ايه خطوات تشطيب شقة ع الاحمر ؟

[waelsalah]

السلام عليكم
ممكن اعرف اسعار المصنعيات ايه ؟
1- شغل الحديد ؟
2- الكهربا
3- السباكة
4- المحارة
5- المصيص والجبس
6-السيراميك
7-النقاشة
يعنى بيتعاملوا بالمتر ولا بالمقاولة ولا ايه ؟


وايه رايكم فى ابواب الاوكرديون او الالوميتال الجرار
من ناحية العملية والاسعار ؟

[AbOnOrA]

خطوات تشطيب و ترتيب المراحل
بعد التصميم و خد وقتك و راحتك لحد ما تقتنع تماما بالتصميم عشان ما تصرفش فلوس علي حاجة و ترجع تعيدها و عشان يبقي عندك تقدير مبدئي للتكلفة عشان ما تتفاجئش برقم مش في حسابك و تعرف امتي تبتدي و امتي تشتري و امتي حتقف او تخلص.
ظ، التكسير و المباني لو حتغير تصميم مش حتكسر يبقي رقم ظ، هو ظ¢
ظ¢ السباكة و تشمل العزل للحمام و المطبخ و مواسير الصرف للتكييفات لو عندك وحدات مش حتعرف تطلع خرطوم تصريف المياة علي صرف مجهز للتكييف .. و طبعا بعد اختبارات الصرف و التغذية بتخلي السباك يعملك حنفية او مصدر للمياة عشان بقية الشغل ما يعطلش علي مياة
ظ£ الكهرباء و تشمل كل الوصلات و خطوط التكييفات و الاجهزة و مواسير التكييف لو مدفونة في الحوائط و المهم فيها حسابات الاحمال و قطر السلوك عشان تعرف تكلفة السلوك و محتاج كام لفة سلك من كل قطر
ظ¤ الأبواب و الشبابيك و تشمل تركيب حلوق الابواب و الشبابيك و تصميم باب الشقة و الغرف
ظ¥ المحارة و تشمل التقطيب علي شغل الكهربائي و السباك و بياض الحمام و المطبخ لو حتركب السيراميك بلصق مش بمونة و التقطيب علي الابواب و الشبابيك و كرانيش الجبس.. لو مش حتعمل كرانيش الجبس و حتعمل ديكور... بجيبسوم بورد او حتركب كرانيش جاهزة يبقي المبيض يمعجن السقف بمعجون اسمنتي ابيض او رمادي عشان يبقي نضيف و يداري اي عيوب من المحارة اللي مستلم بيها السقف
ظ¥ النقاش يدخل يراشم الحيطان و يديها سيلر و سكينة واحدة معجون لو حتعمل شغل جبسوم بورد يخش بعد السكينة الأولي لو مش حتعمل شغل بورد يبقي يكمل تلقيط و سكينة تانية
ظ¦ شغل السيراميك و الارضيات في الحمام و المطبخ و اهم حاجة تحدد مستوي التشطيب ( شرب ) و ظبط المناسيب او الرخام يركب و يتجلي و لو حيركب اتش دي اف يبقي منسوب البلاط او السيراميك تحتيه اقل من مستوي التشطيب ظ، سم مش اكتر من كده و لو باركية يبقي تركب العلفة و الفلصة و الخشب و يتقشط و ياخد اللون والسيلر
ظ§ تغطية المتشطب من الارضيات بمشمع او كرتون و سحب سلوك الكهرباء لو ما كانتش اتسحبت و يدخل النقاش يسنفر و لو محتاج سكينة تالتة او معالجة اي خسائر لا قدر الله و يدي وشين البطانة و لو الخشب الداخلي لاكية تجيبله الابواب و الشبابيك عشان يحضرهم و يدهنهم معاه لو استر يبقي قرب ما يقرب يشطب يتدهنوا في الورشة بعد ما تستلمهم خشب مش مدهون و من غير عيوب .. و تشطب بالالوان اللي متحددة في التصميم من الاول و تركب الخشب بإكسسواراته و يبقي فاضلك ظ£ خطوات
ظ¨ المطبخ ييجي و يركب
ظ© وشوش الكهرباء و النجف و وحدات الإضاءة
ظ،ظ* طقم الصحي و اكسسوارات الحمام و المطبخ و اي حاجة صغيرة ناقصة

