|
#1
12-01-2014, 04:00 PM
|
||||
|
||||
تجربتي مع طقم الشمبر عربية 128
بسم الله الرحمَن الرَحيمّ
قبل ما ابدأ أي كلام أحب أقول نقطتين، • النقطة الاُولي هو أن الموضوع يمكن يكون طويل شوية ف أعذروني • النقطة الثانية هو أني أتعلمت من المكان ده حاجات كتير يمكن مش أوي لكن فعلاً استفادت يكفي ان بقالي أكتر من 8 سنين بسوق عربيات لكن ولا كنت عمري أفهم شيء ف الميكانيكا أو الكهرباء أو أي شيء كنت بكتفي بس إني أنزل ادور العربية وامشي وأغرز واسابق واجري فقط لا غير. لكن لما ربنا عوضني مكان العربية اللي كانت عندي وجبت عربية 128 أي نعم عربية مش حديثة ولا زي اللي كانت عندي لكن انا بحمد ربنا أني أحسن من غيري ف حاجات كتير ع الأقل بروح واتغطي ف البرد وانزل الاقي عربيتي اللي اتنقل بيها ف أي مكان اللي غيري بيتمني حتى يجيب عجلة يمشي بيها ف اللهم لك الحمد والشكر علي نعمتك. الموضوع النها ردة باختصار هو تجربتي مع تغيير طقم الشمبر للعربية نوع العربية 128 موديل العربية 1977 سعة الموتور 1100 CC الحكاية بدأت لما انضحك عليا واشتريت العربية بعيبها بـ 12500 جنية والعيب هو أن الموتور خفيف لكن استعوضت ربنا وقولت الحمد لله محدش بيتعلم ببلاش و يوم عن يوم كنت ابتديت أكرهَ نفسي بسبب عيب الموتور ده. لحد ما جيت واستشارتكُم إني أفتح وأصلح الموتور ولا أجيب واحد إستيراد ولكن بعد المشاورة معاكم قررت أفتح الموتور و انا و رزقي ع الله.  و إبتديت المِشوار و أستفسرت علي ميكانيكي كويس و سألت أكتر من حد لحد ما وصلت لـ واحد في منطقة الحلمية في شارع اسمه (منشية التحرير) و الراجل ده قبل ما أعمل عندهُ الموتور كنت انا روحتلهُ بالعربية عشان كان في صوت طقطقة في العجلة الامامي يمين و طلع العيب ( بلية العجل ) و صلحها و كانت سعر البلية تقريباً 60 جنية و مصنعيتهُ كانت 40 جنية أخد 100 جنية. وإحنا واقفين سألتهُ ع الموتور قالي غالباً هيكون (طقم شمبر) قولتلهُ يعني انت رأيك إيه قالي نعملهُ و نتوكل ع الله وبالفعل العربية راحلته يوم الإثنين 06/01/2014 وقالي ع بركة الله. ودي صورة العربية وهي عند الميكانيكي ع اليمين أسمه سامح  بعدهاَ أول مُشكلة واجهتهُ أن العربية الموتور حالف ما يطلع تقريباً المسامير مصدية و خلاص الحالة طينة و انا إيدي ع قلبي خايف المسألة تفتح مني اول وانا أصلاً لوحدي جيبي مخروم و اللي فيه مكفيه :D لكن الحمد لله تم حل الوش بنجاح وبعد ما طلع عنيه طلع الموتور كله بالكامل من العربية و بعد الفحص و الكشف عليها كانت العيوب كالأتي * / تلف في شفة البستم رقم 2 من الشمال و ده هيحتاج أننا نغير بستم * / طقم شمبر بالكامل * / فارغ طرمبة مياة بالماسورة عشان اللي عندي مكسور * / ديسك و أسطوانة عشان القديم خلاص عمره أنتهي مع سلك الدبرياج طبعاً خلاص الموتور أتفتح و اللي كان كان و أشتريت الحاجة من واحد جنب الميكانيكي أنا اعرفهُ و سمعتهُ جميلة أسمه ( أحمد مُحرم ) أسعاره جميلة إلى حد ماَ و أسعار الحاجة كالأتي :- • طقم جوان = 65 جنيه • جوان وش = 18 جنيه • عدد 4 اوسيل أو انيل مش عارف بالظبط = 25 جنيه • سيلكون = 13 جنيه • قاعدة فتيس = 43 جنية • طقم دبرياج ديسك و أسطوانة مايا تركي = 280 جنيه • سلك دبرياج معدل بالصامولة و الحتة النص دائرة = 25 جنية • طقم شمبر = 145 جنيه • فارغة طرمبة مياة = 50 جنيه • سيلكون حراري = 7 جنيه • ماسورة مياة = 25 جنيه • كوعة مياة = 6 جنيه • طقم بوجيهات فلاج = 25 جنيه • بنزين تليين = 35 جنيه • دينمو استيراد = 150 جنيه • ترس كرنك = مش فاكر بالظبط بس هحاول أفتكر • بستم إستيراد = 100 جنيه • خراطة وش موتور = 150 جنيه • كتير صح !!؟ و دي عينة من الحاجات اللي اشتريتها  المُهم بدأ الراجل يشتغل فيها طبعاً جنبهُ الكهربائي عشان يشتغل ف الدينمو و كان فيه عيب ف المارش و عملي زرار فصل الكهرباء ع المارش مصنعية الكهربائي في حل الدينمو و اشترالي واحدة استيراد و تصليح المارش و عمل زرار فصل الكهرباء وكان في قفلة في كهرباء الصالون كل ده بـ 60 جنيه المُهم نرجع للميكانيكي أشتغل ف العربية وكان عندهُ أزمة يوم الثلاثاء اللي هو تاني يوم ما وديتله العربية و أشتغل فيها الأربعاء و الخميس بلليل كان بيركب الموتور و قبل ما يركب الموتور سألتهُ الموتور في تعتيبه قالي اه بس خفيف و بسيط حطيت ايدي مكان البستم و حسست ع التعتيبة لقيتها فعلاً معتبة لكن بسيطة و خفيفة و في بستم واحد مش في أكتر من مكان و تقريباً كان مكان البستم اللي شفته انكسرت و غيرناها المهم سالته الموتور هيأثر معايا ف شيء قالي لا يعيش معاك المهم تاخد بالك من المياة و الزيت و الكلام ده قولتله متقلقش و روحتله يوم الجمعة و كان ما شاء الله عليه العربية دايرة و بتتلين كمان   المُهم قالي ريح رأسك و تعالي استلمها بكرة بعد ما تيجي من الشغل اللي هو يوم السبت اللي كان إمبارح و بالفعل روحتلهُ الساعة 6 لقيت العربية جاهزة ع الاستلام و ابتديت أتحاسب ف مصنعيته من هنا لهنا لهنا لهنا لهنا وصلنا لحد 500 جنية و ده مصنعية • طقم الشامبر • تغيير الديسك و الأسطوانة و سلك الدبرياج • تغيير مُسمار المساعد ف الكاوتش من 17سم إلي 13 سم ف المنطقة اللي بالصورة دي •  طبعاً مكانش معايا غير 300 جنية بصراحة قولتله خدهم و يوم الاثنين اللي هو بكرة المفترض أديله 200 جنية و ربنا يسهل و دي عروستي بعد العمرة و بعد ما ركنت عند الشغل  و لما وصلت الشغل كنت انا كلمت زميلي ف الشغل كان عنده فلتر بنزين BMW خرافة بقالها معاه سنة ونص او سنتين غير انها كويسة جداً لحد علمي المهم وصلت الشغل كنت طلبتها منه و لما وصلت لقيته جبهالي و دي تمنها 40 جنية ركب و انسي الفلتر سنتين قدام و دي صورتها  لكن امبارح وانا بشيك ع الريداتير قالي ابقي روح لبتاع ريداتيرات عشان يلحملك الفايص عشان انكسر قولتلهُ مش هلحق النهاردة قالي مش مهم هي مفيهاش مشكلة انا طبعاً مقلق ده بالإضافة ان حاسس ان المياة بتنقص بسرعة عن ما كان قبل العمرة يعني امبارح قبل ما اركنها كنت ماليها ع اخرها النهاردة الصبح لقيت نفسي حطيت ازازة و نص و انا ف العادي كنت بحط ربع او نص ازازة ياتري ده من الفايص؟ ولا ايه؟  أسف للإطالة بس حبيت أشرح كل شيء بتفاصيلها يمكن أقدر أفيد ناس و ناس تفيدني أو يمكن أنضحك عليا وانا معرفتش :D برده ميمنعش اني اتعلم من اساتذتي هنا. أسم الميكانيكي : سامح عودة عنوان الميكانيكي : شارع منشية التحرير بعد نادي منشية التحرير حلمية الزيتون شارع عين شمس رقمهُ : 01009801681 أسم الكهربائي : عم حمدي عنوان الكهربائي : بجوار الميكانيكي أسم محل قطع الغيار : احمد محرم عنوان : نهاية شارع إبراهيم عبد الرازق و هو قريب جداً من سامح الميكانيكي 
|
|
#2
12-01-2014, 07:05 PM
|
||||
|
||||
رد: تجربتي مع طقم الشمبر عربية 128
الف مبروك وربنا يحميلك العربية وجميل جدا انك تشرح كل حاجة بالتفصيل واهم حاجة كانت الصور علشان بتوضح اكتر وابقى طمنا
|
|
#3
12-01-2014, 10:20 PM
|
||||
|
||||
|
رد: تجربتي مع طقم الشمبر عربية 128
ربنا يباركلك فى عربيتك ... و ان شاء الله الشغل يكون تمام
انا لسة عامل طقم شنبر .... مش حشرح بالتفصيل زى ما حضرتك عملت ... حشرح باختصار لتعم الافادة للجميع شكرا لنقل التجربة و الخبرة
__________________
|
|
#4
12-01-2014, 10:36 PM
|
||||
|
||||
|
رد: تجربتي مع طقم الشمبر عربية 128
الف مبروك وبامر الله العربية تطلع حلوة
بالنسبة لمياة الردياتير ....انا شايف نقط مياة اسفل العربية من عند جهه فايظ الردياتير اكيد بينقط مياة لما تعملة تابع المياة بصفة مستمرة هاتاخد اسبوع ولا حاجة ونسبة الفقد هاتقل بامر الله
__________________
يااااااااااااا رب إرحمنا بقدرتك علينا 
|
|
#5
12-01-2014, 11:24 PM
|
||||
|
||||
|
رد: تجربتي مع طقم الشمبر عربية 128
1000000مبروك اصلاح سيارتك
عوضك الله كل الخير إن شاء الله يسر الله لك طريقك وحفظ لك سيارتك من كل سوء إن شاء الله
__________________
|
 |
|
|
