مأساتي مع فرع النزهة و تحية إجلال و تقدير لأستاذ عماد حبيب

[مينتشو]

على فكرة انا قاعد مستنيك بشغف اول ماتيجى ادينى رنا
عشان انا مجهز الافتات وهسبقك على ميدان التحرير
ترجه بالسلامه ان شاء الله

الله يكون في عونك

انا المعرض ده اتعاملت معاه لواحد صاحبي من شهر كنت بشوفله ال byd f0 الهاتش باك وفي كام شخصيه هناك كان هاين عليا ادور العربية جوه المعرض واساويهم بالسيراميك قمة البرود وانا بتفرج علي العربية حبكت يروشو ميه ويمسحوا المعرض ومفيش معلومه خدتها صح من حد جوه والبيه المسئول خايف يدورلي العربية علشان اسمع صوتها واشوف اداء الماتور عامل ازاي اكتر حاجه عاملها انه نورلي نور التابلوه بس من غير ما يدور متفهمش خايف يدورها ليه وعربية تقفيلها غلط في غلط كلها غلطات في التقفيل فضيحة بمعني الكلمة والواد صاحبي خاد ديله في سنانه وطلع جري من المعرض المعرض ده اسوء معرض دخلته في حياتي خدمة عملاء -100% سالب 100%

[مينتشو]

والله يا اخوه انا على المستوى الشخصى محتار ما بين بى واى دى والاسبيرنزا ايه 516 بس بعد اللى باسمعه ده يبقى مفيش غير خيار واحد ( البلدى الكيلو بجنيه ونص ) ولو فى حد من الاخوه اللى مجربين عنده معلومه او نصيحه يا ريت يقولهالى والف شكر

وعلى فكره انا لسه مستنى الاخ بتاع التقسيط وقلبى معاه والله ربنا يارب يوفقه وياريت لما يرجع يطمنى وشكرا

[ahmed000mon]

الاخبار ايه استلمت ولا لسه فيه تسويف واذا كنت استلمتها الف مبروك وربنا يكفيك شرها واخبارها ايه وتفنيشها عامل ايه

[gad_fcis]

أولاً أنا أسف على التأخير


ثانياً أخيراً العربية جت امبارح و الملاحظ إن طريقة تعامل مدير المعرض اتغيرت شوية للاحسن و إن كانت لسة مش على المستوى المتوقع من مدير معارض


بس فيه حاجة للأسف هتأخر الإستلام و هي إن اجراءت البنك هتاخد وقت عشان تمشي و كمان إن لسة موافقة هيئة الإستثمار أو جواب المرور بتاع العربية مجاش و هيجي على حساب كلام مدير المعارض كمان 3 أو 4 أيام


على أي حال المهم انها جت ، و هقلكوا ملاحظتي عليها سواء عيوب أو مميزات :


المميزات :
1- تقفيل العربية كويس أوي إلى حد كبير بإستثناء بعد الحاجات حقولها في العيوب
2-العربية جاية بسماعتين ورا ، يعني كدا العربية 4 سماعات مش سماعتين في الباب بس
3- تقفيل العربية كان أحسن من اللي شفتها في معرض الأهرام (كانت مستوردة من الصين)

4-كل ال كماليات اللي في العربية تعمل بكفاءة (الزجاج الكهربائي و المرايات و فتحة السقف و الأنوار )

-تكييف العربية ممتاز و متحسش بصوت علو الموتور و إنت قاعد جوا العربية
5-حسيت و أنا جوا العربية اني فعلاً أحسنت الإختيار الحمد لله







العيوب :
1-شنطة العربية لازم تترزع رزعة محترمة عشان تقفل
2-الحتة اللي بتعمل كونترول منها على فتحة السقف حسيت انها مش ثابتة كويس في مكانها ، يعني تحس إن فيه فرق بسيط بين البلاستيك و السقف
3-كعادة كل عربية BYD f3 فيه تقوس بسيط من النص في الإكسدم الخلفي
4-كان فيه فيشة واقعة مابين الإكسدام و الرادياتير كانت جانب الكلاكس، أنا مش خبير أوي في العربيات بس أنا يتهيئلي انها حساس و المشكلة اني لما سألت الولد اللي كان بيفرجني على العربية لقيته بيقولي تلاقيها فيشة زيادة ، أموت و أعرف بيجبوهم منين و بيعينوهم على أي أساس ، ازاي كلمة زي ديه تطلع من واحد المفروض إنه شغال في مجال السيارات (أنا خايف أطلع أنا اللي جاهل و تكن فعلاً فيشة زيادة )


أخيراً أحب اشكر كل اللي ساعدني في إختيار العربية و كل اللي قدملي نصيحة و واساني من وقت كتابة هذا الموضوع


ملاحظة أخيرة عشان أكون صادق معاكو ، مدير المعرض وراني ورق لعملاء تبع البنك الوطني للتنمية (اللي أنا هقسط تبعه) و بيقولي إن الورق خلص من غير ماتكون العربية موجودة ، كل اللي حصل إن البنك خد رقم شاسيه و موتور و الورق مشي لحد ما العربية تيجي ، بيقولي البنك الوحيد اللي بيشترط إن العربية تكون موجودة هو بنك ناصر ، هو بيقولي كدا عشان أنا كنت مصر على وجود العربية عشان ورقها يمشي في البنك زي ما مندوب البنك أكدلي ، أنا مش عارف بقى هل كل مندوب ولا كل فرع بيمشي بمزاجه ولا إيه؟ و خصوصاً إن كدة ميعتبرش إسلامي على حد علمي