منقول عن أ. عمرو صالح
أنا مش خبير تشطيبات بس حاولت أجمع شوية دروس مستفادة أنا صادفتها شخصيا في شقتي و في شقق قراببي:
1. لو حتستلم الشقة نص تشطيب من شركة من اياهم اياك تخليهم يعملولك المحارة حتي لو حتسيبلهم فلوسها ، بيجيبو مبيضين درجة تالتة.و المحارة البايظة شبح من الماضي حيطاردك بقية حياتك.
2. نفس البند اللي فات بس علي حلوق الأبواب.اخلعها وركب حلوق جديدة .
3. الشركة اللي تديلك سعر حاجة من غير معاينة اعرف انها شركة هواة و حتجرب فيك. الرخام و تركيب الشبابيك و ال Shutter لازملها معاينة قبل التسعير و الشغل.
4. لو فيه صنايعي بدا يعك من أولها ، اديله حسابه و مشيه فورا، انت بتستثمر في الشقة ولازم تبقي شرس ووغد في حماية استثماراتك
5. الصنايعي بيسمع كلامك بس مبيبقاش مركزمعاك، و سواء فهم أو مفهمش بيقولك آه فاهم ، لازم تعيد الكلام مرة و اتنين و تخليه يقولك هو فهم ايه عشان تتأكد ان اللي انت عاوزه وصل له و فهمه.
6. حاول تدي ملاحظاتك في شكل ورقة مكتوبة أو رسمة و يبقي عندك منها نسخة، لو اديت الصنايعي ورقة معندكش منها نسخة حيقول انها ضاعت و يغلطك ، صورها بتليفونك أو علي ماكينة التصوير ،ابسط حاجة نوتة وورقة كربون أو دفتر مكربن من عند مكتبة مجدي اللي قدام هندسة عين شمس.
7. اياك تسلف صنايعي حاجة خاصة بيك ، متر قياس ، مفك، شاكوش ، سلم، شنيور-لأنه حيضرب عليه ولو كان أمين و مش حرامي حيرجعهولك بايظ و متعاص جبس و معجون و أسمنت.
8. لو في خامة معجبتكش أو رخامة مشروخة متكتفيش برفضها، ارميها فورا و بنفسك أو دغدغها 30 حتة والا أول متمشي الصنايعي حيستخدمها من ورا ضهرك.
9. لو انت في الدور الأرضي انأكد ان الصرف بتاعك مستقل عن صرف العمارة والا المجاري حتطفح في شقتك مع أول سدد.
10. ماتبخلش علي عزل الحمام ، نقي أحسن حاجة اختبره كويس و املاه مياه، لو حصل نشع عند جارك اللي تحتك دلوقتي أحسن ما يحصل نشع بعد مالشغل يخلص
11. لو حتعمل وزة باررزة في الحيطة اتأكد انها مش حتعاكس مراية الحمام أو بر الباب (البر هو الشريط الخشب الداير حوالين الباب و راكب علي السيراميك)
12. مش لازم بالضرورة تلزق البانيو في الحيطة ممكن من جنب تسيب 20 سم بينك و بين الحيطة تتشطب سيراميك بنفس مستوي حرف البانيو و تستغلها في رص علب الشامبو اللي بتقع في البانيو كل شوية.
13. خلي السباك يعملك توصيلات لخزان سطح خاص و سخان شمسي بالمحابس، محدش عارف الظروف و ممكن اللي انت شايفه سخيف بكرة يبقي مهم
14. صرف الأرضية في المطبخ فكرة ممتازة بس تتعمل صح.
15. ميول صرف المياه في البلكونات و الحمامات مهمة ، لازم تدلق جردل ميا بنفسك و تتأكد ان في ميول قبل ما تمشي الصنايعي
16. في مراحل معينة في التشطيب لازم تبقي حاضرها بنفسك witness point لأن في بدايات لو كانت غلط حتكلفك كتير زي مثلا :
