غسيل الشاسيه - نظامه إيه؟

[أشرف الشفقى]

الحمد لله الهيونداى i10 الجديدة بتاعتى عملت حوالى 2500 كم دلوقتى وكنت عملتلها صيانة الألف كم الأولى. أنا كنت غسلتها فى البنزينة مرة واحدة بس من ساعت ما اشتريتها من جوة ومن برة.

النهاردة العربية راحت تستحمى للمرة التانية وبرضه فى نفس البنزينة، بنزينة شيل قبل المنطقة الحرة فى مدينة نصر. المرادى قلتلوا عاوز أغسلها من تحت، بعد ما قريت فى الكتالوج إن تنضيفها من تحت مهم علشان العاجات ما تبوظش من الوساخة وكده.

الحمد لله نضفوها من جوه ومن بره ومن تحت كمان، يعنى غسلوا الشاسيه بعد ما رفعوا العربية. أنا فرحت أوى بكده، وفعلاً كانت حمومة الشاسيه ده متأخره أوى، كان لازم أعملها من زمان خصوصاً بعد مشوار الخطاطبة (مزرعة فى طريق مصر اسكندرية الصحراوى) إلى فيه العربية داست على طين بالكوم. الحمد لله إنى غسلتها دلوقتى.

السؤال: إيه نظام غسيل الشاسيه، هل له أضرار ولا زى ما الكتالوج بيقول حاجة لو مش عملناها العربية حتزعل منننا قدام؟

[AbOnOrA]

الافراط فى اى شىء مش مستحب ده اولاً
ثانياُ يفضل ان الغسيل يكون والعربية باردة سواء المحرك او الجسم الخارجى
لازم تجفف بشكل جيد الاول وبعدين تمشى بيها مسافه كافيه علشان اى مياه متراكمة فى اى مكان تنزل
لا يستحب استخدام المياة بالضغط العالى فى الحوض ويفضل استخدام الفوم والهواء فقط

[رياح التغيير]

ازاي تجفف بشكل جيد ابونورا وموضوع الضغط العالي في حوض الموتور ممكن يأثر عالحوض مثلا؟

انا فعلا عايز اعرف ازاي هما بيقولو في التوكيل ان المفروض مفيش ميه تيجي علي الموتور والموتور يتغسل بالفوم والهواء وازاي لما العربية تتغسل من تحت هيه مش هيجي علي الموتور ميه ولا ايه

[hazem_khidr]

غسيل العربيه من تحت يكون كل شهرين علي الاقل
و مافيش منه اي اضرار بالعكس دا بيزيح الطين من بطن العربيه
لكن زي ما ابو نورا قال الافراط فيه غيرمستحب