البوجيه من جسم الماتور لو مطلعش شرارة او لو بيطلع شرارة كل فين وفين يبقى كده العيب قى السلك وتروح تغيرة بواحد تانى او لو بيطلع شرارة مظبوطه ومنتظمة يبقى تبطل الماتور وتفك البوجيه وتشوف شكله
لو لقيته مهبب يبقى اعرف ان مسمار الهوا فى الكربراتير عندك عاوز يتظبط بالمختصر المفيد يبقى تروح عند واحد بتاع كربراتير يظبطلك الكربراتير او لو لقيت فيه زيت على سن البوجيه يبقى اعرف ان ماتورك كدا خفيف وانك داخل فى نص عمره او عمرة كامله

وعلشان تحل المشكلة مؤقتا يبقى غير البوجيه بواحد جديد او اغسل اللى ماعك بالبنزين كويس واحرقه بس يفضل عموما تغيره بواحد جديد لحد ما تحل المشكله من جذورها

(6)
فى حالة انك ماشى ولقيت اى حاجه فى الكهربا مش بتشتغل مثالا الانوار الامامية مش بتشتغل او الكلاكس او كدا يبقى اقرب حاجه تبص عليها قبل ما تشتغل فى اى حاجه علبة الفوزات اللى عند رجلك وتشوف الفيوزات اللى راكبه فيها واحد واحد لو لقيت فيوز فيهم بايظ (هتلاقية بايظ انه السلك بتاعه مقطوع ومش متوصل ببعض ) يبقى تغيرة فى الحال بواحد جديد ولو اتحرق تانى يبقى تعرف ان فيه ماس عندك فى العربيه واوعى تحط جنية فضه مكان الفيوز لو الفيوز بيتحرق كل ما تركب واحد جديد لان كدا انت لو فيه ماس هتبهدل ضفيرة الكهربا وهتتسبب بمشاكل اكبر
وطبعا لازم يبقى معاك فيوزات بتاع 10 فيوزات للطوارىء كده و طبعا فى حالة كل ما تركب فيوز بدل اللى محروق يروح محروق هو كمان يبقى اعرف ان فيه عندك ماس ولازم تروح عند اقرب كهربائى يشوف الماس منين ويعزلة

وبكده اتمنى اكون وفقت فى التعريف باغلب المشاكل المفاجئة فى السيارة اللى جايبه المراررة للشعب المصر
ههههههههههههههههههه

و
السلام عليكم ورحمة الله وبركاته

ملحوظه : هذا الموضوع حصرى لمصر موتورز ويجوز نقله ولكن مع توضيح مكانه وكاتبه الاصلى وانك تدعى اللهم اغفر للمسلمين والمسلمات والمؤمنين و المؤمنات الاحياء منهم والاموات

[I.fouad]

[الهولندى الطائر]

الله ينور

أستاذ

طيب واعطال الدينامو يا باشمهندس سيد

لمبة دينامو منورة على طول او على فترات او سلانسيه شويه او اثناء السير

رجه على السلانسيه

مالهمش نصيب فى الموضوع بتاعك ولا ايه ؟

: 140109~347:

[comandos_79]

طيب بالنسبه لشروخات العربيه ال كل شويه شرخ في العلب ويتلحم ويتشرخ تاني مالهاش حل

[sayed2077]

المشاركة الأصلية كتبت بواسطة الهولندى الطائر الله ينور أستاذ طيب واعطال الدينامو يا باشمهندس سيد لمبة دينامو منورة على طول او على فترات او سلانسيه شويه او اثناء السير رجه على السلانسيه مالهمش نصيب فى الموضوع بتاعك ولا ايه ؟ : 140109~347:

بالنسبه للمبة الدينموا فهى ليست من الاعطال المفاجئة للعربيه لان حتى لو لمبة الدينموا نورت فهناك متسع من الوقت ان حضرتك تروح لكهربائى ولكن انا اقصد على الاعطال المفاجئة وهى الاعطال اللى بتظهر مره واحده والعربيه بتتاثر جامد بيها وممكن متشتغلش او بتأثر على طريقة التشغيل تحياتى لك .