a. أول رصة سيراميك علي الأرضية تتأكد انه بدأ بشكل عدل أو علي 45 حسب رغبتك ، لو الصنايعي بدأ وانت مش معاه غلط حيخلص أوضة كاملة علي وضع غلط و يجيبلك صدمة عصبية لما تروح تشوف شغله آخر النهاروكل الوقت و الخامات حتتهدر، نفس الكلام علي الرخام و الباركيه.
b. تركيب رخامة الحمام و البانيو تبقي واقف عشان ميركبوش أعلي أو أوطي من المستوي اللي انت عاوزه
c. تركيب مواسير تغذية السخان
d. تركيب مكان دش الحمام
e. اختبار ضغط مواسير الحمام
17. الصالة فرشها بيتغير و بيتنقل كتير ، فكر في سيناريوهات نقل الأنتريه مكان السفرة و العكس ، خلي في مخارج تليفزيون و دش في كل مكان محتمل انك تحط فيه التلفيزيون في المستقبل. البلكونة بيتعملها مخرج دش.
18. لازم تحدد و تختار أماكن كل حاجة بنفسك علب الكهرباء -البواطات- مكان جرس الباب –مكان لمبة الباب الخارجية-لمبة مراية الحمام-محبس الحمام-محبس السخان-محبس الغسالة ،مفاتيح التكييف-و يفضل تبقي في رسمة موضح عليها كل الحاجات دي، بالنسبة للحمام في شركات زي محجوب بتعملك رسمة للحمام ، كل ماتسيب التفاصيل دي عايمة بتدي فرصة للصنايعي انه ياخد اختيارات من نفسه، في ناس خبيرة و ممكن تختار مكان كويس بس مش كلهم كده.
19. المفتاح الديفاتير نعمة من نعم الله ممكن تعمل 2 مفتاح ديفاتير لانارة الطرقة واحد في الأول وواحد في الآخر عشان تنور نور الطرقة و انت في اولها و تطفيه لما توصل آخرها و في أفكار كتير في أوض النوم و الحمامات.
20. اعمل فيش الكهرباء اللي في الحمام و البلكونة water proof في الحمام عشان المياه و في البلكونة عشان التراب ميملاهاش.
21. قاعدة عامة أي حاجة بتركب بخوابير في الحيطة متسترخصش فيها ، زي مسطرة الدش في الحمام و الفواطة ، ممكن تجيب وشوش كهرباء رخيصة من أبو 3 جنيه دي مش مشكلة لأنها سهل تغييرها.
22. كتر برايز كهرباء علي قد ماتقدر و خصوصا في المطبخ حتي لو مش محتاجها أو شايف ان ملهاش لازمة.
23. المطبخ بيبقي سخن ممكن تعمل فبشة في الحيطة لمروحة جانب تساعد في التهوية.
24. اعمل للشفاط مفتاح متوصل بسلك مخرجه من برة الشباك عشان متشوفش سلك مدلدل وعشان عرف لو حبيت تعمل ضرفة تقفل شباك الحمام تماما من غير ما تفك سلك الشفاط كل شوية.
25. الفرن ال Built –In عايز مخمخة خصوصا لو حتشغله مؤقتا بالبوتاجاز لحد مالغاز يتوصلك ، خلي بتاع المطبخ يعمل حساب ضرفة أنبوبة سهل تتقلب ضرفة عادية مستقبلا.
26. خلي الكهربائي يعملك لمبة اشارة في لوحة كهرباة الشقة تعرف منها لوالنور قطع العيب من الكهرباء العمومي ولا داخلي عندك.
27. خلي الكهربائي يزودلك خراطيم كهرباء و يعمل حساب توصيلات مولد كهرباء احتياطي و مواسير فاضية للدش في كل الأوض و الأحسن تجيب كابل دش و تمشيه في المواسير من الأول .
28. نفس البند اللي فات بس علي كاميرات المراقبة و توصيلات الانتركم
29. اتأكد ان فتحة باب المطبخ بعد تركيب الحلوق حتعدي الأجهزة بتاعتك و اعمل حسابك تدي براح لو قررت مستقبلا تشتري تلاجة أكبر
30. اعمل مخرج حنفية خدمة زيادة تحت الحوض .
31. لما النقاش يعملك عينات لون خليه يعملها علي خلفية بيضاء عشان فروق الدرجات تبان كويس.
32. متبلغش كود اللون شفوي ابدا.
33. لو حتركب أبواب حديد خارجية أو حديد حماية خلي الحداد يفصلك حلوق حديد و يركبها من بدري قبل المحارة بكانات مدفونة في الحيطة عشان ييجي في الآخر يلحم الباب من غير تكسير و لادق أوتاد ، أمتن و أنضف و لو معكش فلوس كفاية ركب حلوق حديد علي داير الشبابيك و سيبها للمستقبل. لو فيه دق خليه قبل وش النضافة عشان لو الحيطة نملت تقدر تعالجها.
34. نقي باب مصفح من الجديدأبو شراعة مدورة تتفتح عشان تشوف مين علي الباب زي أبواب زمان ، لو مش لاقي اعمل شراعة صغيرة في الحيطة جنب الباب 20 سم x 25 سم بضرفة حديد ، وفي أفكار كتير في الديكور تخلي شكلها جميل و في ناس بتثبت عليها تابلوه أو مراية صغيرة ، كده ممكن الطفل أو السيدة تفتح الشراعة بس لو الجرس ضرب و تحاسب محصل الكهرباء من غير ماتفتح الباب . طبعا العين السحرية مهمة لازم تخليها.في كل الأحوال.
35. الاستثمار في الأمن مهم و بيرفع تمن الشقة ، لو في امكانية تركب قاذفات لهب علي الباب تحرق المتسللين ركبها.
36. لو خايف علي أرضية متشطبة ، افرد عليها مشمع بنفسك ، محدش حيخاف علي حاجتك أكتر منك.
37. لو حتعمل رخام ياما تكع صح و تجيب رخام مستورد زي السيسيليا و الكرارة ياما بلاش و خليك في السيراميك ، الرخام المصري زي الفلتو و الجلالة مشاكله كتير وفيه عروق بتفتح بعد فترة، بلاش منظرة علي الفاضي.
38. اشترط علي بتاع الرخام يقفل الفواصل بالكلة مش بالأسمنت الأبيض.
39. احتفظ بعينات من السيراميك لزوم اي مرمة مستقبلا و سجل في أجندة أسماء الموديلات و أكواد الألوان اللي استخدمتها و الفواتير
40. احتفظ بنمرتليفونات الصنايعية الشطار خصوصا الكهربائي لأنك حتحتاجه كتير في المستقبل.
41. كذلك ممنوع بتاتا إستخدام أي أكر أو كوالين أو مقابض أبواب صيني وإلا ستفاجأ بمواقف بايخة يكون عنك ضيف مثلا ومحبوس في الحمام علشان كالون الإشارة معلق أو لآ قدر الله طفل مش عارف يفتح الباب.
42. أي زجاج ألمنيوم يفضل يكون دبل للعزل الصوتي والحراري ولا يفضل الفيميه اللي المصريين غاويين يركبوه في الشقق إكمنهم مش عارقين يلزقوه للعربيات لأنه بيغير لون الإضاءة الطبييعة.
43. يا ريت لو حد حيعمل شباك مناولة من المطبخ لازم يكون عامل حسابه إنه يتقفل لأن المطبخ المصري والشرقي بصفة عامة بينتج عنه روائح وآثار غير مرغوبة وياريت بلاش فلحسة وتقليد أعمى وخلاص ومنعملوش من أصله.

منقول ومجمع للإفادة